ԳՈՐԾՔ ԱՌԱՔԵԼՈՑ Գլուխ Ը
Գլուխ Ը
1 Եւ եղեւ յաւուր յայնմիկ հալածումն մեծ ի վերայ եկեղեցւոյն յԵրուսաղէմ. եւ ամենեքեան ցրուեցան ի գեղս Հրէաստանի եւ Սամարիայ բաց յառաքելոցն։ 2Եւ բարձին զՍտեփանոս արք երկիւղածք, եւ արարին կոծ մեծ ի վերայ նորա։
ԲԴ.
3Բայց Սաւղոս վնասակար էր եկեղեցւոյն, ի տունս տունս մտանէր, քարշեալ զարս եւ զկանայս՝ մատնէր ի բանտ։
4Եւ սփռեալքն շրջէին, աւետարանէին զբանն։ 5Իսկ Փիլիպպոս իջեալ ի քաղաքն Սամարացւոց՝ քարոզէր նոցա զՔրիստոս։ 6Ունկն դնէին ժողովուրդքն բանիցն Փիլիպպոսի միաբան՝ ի լսել նոցա եւ ի տեսանել զնշանսն զոր առնէր։ 7Քանզի բազումք որ ունէին զայսս պիղծս՝ աղաղակէին ի ձայն մեծ եւ ելանէին։ 8Եւ բազում անդամալոյծք եւ կաղք բժշկէին. 9եւ եղեւ ուրախութիւն մեծ ի քաղաքին յայնմիկ։ Այր ոմն Սիմովն անուն յառաջագոյն էր ի քաղաքին, մոգէր եւ ապշեցուցանէր զազգն Սամարացւոց, ասել զանձնէ թէ իցէ մեծ ոմն. 10յոր հայէին ամենեքեան ի փոքուէ մինչեւ ի մեծամեծս, եւ ասէին. Սա է զօրութիւն Աստուծոյ որ կոչի մեծ։ 11Հայէին ի նա վասն բազում ժամանակաց մոգութեամբքն ապշեցուցանելոյ զնոսա։ 12Բայց յորժամ հաւատացին Փիլիպպոսի որ աւետարանէր վասն արքայութեանն Աստուծոյ եւ անուանն Յիսուսի Քրիստոսի, մկրտէին ամենեքեան արք եւ կանայք։ 13Այլ եւ ինքն Սիմովն հաւատաց, եւ մկրտեալ կանխէր առ Փիլիպպոս. տեսեալ զնշանսն եւ զմեծամեծ զօրութիւնսն որք լինէին զարմանայր։ 14Իբրեւ լուան որ յԵրուսաղէմ առաքեալքն էին թէ եւ ի Սամարիա ընկալան զբանն Աստուծոյ, առաքեցին առ նոսա զՊետրոս եւ զՅովհաննէս. 15որք իջեալ կացին յաղօթս ի վերայ նոցա, որպէս զի առցեն զՀոգին Սուրբ. 16զի ցայնժամ չեւ եւս էր եւ ոչ ի վերայ միոյ նոցա հասեալ, բայց միայն մկրտեալք էին յանուն Տեառն Յիսուսի։ 17Յայնժամ եդին զձեռս ի վերայ նոցա, եւ առնուին Հոգի Սուրբ։ 18Տեսեալ Սիմովնի թէ ձեռս ի վերայ դնելով առաքելոցն՝ տուեալ լինի Հոգին Սուրբ, մատոյց նոցա ինչս եւ ասէ. 19Տուք եւ ինձ զիշխանութիւնս զայս, զի յոյր վերայ դնիցեմ զձեռս՝ առցէ Հոգի Սուրբ։ 20Եւ Պետրոս ասէ ցնա. Արծաթ քո ընդ քեզ լիցի ի կորուստ, զի զպարգեւսն Աստուծոյ համարեցար ընչիւք ստանալ։ 21Ոչ գոյ քեզ մասն եւ վիճակ ի բանիդ յայդմիկ, քանզի սիրտ քո ոչ է ուղիղ առաջի Աստուծոյ։ 22Ապաշաւեա դու ի չարեացդ քոց յայդցանէ, եւ աղաչեա զՏէր, թերեւս թողութիւն լիցի քեզ ի մեղմեխ խորհրդոց սրտի քո։ 23Քանզի ի դառնութիւն մաղձի եւ ի կնճիռն անիրաւութեան տեսանեմ զքեզ։ 24Պատասխանի ետ Սիմովն եւ ասէ. Աղաչեցէք դուք վասն իմ զՏէր, զի մի՛ ինչ եկեսցէ ի վերայ իմ յորոց դուքդ ասացէք։ 25Եւ նոցա եդեալ վկայութիւն՝ խօսեցան զբանն Աստուծոյ, եւ դարձան յԵրուսաղէմ. եւ ի բազում գեղս Սամարացւոցն աւետարանէին։
ԲԵ.
