ETIRU 9
9
Da tau Yahundi da-tumbaru-ha da muhuda
1La hupu njàpuna toma-naka na tànggalu hakambulu tailu wulangu Andaru, na lodu pa-kawuku la pa-pahàra-nya na pareta hanganji la tau Yahundi. Na lodu nuna nedida-padua-nya paraï da muhu tau Yahundi la pabera-ha da tau Yahundi. Tàka hi tau Yahundi bia-i mabera-ha nyuda. 2La hau parai - hau paraingu da-pauhi kahau etingu da tau Yahundi la pa-hànjalu-ha mbuu ndàbada da tau mawuku-ya na hanggàmaru-da. Na banjaru la nggi - nggini da-mangàdatu-nja hi nda haàtu matoru mbeni pa-tumbaru-ha. 3Mbuu ndàba da tau bokulu la porupinihu, da nggumbunuru, da mbupati dàngu da ma-pangaba la pareta dandula-ha da tau Yahundi, ba da-mangàdatu ndàbanya i Morundikaï. 4La nggubulu tana pareta napinya tau ba dira pangaru-ya i Morundikaï dàngu ba hama huka bonjangu-na na kawaha-na. 5Tuna nuduka hi dawàngu eti da tau Yahundi la muhuda, da-hànjalu-nja hapanda hi da-pameti-ha.
6La Huhàngu na parai puhu pareta, tau lima ngahuya na pa-pameti tau Yahundi. 7-10La hongada, hakambulu-ha da anana i Hamàngu na anana i Hamandata, na muhu bokulu tau Yahundi. Nyuda nuda jiaha: i Pàruhandata, i Ndàlupungu, i Àhapata, i Porata, i Andàluya, i Arindata, i Pàramàtahu, i Arihai, i Arindai dàngu i Waihata. Tàka da tau Yahundi nda da-rambangu-a banda.
11La lodu numa napanii-nya tau na hanganji, na danguna na tau pa-pameti la Huhàngu. 12Tàka na hanganji napanii-nya i Etiru, “La Huhàngu jua-a tau lima ngahuya na pa-pameti tau Yahundi, papohu-nja da hakambulu anana i Hamàngu. Rihi-amaka la porupini - porupinihu! Jàka nggi tu bia-naka na pawunda-da lai nu! Màla, nggàra-yaipa nàhu na pakarai-mu? Panii biaya, lupangu-ma ungalanya!” wànanya.
13Nahema i Etiru, “Jiaya jàka wàmu tamu umbu, ka pahia-kinja làti da tau Yahundi la Huhàngu haromu la mbaru pahili belinya na pawunda-da la lodu nàhu. Dàngu nu da metida da anana i Hamàngu ka tiwalu-nja la ai tiwalu,” wàna. 14Tàka na hanganji na-wuangu pareta pa-pahàra-nya na pakarai-na i Etiru; hi paluhu-ya na huratu pareta ndumana la Huhàngu dàngu da metida da hakambulu anana i Hamàngu hi tiwalu-nja la ai tiwalu. 15Tu dunaka la tànggalu hakambulu patu wulangu Andaru dahili pauhi da tau Yahundi la Huhàngu hi dahili pameti tau tailu ngahu la paraingu nuna. La rehi nu nda ana nggàrambu paramba-da.
16Da tau Yahundi la porupini - porupinihu da-pauhi-mbu hi dambeni torungu. Dabera-ha da muhuda hi da-pameti 75.000-ya na tau ma-karaü-nja eti. Tàka nda nggàra-a paramba-da. 17Nuna nu na-hàrangu la tànggalu hakambulu tailu wulangu Andaru. Hadangu harii, la tànggalu hakambulu patu, nda ningua pa-pameti-da, tàka dambabu mbaha etinya na lodu nuna. 18Tàka da tau Yahundi la Huhàngu dambabu-nya na tànggalu hakambulu lima, lodu bokulu-ya ba wàda, ba mbàda pameti-da muhu la tànggalu hakambulu tailu dàngu hakambulu patu, hi da-pànjangu la tànggalu hakambulu lima. 19Tuna nuduka da tau Yahundi la parai - paraingu makudu da-pangàda-nya na tànggalu hakambulu patu wulangu Andaru ba lodu mbaha etiya, lodu mbabu hawola ba da-maràngga pa-wuangu ngara pangangu.
