ԱՌ ԹԵՍԱՂՈՆԻԿԵՑԻՍ ԱՌԱՋԻՆ ԹՈՒՂԹ Գլուխ Ե
Գլուխ Ե
ԳԴ.
1Այլ վասն ժամուց եւ ժամանակաց, եղբարք, չէ ինչ պիտոյ գրել առ ձեզ. 2զի դուք ինքնին իսկ ստոյգ գիտէք, թէ օրն Տեառն իբրեւ զգող գիշերի՝ այնպէս հասանէ։ 3Յորժամ ասիցեն թէ խաղաղութիւն եւ շինութիւն է, յայնժամ յանկարծակի հասցէ նոցա սատակումն, որպէս երկն յղւոյ, եւ մի՛ ապրեսցեն։ 4Այլ դուք, եղբարք, ոչ էք ի խաւարի թէ օրն ձեր իբրեւ զգող ի վերայ հասանիցէ. 5զի ամենեքին դուք որդիք լուսոյ էք եւ որդիք տուընջեան. չեմք գիշերոյ, չեմք խաւարի։ 6Ապա մի՛ զքնով անկանիցիմք որպէս եւ այլքն, այլ արթունք եւ զուարթունք եղիցուք։ 7Զի որ ննջենն՝ գիշերի ննջեն, եւ որ արբենանն՝ գիշերի արբենան։ 8Այլ մեք զի տուընջեան եմք, արթունք եղիցուք, եւ զգեցցուք զզրահսն հաւատոյ եւ զսիրոյ, եւ դիցուք զսաղաւարտն յուսոյն փրկութեան։ 9Զի ոչ եդ զմեզ Աստուած ի բարկութիւն, այլ ի փրկութիւն կենդանութեան ի ձեռն Տեառն մերոյ Յիսուսի Քրիստոսի, 10որ մեռաւն վասն մեր. զի եթէ՛ արթունք իցեմք եւ եթէ՛ ննջիցեմք, նովաւ հանդերձ կեցցուք։ 11Վասն որոյ մխիթարեցէք զմիմեանս եւ շինեցէք զիրեարս, որպէս եւ առնէքդ իսկ։
ԳԶ.
12Աղաչեմ զձեզ, եղբարք, ճանաչել զվաստակաւորս եւ զվերակացուս ձեր ի Տէր, եւ զխրատիչս ձեր. 13եւ համարեցարուք զնոսա արժանիս առաւել սիրոյ վասն գործոյ նոցա. խաղաղութիւն արարէք ընդ միմեանս. 14աղաչեմք զձեզ, եղբարք, խրատեցէք զստահակս, մխիթարեցէք զկարճամիտս, պատսպարան լերուք տկարաց, երկայնամիտ լերուք առ ամենեսին։ 15Զգոյշ լերուք գուցէ ոք չարի չար հատուցանիցէ. այլ յամենայն ժամ զբարեաց զհետ երթայք առ միմեանս եւ առ ամենեսին։ 16Յամենայն ժամ ուրախ լերուք։ 17Անդադար աղօթս արարէք։ 18Յամենայնի գոհացարուք, զի այս են կամք Աստուծոյ Քրիստոսիւ Յիսուսիւ ի ձեզ։ 19ԶՀոգին մի՛ շիջուցանէք։ 20Զմարգարէութիւնս մի՛ արհամարհէք։ 21Զամենայն ինչ փորձեցէք, զբարին ընկալարուք։ 22Յամենայն իրաց չարաց ի բաց կացէք։ 23Եւ ինքն Աստուած խաղաղութեան սուրբս արասցէ զձեզ համօրէնս. եւ բովանդակ ձեր ոգի եւ շունչ եւ մարմին անարատ ի գալուստ Տեառն մերոյ Յիսուսի Քրիստոսի պահեսցի։ 24Հաւատարիմ է որ կոչեացն զձեզ, որ եւ արասցէ զնոյն։
25Եղբարք, աղօթս արարէք եւ ի մեր վերայ։ 26Ողջոյն տաջիք եղբարց ամենեցուն ի համբոյր սրբութեան։ 27Երդմնեցուցանեմ զձեզ ի Տէր ընթեռնուլ զթուղթդ առաջի ամենայն եղբարց սրբոց։ 28Շնորհք Տեառն մերոյ Յիսուսի Քիստոսի ընդ ձեզ#5։28 Ոմանք յաւելուն. Ամէն։։
Առ Թեսաղոնիկեցիս առաջին թուղթ գրեցաւ յԱթենայ։
Currently Selected:
ԱՌ ԹԵՍԱՂՈՆԻԿԵՑԻՍ ԱՌԱՋԻՆ ԹՈՒՂԹ Գլուխ Ե: ԳՐԲ1895
Highlight
Share
Copy
Want to have your highlights saved across all your devices? Sign up or sign in
Հայաստանի Աստվածաշնչային Ընկերություն, 2018
Bible Society of Armenia, 2018
