ԳՈՐԾՔ ԱՌԱՔԵԼՈՑ Գլուխ ԺԳ

Գլուխ ԺԳ

1 Էին ոմանք յԱնտիոք ըստ եկեղեցւոյն մարգարէք եւ վարդապետք, Բառնաբաս եւ Շմաւոն կոչեցեալն Նիւգէր, եւ Ղուկիոս Կիւրենացի եւ Մանայեն դայեկորդի Հերովդի չորրորդապետի, եւ Սաւղոս։ 2Մինչդեռ ի պաշտաման Տեառն կային եւ պահէին, ասէ Հոգին Սուրբ. Որոշեցէք ինձ զԲառնաբաս եւ զՍաւղոս ի գործ յոր կոչեցեալ է իմ զդոսա։ 3Յայնժամ պահեալ եւ աղօթս արարեալ եդին զձեռս ի վերայ նոցա եւ արձակեցին։

4Եւ նոքա առաքեալք ի Հոգւոյն Սրբոյ՝ իջին ի Սելեւկիա, եւ անտի նաւեցին ի Կիպրոս։ 5Եւ հասեալ ի Սաղամինա պատմէին զբանն Աստուծոյ ի ժողովուրդս Հրէիցն. ունէին եւ զՅովհաննէս պաշտօնեայ։ 6Շրջեալ ընդ ամենայն կղզին մինչեւ ի Պափոս, գտին անդ այր զոմն մոգ սուտ մարգարէ Հրեայ, որում անուն էր Բարեյեսու. 7որ էր ընդ փոխանակի բդեշխին Սերգեայ Պաւղոսի, առն իմաստնոյ. նորա աղաչեալ զԲառնաբաս եւ զՍաւղոս խնդրէր լսել զբանն Աստուծոյ։ 8Ընդդէմ եկաց նոցա Եղիմաս մոգ, քանզի այսպէս թարգմանի անուն նորա. խնդրէր շրջել զփոխանակ բդեշխին ի հաւատոց։ 9Իսկ Սաւղոս որ եւ Պաւղոսն՝ լցեալ Հոգւով Սրբով հայեցաւ ի նա, 10եւ ասէ. Ով լի ամենայն նենգութեամբ եւ խորամանկութեամբ, որդի Սատանայի, թշնամի ամենայն արդարութեան, ո՞չ լռես ի թիւրելոյ զճանապարհս Տեառն զուղիղս։ 11Եւ արդ՝ ահա ձեռն Տեառն ի վերայ քո, եւ եղիցես կոյր՝ չտեսանել զարեւ մինչեւ ի ժամանակ մի։ Եւ անդէն անկաւ ի վերայ նորա մէգ եւ խաւար, եւ շրջեալ խնդրէր առաջնորդս։ 12Յայնժամ տեսեալ փոխանակի բդեշխին զիրսն որ եղեն՝ հաւատաց, զարմացեալ ընդ վարդապետութիւնն Տեառն։

13Եւ ամբարձեալ ի Պափեայ Պաւղոսեանց՝ եկին ի Պերգէ Պամփիւլեայ. Յովհաննէս մեկնեալ ի նոցանէ՝ դարձաւ յԵրուսաղէմ։ 14Եւ նոքա գնացեալ ի Պերգեայ՝ եկին յԱնտիոք Պիսիդեայ. եւ մտեալ ի ժողովուրդն յաւուր շաբաթու՝ նստան։ 15Եւ յետ ընթեռնլոյ զօրէնսն եւ զմարգարէս, առաքեցին առ նոսա ժողովրդապետքն եւ ասեն. Արք եղբարք, եթէ իցեն ի ձեզ բանք մխիթարութեան առ ժողովուրդդ, խօսեցարուք։

ԳԷ.

