Juan 11
11
Yalgut cheen Lach
1Ngu tub xaabyi ne nzak, xaa le Lach, xaa yezh Betania. Mari nu Mart, me nak leeka bzan Lach, nzho leeka yezh ba. 2Mari mchub perfum kwaan chul nzebech nii Xaa Nabeyy, nu msekwizh meya kwaan yich yek me. 3Zee mxaal rop bal me xaa yé kwaane lo Jesús:
—Me Nabeyy, lee xmig lu ne nzak.
4Gorna mbin Jesús kwaane, nu né xaa:
—Lee yalyizh ne nazhint nebse lo yalgut, sinka noka leya sirb luu lee yalnabeyy cheen Dios nak tub kwaan gro, nu xomod gro nak yalnabeyy cheen Xgann Dios.
5Nu nixa nkedoola Jesús rop bal Mart nu Lach, 6mlaz xaa xchop mbizh pa nzo xaa, leezha mbin xaa kwaane. 7Zeera né xaa lo re nu, xaa mseed lo xaa:
—Ya be stub welt yizhyo Judea.
8Zee lee re nu nzhé lo xaa:
—Maestr, nalsi lee re sawlazh be, re xaa nzho yizhyo ba nzhekla ngut lu kwaan ke, nu seesa nzhekla lu ya lu baa stub welt.
9Jesús né:
—Wli na nii na, lee tub mbizh nkano chiibchop gor pa nzaaya xni. Chelee tub xaa ze zhe, naralt nii xaa, nel nkano xaa xni cheen yizhyo ne; 10per chelee tub xaa ze yaal, nral nii xaa, nel nyent xni lo xaa.
11Ngulo ngunii xaa sbaa noka né xaa:
—Lee xmig be Lach naxna, per na yalexche xaa.
12Zee nzhé nu:
—Xaa Nabeyy, chelee xaa naxna xaa, zee yakwen xaa.
13Per lee kwaan né Jesús lo nu, nak lee Lach ngut, nu lee nu seetaka kale xgab lee xaa naxna. 14Zeera klar nguné Jesús lo re nu:
—Lee Lach ngutla. 15Nu nyakla na nel namzot na baa, nel snee ne re gu lee na nak Xaa Mxaal Dios Nabeyy. Chaa gu, yasewii be lo xaa.
16Zee lee Max, xaa nii re xaa “Kwech”, né lo stub naz nu, xaa mseed lo Jesús:
—Chaa ya re be zee noka re be yet kwaan lee xaa.
Jesús nak yalnroban nu yalnaban
17Gorna mzhin Jesús, ngune xaa lee Lach nzhala tap mbizh mkaach xaa. 18Nu yezh Betania nzhi gax Jerusalén, kan chon kilómetro, 19zee zyen xaa nzho Jerusalén ngwa nguseleyy Mart nu Mari nel ngut bzan me. 20Gorna ngune Mart lee Jesús mzezhin baa, mroo me garli me zee mzhaal me kwaan lee xaa; per lee Mari mlakeka leen yoo. 21Lee Mart nzhé lo Jesús:
—Me Nabeyy, chol nzo lu nee, nangeta bzan na. 22Per nixa nala, na ne lee Dios zaa kwaan naab lu lo xaa.
23Jesús mkeb nzhé:
—Lee bzan lu ban stuba.
24Mart nzhé:
—Wliya, nela na, lee xaa ban stub mbizh kwaan roban re xaa ngut, mbizh gwluzhtlaka.
25Zee lee Jesús nzhé:
—Lee na nak yalmroban nu yalnaban. Loka xaa wii lo na, nixa yet xaa lee xaa ban; 26nu lee xaa seetaka mban, xaa ngwii lo na tira nayeta xaa. ¿Che nzak lu wli kwaane?
27Lee me nzhé:
—Nle na krera, Me Nabeyy. Ne na lu nak Crist, Xgann Dios, Me Mxaal Dios Nabeyy, me nak kwent yaad yizhyo ne.
Jesús nzhonn roo xbaa Lach
28Gorna ngulo nzhé xaa kwaane, Mart ngwa nguchezh bal me Mari, nu nzhé meya lo bal me xlaan:
—Lee Maestr nzo nee nu kabezh me lu.
29Gorna mbin Mari kwaane, lijer nguxso me nu ngwa me lo Jesús. 30Lee Jesús zeeraka zeeb leen yezh; nu nzoka xaa pa mzhaal Mart xaa. 31Gorna ngune re xaa kaseleyy Mari, lee Mari lijer nguxso, nu mreke re xaa tich me, mle xaa xgab lee roo xbaa Lach ya me yayonn me.
32Gorna mzhin Mari pa nzo Jesús, mkichxub me lo xaa nu nzhé me:
—Me Nabeyy, chol nzo lu nee, nangeta bzan na.
