ԳՈՐԾՔ ԱՌԱՔԵԼՈՑ Գլուխ ԻԵ
Գլուխ ԻԵ
1 Փեստոս իբրեւ եհաս յիշխանութիւնն, յետ երից աւուրց ել յԵրուսաղէմ ի Կեսարեայ։ 2Եւ զգացուցին նմա #25։2 Ոմանք. քահանայապետնքահանայապետքն եւ գլխաւորք Հրէիցն զՊաւղոսէ, 3եւ աղաչէին խնդրեալ շնորհս ի նմանէ. զի կոչեսցէ զնա յԵրուսաղէմ. դարան գործեալ սպանանել զնա ի ճանապարհի։ 4Իսկ Փեստոս արար պատասխանի պահել զնա ի Կեսարիա, թէ ինքն իսկ ընդ հուպ անդր երթալոց էր։ 5Եւ որ ի ձէնջ կարողքդ իցեն, ասէ, ընդ իս իջցեն, եւ եթէ իցէ ինչ յառնն վնաս, ամբաստան լիցին զնմանէ։ 6Եւ լեալ անդ աւուրս ոչ աւելի քան զութ կամ զտասն, եկն էջ ի Կեսարիա. եւ ի վաղիւ անդր նստեալ յատենի՝ հրամայեաց ածել զՊաւղոս։ 7Եւ իբրեւ եկն, կացին շուրջ զնովաւ որ յԵրուսաղեմէ իջեալ էին Հրեայքն, բազում եւ ծանր վնասս դնէին զորս ոչ կարէին ցուցանել։ 8Քանզի առնէր պատասխանի Պաւղոս եթէ՝ Ոչ յօրէնս Հրէից եւ ոչ ի տաճարն եւ ոչ ի կայսր ինչ վնասակար եմ։ 9Բայց Փեստոս կամեցեալ Հրէիցն շնորհս առնել՝ պատասխանի ետ Պաւղոսի եւ ասէ. Կամի՞ս յԵրուսաղէմ ելանել, եւ անդ վասն դոցին իրաց դատել առաջի իմ։ 10Եւ ասէ Պաւղոս. Յատենի կայսեր հասեալ կամ ուր պարտ է ինձ դատել. Հրէից ինչ չեմ վնասակար, որպէս եւ դու իսկ քաջ գիտես։ 11Ապա եթէ վնասակար իցեմ եւ արժանի ինչ մահու գործեցի, ոչ զանգիտեմ ի մեռանելոյ. իսկ եթէ ոչ ինչ իցէ զորոց սոքա ամբաստան լինին զինէն, ոչ ոք կարէ զիս դոցա շնորհել. ի կայսր բողոքեմ։ 12Յայնժամ Փեստոսի խօսեցեալ ընդ խորհրդակցին՝ արար պատասխանի. Ի կայսր բողոքեցեր, առ կայսր երթիջիր։
ԷԳ.
13Իբրեւ անցին աւուրք ինչ, Ագրիպպաս արքայ եւ Բերինիկէ եկին ի Կեսարիա յողջոյն Փեստոսի։ 14Եւ իբրեւ աւուրս բազումս հանէին անդ, Փեստոս զեկոյց արքայի զՊաւղոսէ եւ ասէ. Այր մի է աստ մնացեալ կապեալ ի Փելիքսէ։ 15Վասն որոյ իբրեւ չոգայ յԵրուսաղէմ, զգացուցին ինձ քահանայապետքն եւ գլխաւորք Հրէիցն, խնդրէին յինէն առնել նմա պատուհաս։ 16Որոց ետու պատասխանի եթէ՝ Չէ օրէն Հռովմայեցւոց շնորհել ումեք #25։16 Ոմանք. զոք ի սատակումնզոք, մինչչեւ ամբաստանեալն յանդիման ունիցի զդատախազսն, եւ տեղի պատասխանւոյ առնուցու վասն ամբաստանութեանն։ 17Եւ իբրեւ եկին այսր, ոչինչ յապաղեցի, այլ ի վաղիւն նստեալ յատենի՝ հրամայեցի ածել զայրն։ 18Վասն որոյ մատուցեալ ամբաստանքն եւ ոչ մի ինչ վնաս չարութեան ի մէջ բերէին զորոց եսն կարծէի. 19բայց խնդիրս ինչ որ վասն իւրեանց պաշտաման ունէին ընդ նմա, եւ վասն Յիսուսի որումն մեռելոյ, զորմէ ասէր Պաւղոս թէ կենդանի է։ 20Իբրեւ յանհնարս մտի վասն այսպիսի իրաց քննութեան, ասեմ եթէ կամիցի՞ երթալ յԵրուսաղէմ, եւ անդ դատել վասն նոցին իրաց։ 21Բայց ի Պաւղոսի բողոքելն զի պահեսցի ի Քաջի արանցն յանդիմանութիւն, հրամայեցի պահել զնա՝ մինչեւ տաց տանել առ կայսր։ 22Ագրիպպաս ցՓեստոս ասէ. Կամէի եւ ես լսել առնն։ Եւ նա ասէ. Ի վաղիւ լուիցես։
23Եւ ի վաղիւ անդր իբրեւ եկն Ագրիպպաս եւ Բերինիկէ բազում երեւելի սպասուք, եւ մտին յատեանն հանդերձ հազարապետօքն եւ արամբք պատուականօք քաղաքին. եւ հրամայեալ Փեստոսի՝ ածին զՊաւղոս։ 24Եւ ասէ Փեստոս. Արքայ Ագրիպպա, եւ ամենայն արք որք ընդ մեզ էք, տեսանէ՞ք զսա. վասն սորա ամենայն ժողովք Հրէից ամբաստան եղեն ինձ յԵրուսաղէմ եւ աստ, աղաղակէին թէ՝ Չէ պարտ դմա կեալ։ 25Բայց ես ի վերայ հասի թէ ոչինչ է դորա արժանի մահու գործեալ, եւ դորա ինքնին բողոք կալեալ առ Քաջ արանցն, խորհեցայ յղել։ 26Վասն որոյ ստուգութեամբ ինչ գրել տեառն իմում ոչ ունիմ. վասն այնորիկ ածի զդա առաջի ձեր, եւ մանաւանդ առաջի քո, արքայ Ագրիպպա, որպէս զի վերստին քննեալ՝ մարթացից ինչ գրել։ 27Քանզի անպատեհ իմն թուի ինձ տալ տանել կապեալ մի, եւ ոչինչ վնաս զնմանէ նշանակել։
Currently Selected:
ԳՈՐԾՔ ԱՌԱՔԵԼՈՑ Գլուխ ԻԵ: ԳՐԲ1895
Highlight
Share
Copy
Want to have your highlights saved across all your devices? Sign up or sign in
Հայաստանի Աստվածաշնչային Ընկերություն, 2018
Bible Society of Armenia, 2018
