2 HAMUILU 2
2
Ba wotuya i Ndautu la pa-hanganji Yahunda
1Hàlaka nu paàrangu-nanyaka i Ndautu lai MIRI, “Màla MIRI pekuna wàmu nu ka kulaku pa-kuaha-ya na hau na paraingu la Yahunda?” wàna.
“Wua,” hi wàna i MIRI.
“Nggi paraingu-yaka nu?” hi wàna i Ndautu.
“La Hemburungu,” hi wàna i MIRI. 2Ka laku-nanyaka i Ndautu la Hemburungu da-kariangu dàngu da papaha-na ba dadua: i Ahinuamu welingu la Yihireyilu, dàngu i Ambinggaïlu, kawini Kàramilu na pameti wàruna i Nambàlu. 3Tumanai da tau la wawana dàngu kuru umada haàtu - haàtu dakiku hàlanya i Ndautu, hàla pa-engangu-danyaka la Hemburungu dàngu la winggiru-na. 4Tunaka nu da tau Yahunda mai hàla-danyaka la Hemburungu, hi da-katua-ya i Ndautu la pa-hanganji la Yahunda.
Ba narongu-ka i Ndautu da tau Yambihu la Nggiliatu ba dahàla-ka patani-nya i Haulu, 5palewa-nanjaka tau pa-patàka-nja panii, “Mili àru i MIRI ka na-pakanyuru-nggai, nadu nyimi bai pa-itangu-ka tuturu-mi la hanganji-mi bai paloku-ya na metina la patani-nya. 6Jia ba tuna, mili àruki i MIRI ka na-paita-nggai mila etina dàngu tuturu-na lai nyimi. Nyunggambu napa kupali-manggai duku mahàmu ruku ba timi nu. 7Pa-màndungu etimi dàngu pa-luangu-wa limami ba mini mbeni hanggangu-kai! Deningu-mana ba mbàda meti-naka i Haulu na hanganji-mi, tàka na nyuna mbàda katua-danggaka paraï tau Yahunda la pa-hanganji-nja nyuda,” wànanja.
Ba pa-hanganji-ya i Ihimbohitu la Ihirailu
8Na ngora pabera tanatara-na i Haulu, nu i Àpuneru anana i Neru, napalai karia-nya i Ihimbohitu, anana i Haulu la Mahanaïmu la hapapa Luku Yorundangu. 9Lai nu i Àpuneru nawotu-ya i Ihimbohitu la pa-hanganji la ngaba Nggiliatu, Ahiyuri,#Ahiyuri: la Huratu Matua Imbarani, Ahiyuri ba wàna jiaya na Ahiria. Yihireyilu, Epuraïmu dàngu Mbanyamingu, màlamai la nggubulu Ihirailu. 10I Ihimbohitu mbàda patu kambulu ndaunaka na lurina ba tuya hanganji la Ihirailu, dàmbu ndauna ba na-pareta.
Tàka na kabihu Yahunda daingu tuturu-mada lai Ndautu, 11tàka i Ndautu na-pareta-ya la Yahunda, pihu ha-kawita mbua ndauna la Hemburungu.
Na pabera-na na Ihirailu dàngu na Yahunda
12La hau na lodu i Àpuneru nalua welingu la Mahanaïmu la paraingu Nggimbiungu, da-karia-nya tau la wawana i Ihimbohitu. 13I Yuàpu, (na inana Haruya-ya na tamuna) dàngu da tau la wawana i Ndautu, lua-madanyai duda lai nu. Ka pa-hanggangu-danyaka nu da dua juruda ma-papapangu la tàma la Nggimbiungu. I Àpuneru dàngu karia-na mandapu-danya mbara yiahu, i Yuàpu dàngu karia-na mbara papaha. 14Ka panii-nanyaka i Àpuneru lai Yuàpu, “Màla ka ta-pahuhuku-nja da tau la wawanda ka da-pararingu!” wàna.
“Hàmudu” wàna i Yuàpu.
15Ka hurungu-danyaka da tau hakambulu madua welingu la kabihu Mbanyamingu huruna i Ihimbohitu, dàngu tau hakambulu madua welingu la tau la wawana i Ndautu. 16Ka kawàra pa-hambitu-danyaka lunggi papada, hàla hi da-kawàra pahunju weli kambungu, ka maràngga meti-danyaka. Jia-duyaka na pa-ngiangu nuna la Nggimbiungu la “Woka Hapanda,” hi wàdanya.