26Հրեշտակ Տեառն խօսեցաւ առ Փիլիպպոս եւ ասէ. Արի եւ գնա դու ի կողմն հարաւոյ ընդ ճանապարհ որ իջանէ յԵրուսաղեմէ ի Գազա, զի այս է անապատ։ 27Եւ յարեաւ գնաց. եւ ահաւասիկ այր մի Եթէովպացի, ներքինի հզօր Կանդակայ տիկնոջ Եթէովպացւոց, որ էր ի վերայ ամենայն գանձուց նորա. որ եկեալ էր երկիր պագանել յԵրուսաղէմ. 28եւ անդրէն դարձեալ եւ նստեալ ի կառս իւրում՝ ընթեռնոյր զմարգարէն զԵսայի։ 29Ասէ Հոգին ցՓիլիպպոս. Մատիր եւ յարեաց ի կառսդ յայդոսիկ։ 30Եւ ընթացեալ Փիլիպպոս՝ լսէր զի ընթեռնոյր զԵսայի մարգարէ. եւ ասէ. Գիտիցե՞ս արդեւք զոր ընթեռնուցուսդ։ 31Եւ նա ասէ. Զիա՞րդ կարիցեմ, եթէ ոչ ոք առաջնորդեսցէ ինձ։ Եւ աղաչեաց զՓիլիպպոս ելանել նստել ընդ նմա։ 32Եւ գլուխ գրոցն զոր ընթեռնոյր՝ էր այս. Իբրեւ զոչխար ի սպանդ վարեցաւ, եւ իբրեւ զորոջ առաջի կտրչի իւրոյ անմռունչ՝ այնպէս ոչ բանայ զբերան իւր։ 33Ի խոնարհութեան նորա դատաստան նորա բարձաւ, եւ զազգատոհմ նորա ո՞ պատմեսցէ, զի բառնան յերկրէ կեանք նորա։ 34Պատասխանի ետ ներքինին Փիլիպպոսի եւ ասէ. Աղաչեմ զքեզ, վասն ո՞յր ասէ մարգարէն զայս, վասն ի՞ւր եթէ վասն այլոյ ուրուք։ 35Եբաց Փիլիպպոս զբերան իւր, եւ սկսեալ ի գրոցս յայսցանէ՝ աւետարանեաց նմա զՅիսուս։ 36Իբրեւ երթային զճանապարհայն, եկին ի ջուր ինչ, եւ ասէ ներքինին. Ահաւասիկ ջուր, զի՞նչ արգելու զիս ի մկրտելոյ։ 37#8։37 Այս համար պակասէ ի բազումսԵւ ասէ ցնա. Եթէ հաւատաս բոլորով սրտիւ քով, մարթ է։ Պատասխանի ետ եւ ասէ. Հաւատամ եթէ Յիսուս Քրիստոս է Որդի Աստուծոյ։՝՝ 38Եւ հրամայեաց կացուցանել զկառսն. եւ իջին երկոքեան ի ջուրն, Փիլիպպոս եւ ներքինին, եւ մկրտեաց զնա։ 39Եւ իբրեւ ելին ի ջրոյ անտի, #8։39 Բազումք. Հոգի Տեառն յափշտակեացՀոգին Սուրբ եկն ի վերայ ներքինւոյն, եւ հրեշտակ Տեառն յափշտակեաց՝՝ զՓիլիպպոս, եւ ոչ եւս ետես զնա ներքինին, եւ գնայր զճանապարհ իւր ուրախութեամբ։ 40Բայց Փիլիպպոս գտաւ յԱզովտոս. եւ շրջեալ աւետարանէր ամենայն քաղաքացն՝ մինչեւ ի գալ նորա ի Կեսարիա։
Currently Selected:
ԳՈՐԾՔ ԱՌԱՔԵԼՈՑ Գլուխ Ը: ԳՐԲ1895
Highlight
Share
Copy
Want to have your highlights saved across all your devices? Sign up or sign in
Հայաստանի Աստվածաշնչային Ընկերություն, 2018
Bible Society of Armenia, 2018