16Յոտն եկաց Պաւղոս շարժեաց զձեռն իւր եւ ասէ. Արք Իսրայելացիք եւ ոյք երկնչիք յԱստուծոյ, լուարուք։ 17Աստուած ժողովրդեանս այսորիկ Իսրայելի ընտրեաց զհարսն մեր, եւ զժողովուրդն բարձրացոյց ի պանդխտութեան յերկրին Եգիպտացւոց, եւ ի բազուկ բարձր եհան զնոսա անտի։ 18Եւ իբրեւ քառասնամեայ ժամանակ կերակրեաց զնոսա յանապատի։ 19Եւ քակեալ ազգս եւթն յերկրին Քանանու՝ ժառանգեցոյց նոցա զերկիր #13։19 Ոմանք. նոցա։ (20) Եւ յետ այսորիկ իբրեւ ամս չորեքհարիւր եւ յիսուննոցա իբրեւ ամս չորեքհարիւր եւ յիսուն։ 20Եւ յետ այսորիկ՝՝ ետ նոցա դատաւորս մինչեւ ի Սամուէլ մարգարէ։ 21Եւ անտի յառաջ խնդրեցին թագաւոր, եւ ետ նոցա Աստուած զՍաւուղ որդի Կիսեայ՝ այր յազգէ Բենիամինի ամս քառասուն։ 22Եւ իբրեւ փոխեաց զնա, յարոյց նոցա զԴաւիթ թագաւոր, որում եւ ասաց վկայութեամբ. Գտի զԴաւիթ որդի Յեսսեայ այր ըստ սրտի իմում, որ արասցէ զամենայն զկամս իմ։ 23Ի սորա զաւակէ Աստուած ըստ աւետեացն յարոյց Իսրայելի զՓրկիչն Յիսուս. 24ըստ յառաջագոյն քարոզութեանն Յովհաննու առաջի երեսաց մտի նորա մկրտութիւն ապաշխարութեան ամենայն ժողովրդեանն Իսրայելի։ 25Եւ իբրեւ լնոյր Յովհաննէս զընթացսն, ասէր. Զո՞ ոք կարծէք զինէն թէ իցեմ. չեմ ես այն. այլ ահա գայ զկնի իմ, որում չեմ արժանի զկօշիկս ոտիցն լուծանել։ 26Արք եղբարք, որդիք Աբրահամեան տոհմին, եւ որ ի ձեզ երկիւղածք իցեն յԱստուծոյ. ձեզ բանս այս փրկութեան առաքեցաւ։ 27Բայց որ բնակեալ են յԵրուսաղէմ, եւ իշխանք նոցա անծանօթ եղեն ի նմանէ, եւ #13։27 Յոյնն. ի բարբառոյըստ բարբառոյ՝՝ մարգարէիցն, որ զամենայն շաբաթսն ընթեռնուին, դատեալ կատարեցին. 28եւ ոչ մի ինչ պատճառս մահու գտեալ՝ խնդրեցին ի Պիղատոսէ սպանանել զնա։ 29Եւ իբրեւ կատարեցին զամենայն որ վասն նորա գրեալ էր՝ իջուցեալ ի փայտէն եդին ի գերեզմանի։ 30Այլ Աստուած յարոյց զնա ի մեռելոց. որ երեւեցաւ աւուրբք բազմօք այնոցիկ 31որ ելեալ էին ընդ նմա ի Գալիլէէ յԵրուսաղէմ. որք եւ արդ իսկ վկայք են նորա առ ժողովուրդն։ 32Եւ մեք ձեզ աւետարանեմք զխոստումն որ առ հարսն եղեալ էր։ 33Զի զնոյն Աստուած կատարեաց առ մեզ որդիս նոցա՝ յարուցեալ զՅիսուս, որպէս եւ ի Սաղմոսին գրեալ է յերկրորդում. Որդի իմ ես դու, եւ ես այսօր ծնայ զքեզ։ 34Եւ զի յարոյց զնա ի մեռելոց, եւ ոչ եւս դառնալոց է յապականութիւն, այսպէս ասէ թէ՝ Տաց ձեզ զսրբութիւնսն Դաւթի զհաւատարիմս։ 35Քանզի եւ ի միւսումն ասէ. Ոչ տացես Սրբոյ քում տեսանել զապականութիւն։ 36Այլ Դաւիթ յազգի անդ իւրում պաշտեաց եւ ի կամս Աստուծոյ ննջեաց, եւ յաւելաւ առ հարս իւր եւ ետես զապականութիւն։ 37Բայց զոր Աստուած յարոյց՝ ոչ ետես զապականութիւն։ 38Յայտնի լիցի ձեզ, արք եղբարք, զի սովաւ ձեզ թողութիւն մեղաց աւետարանի. 39եւ յամենայնէ յորմէ ոչ կարացէք օրինօքն Մովսիսի արդարանալ՝ սովաւ ամենայն որ հաւատայ արդարանայ։ 40Զգոյշ կացէք, գուցէ եկեսցէ ի վերայ ձեր որ ասացեալն է ի մարգարէս. 41Տեսէք, արհամարհոտք, եւ զարմացարուք եւ եղծարուք, զի գործ մի գործեմ ես յաւուրս ձեր, գործ՝ որում ոչ հաւատայցէք, եթէ ոք պատմեսցէ ձեզ։