33Gorna ngune Jesús nzhonn Mari, nu noka nzhonn re xaa nzhake tich me, nales doo ngok lextoo Jesús, 34nu mnabdizh xaa:
—¿Pa msebyo gu xaa?
Lee re xaa nzhé:
—Xaa Nabeyy, te, zee wii lu.
35Nu mbinn Jesús. 36Lee re xaa nzhé:
—¡Wii gu lo xaa, nkedoola xaa Lach!
37Per lak xaa mbezh:
—Lee xaa ne msekwen zaalo syeg, ¿che nyent mod ngle xaa tub kwaan zee nangeta Lach?
Mroban Lach
38Stub welt Jesús nales doo nzhak lextoo xaa, gorna mbii xaa roo baa. Baa ne nak tub yiloo, kwaan nyaaw roo kwaan tub ke. 39Nu Jesús nzhé:
—Bre gu ke.
Mart bzan ntagol nzhé:
—Me Nabeyy, ech nawent nlaa me, nzhala tap mbizh ngut me.
40Jesús mkeb nzhé:
—¿Che nanit na lo lu, chelee lu wii lu lo na, ne lu lo re kwaan chul cheen Dios?
41Mre xaa ke, nu Jesús mwii naz yiba nu nzhé:
—Xuz, za na dixkix lo lu nel mkenzha lu xtizh na. 42Na ne tubka nkenzha lu xtizh na; per nii naya zee lee re myet, xaa nzo nee, ne lee lu mxaal na.
43Gorna ngulo ngunii xaa kwaane, dublegan nzhé xaa:
—¡Lach broo baa!
44Nu lee xaa ngut mroo nduuzh nral ler, nu noka yek xaa nral ler. Jesús nzhé:
—Bxek gu xaa nu laa gu nya xaa.
Nzhekla re xaa ko Jesús lozhyib
(Mt. 26:1-5; Mr. 14:1-2; Lc. 22:1-2)
45Kwaane mle, zee zyen sawlazh nu, xaa nguseleyy Mari, mzelo ngwii lo Jesús nel ngune xaa kwaan mle xaa. 46Per lak xaa ngwa lo re xaa fariseo, nu nzhé xaa kwaan mle Jesús. 47Kwaanzee lee re ngwleyy non nu re fariseo mdop re xaa nak zhiin, nu nzhé xaa:
—¿Cho kwaan le be? Zyen doo nseyn kwaan gro doo kale xaa ne. 48Chelee be laa be xaa, rese xaa zelo wii lo xaa, nu napa lee xaa yezh Roma, xaa nabeyy be, kayiid nu kalux xaa kwaan nkano be nee nu yezh cheen be.
49Per lee tub xaa nzo lo re xaa ba, xaa le Caifás, xaa nak ngwleyy non doo liin zee, nzhé lo re xaa:
—¡Re gu nanet nik tub kwaan! 50¿Chozhiin nanzeent re gu kwaane? ¡Mas wen yet tubka xaa kwent cheen re xaa yezh, ke rese xaa yezh yet!
51Ngunii Caifás lee Jesús yet kwent cheen re xaa, nu ngunii xaa wdizh kwaan mzaa Dios lo xaa, nel lee xaa nak ngwleyy non doo liin zee nu namroota leeka yek xaa. 52Nu nayeta Jesús nebse kwent cheen re nu, xaa Israel, sinka noka zee chaal Dios re xaa nzho stub yezh zee gak re xaa tubka yezh cheen xaa. 53Nu snee axta mbizh zee lee re xaa non nzho yek gut Jesús.
54Kwaanzee, Jesús nanzotra klar lo re sawlazh nu, xaa non, nya xaa naz tub yezh kwaan nzhi gax naz wen, yezh kwaan le Efraín. Baa mlaz xaa kwaan re nu, xaa mseed lo xaa.
55Nu merla zhin yalni cheen Paskwa, pa nselazh nu xomod mloo Dios re xey nu Egipto, nu zyen nu, xaa rete yezh, nroo nzha naz Jerusalén zee le nzhul nu nu lo Dios. 56Zee re xaa ne kakwaan Jesús lo yalni, nu nabdizh re xaa lo wechxinn xaa lach roo yidoo:
—¿Cho kwaan nzak gu? ¿Che zyiid xaa o nayiidt xaa?
57Lee re fariseo nu re ngwleyy non, mnabeyy zee loka xaa ne lo Jesús, yé xaaya lo xaa, zee zen xaa xaa zee ko xaa xaa lozhyib.
Currently Selected:
Juan 11: zpo
Highlight
Share
Copy
Want to have your highlights saved across all your devices? Sign up or sign in
© 2002, Wycliffe Bible Translators, Inc. All rights reserved.