17Hàlaka tumbu-nanyaka na pa-kangaburungu-da na mambàringu, i Àpuneru dàngu da tanatara Ihirailu da-pakàku-ha paraï da tau la wawana i Ndautu. 18Ni hàla-manja lai nu ba tau madua haàtu-ha da anana i Haruya, nu i Yuàpu, i Ambihai dàngu i Ahailu. I Ahailu na palaina hama palai bai hawurungu-ya, 19ka nutaku-nanyaka pakeha-nya i Àpuneru. 20I Àpuneru na-nggilaku la kajia hi na-paàra-nya, “Jiakau na Ahailu?” wànanya.
“Wua,” wàna ba nahema.
21“Àmbu yaulu-duka!” wàna i Àpuneru. “Kamangu làti kau yàpa ningu bia haàtu panjuri kau pitiha da madàka-na!” wànanya. Tàka i Ahailu yaulu pangala-mananya. 22Nahilu panii i Àpuneru handàkangu lai Ahailu, “Àmbu yauluka! Napa ku-pameti lera-dunggau. Hàla nggikina wàngguka ba kuita mataya i Yuàpu na ayamu?” wànanya. 23Tàka ba pa-daingu nda bihu-mana pa-pànjangu i Ahailu, ka tungu handalurungu-nanyaka#Talànga wanguna na-njenjangu ningu-mapa: tungu handalurungu-nanyaka. i Àpuneru, hi nanggàna weli kambuya i Ahailu hi lupa nalumbu làpahu na nimbu la kajia-na. Ka nggubalu wàna-ma-duaka i Ahailu, nameti memangu-ma lai nu. Mbuu ndàbana na tau na matàka lai nu la ngia pa-tanulahu-na, na-ndaudaku hàla lai nu.
24Tàka i Yuàpu dàngu i Ambihai pangalangu-madanya payaulu-ya i Àpuneru. Ba natama-ka na lodu, tàka-danyaka la Tandula Ama, la pahunga loduna la Nggia, la tuba maràda telangu Nggimbiungu. 25Lai nu da tau la kabihu Mbanyamingu pa-pohungu beli-danyaka dàngu i Àpuneru, hàla da-wandalu-ha da pambada la pinu hau tandula. 26Welingu lai nu wara-nanyaka i Àpuneru lai Yuàpu, “Màla nu ta-pakangaburu pangalangu-maka bàdi? Ndau pàda-anya dumu na pabera yiana ba ngàndi-nanya mapuri mapaita? Nyuma yia angu dedimi-nggama, angu tana parainda, angu luku mananga-nda. Pirangu-mapa nu bau patiangu, hiu mangu pawua-nja pareta da tau la wawamu ka da-pànjangu payaulu-kama?” wànanya.
27Nahema i Yuàpu, “Parongu-na i MIRI na maluri, làti jàka nda nyumu ma-mangilu ngarumu, jiangu-ma duna làti da tau la wawanggu ba dayaulu pangala-nggai lundu haromu la mbaru,” wàna. 28Hàla i Yuàpu hapii-nanyaka na taropitu ba jiaya na tanda ndumada da tau la wawana ka da-pànjangu payaulu-ha da tau Ihirailu, ka pànjangu-danyaka pa-kangaburungu.
29I Àpuneru dàngu da tau la wawana maru - rudungu-da ba dali ningu la Lolangu Yorundangu, hàla hi dapala-ya na Luku Yorundangu, tàka ba dalaku pangalangu-ka la lodu haromu-na tàka-danyaka la Mahanaïmu.
30Ba na-pànjangu-ka nu i Yuàpu pa-nutaku-ya i Àpuneru, pauhi hàla-nanjaka da tau la wawana. Pi-nanjaka ba tau hakambulu mahiwa-ha da ma-maromba, hinggilu-na i Ahailu. 31Da tau la wawana i Yuàpu mbàda tau 360-haka da tau la pambana i Àpuneru welingu la kabihu Mbanyamingu da pa-pameti-da. 32Hàlaka nu i Yuàpu dàngu da tau la wawana hi dadanda-nya na metina i Ahailu hi datani-nya la reti hapa-kalembi-da la Mbetulehimu. Ka laku maru - rudungu-danyaka hi lupa datàka la Hemburungu la mbaru hada rudungu.
Currently Selected:
2 HAMUILU 2: KAM
Highlight
Copy
Compare
Share
Want to have your highlights saved across all your devices? Sign up or sign in
@LAI 1995 Indonesian Bible Society (Lembaga Alkitab Indonesia)