Na mbabunya na lodu Purimu
20Hàlaka nu i Morundikaï natuha la huratu nuda da matumbu-ka hi na-pangàndingu huratu la mbuu ndàba tau Yahundi la nggubulu tana pareta Perihia la mamarau dàngu la ma-mareni. 21Na ihi huratu, jiaya na pareta ka mbabunya na tànggalu hakambulu patu dàngu hakambulu lima wulangu Andaru nimbihu ndaungu. 22Ba la lodu nudadu dabera-ha da muhuda, hi lupa na-pambeli-ya hawola dàngu hamemu, na hawina dàngu na mayila-da. Tuna nuduka hi lupa dambabu-nja da lodu nuda wàngu remi dàngu ngaa pa-mbabungu dàngu da-maràngga pa-wuangu pangangu dàngu da-paberingu hunggu la tau mila. 23Da tau Yahundi danunju-ya na pareta-na i Morundikaï, tuna nuduka na mbabu nuna hi kàli wànya hau ndau - hau ndaungu.
Na ihi dànggitu-na
24I Hamàngu anana i Hamandata, ana umbuku-na i Anggàku, na muhu bokulu tau Yahundi, mbàda tungu-naka undi na “purimu” ba wàda-mbunya la pa-kawuku-ya na lodu hambàli-ya na tau Yahundi; mbàda lakunda-mana-nyaka ka pamànji-ha. 25Tàka i Etiru nalua la hanganji, hi na-wuangu pareta pa-tulihu na hanganji, hi lupa na wulu aka akatu-na i Hamàngu, nanggàna niya na wikina nyuna, hi kiri tiwalu-nja, nyuna dàngu da anana la ai tiwalu. 26Tuna nuduka da lodu bokulu nuda Purimu hi wàdanya. Na huratu-na i Morundikaï dàngu mbuu ndàbana na pahunggu ràngga nauna na tau Yahundi, 27na-pawiti-nya hi kiri tuda kalaratu nduma wikida, nduma ana umbuku-da dàngu nduma mbuu ndàbana na matama pa-Yahundi. Pa-namatu-nya na kalaratu nuna nimbihu ndaungu lupangu-ma dambabu-nja da dàmbu lodu nuda da pa-kawuku-na i Morundikaï. 28Pa-kawuku-mbuya, da lodu Purimu nuda ba lupangu-ma da-pangàda-nja dàngu dambabu-nja paraï da tau Yahundi-ka la handidiku-handalaru lundu nu - nu, la nimbihu porupinihu dàngu paraingu.
29La perana nuna, karia-na na huratu-na i Morundikaï, i Tamu Ràmbu Etiru anana i Ambihaïlu na-tulihu huratu padua mbàla wàna, ma-pakaràngi-ya na huratu-na i Morundikaï rukuna na Purimu. 30Na huratu nuna pa-pangàndingu-ya la mbuu ndàba tau Yahundi, tàka na haleli-na, pa-pangàndingu-ya la 127 porupinihu tana pareta Perihia. Na huratu nuna pa-kariangu lii hamayangu, ka pa-daingu mambiru dàngu mandangu-na na tau Yahundi. 31Na huratu nuna na-kamahi-mbunja nyuda dàngu da ana umbuku-da ka da-pangàda-nja da lodu Purimu la loduna, hama tuna ba da-pangàda-nya na rehi puaha dàngu na rehi handuka-da. Nuna duyaka na ihi huratu-na i Morundikaï dàngu i Tamu Ràmbu Etiru. 32Na lii pareta-na i Etiru na ma-kawuku-ha da kalaratu Purimu, pa-tulihu-ya la mbuku.
Currently Selected:
ETIRU 9: KAM
Highlight
Copy
Compare
Share
Want to have your highlights saved across all your devices? Sign up or sign in
@LAI 1995 Indonesian Bible Society (Lembaga Alkitab Indonesia)