42Եւ իբրեւ ելին անտի, աղաչէին ի միւսում շաբաթու խօսել նոցա զնոյն բանս։ 43Եւ իբրեւ արձակեցաւ ժողովուրդն, զհետ երթային բազումք ի Հրէից անտի եւ ի պաշտօնէիցն եկամտից զՊաւղոսի եւ զԲառնաբայ. որք խօսէին ընդ նոսա, եւ հաւանեցուցանէին զնոսա կալ մնալ ի շնորհսն Աստուծոյ։

ԴԱ.

44Եւ ի գալ միւսոյ շաբաթուն, գրեթէ ամենայն քաղաքն ժողովեցաւ լսել զբանն Աստուծոյ։ 45Իբրեւ տեսին Հրեայքն զամբոխն՝ լցան նախանձու, եւ ընդդէմ դարձեալ ասացելոցն ի Պաւղոսէ՝ հայհոյէին։ 46Համարձակեալ Պաւղոսի եւ Բառնաբայ՝ ասէին. Առ ձեզ նախ պարտ էր խօսել զբանն Աստուծոյ. եւ քանզի դուք մերժէք զնա, եւ ոչ արժանիս համարիք զձեզ կենացն յաւիտենականաց, ահաւասիկ դառնամք ի հեթանոսս։ 47Զի այսպէս պատուիրեաց մեզ Տէր. Եդի զքեզ ի լոյս հեթանոսաց՝ լինել քեզ ի փրկութիւն մինչեւ ի ծագս երկրի։ 48Զայս լուեալ հեթանոսացն ուրախ լինէին, եւ փառաւոր առնէին զբանն Տեառն. եւ հաւատացին որք էին կարգեալ ի կեանսն յաւիտենականս։ 49Եւ շրջէր բանն Աստուծոյ ընդ ամենայն գաւառն։ 50Բայց Հրեայքն գրգռեցին զպաշտօնեայ կանայս զգաստս, եւ զգլխաւորս քաղաքին, եւ յարուցեալ հալածանս ի վերայ Պաւղոսի եւ Բառնաբայ՝ հանին զնոսա ի սահմանացն իւրեանց։ 51Եւ նոցա թօթափեալ զփոշի ոտից ի վերայ նոցա, եկին յԻկոնիոն։ 52Եւ աշակերտքն լնուին խնդութեամբ եւ Հոգւով Սրբով։

Currently Selected:

ԳՈՐԾՔ ԱՌԱՔԵԼՈՑ Գլուխ ԺԳ: ԳՐԲ1895

Highlight

Copy