Bilangan 10
10
Trompet pam iak inghasuam, togulom wene
1At Allah en Musa mo’guleselat,
2“Is Israel a’ge worlontogulat, ebela lo a’ge paget mo’gulontogulat, til laga lemagoluk, Besi perak a’ge sogou-segai takpoluk, iak loksogo ing hogulom a’ge trompet ’biren hele’gip o. 3Hele’gik poluk, trompet ’biren eriano a’ge pam iak inghogwiam e, is Israel a’ge ’berlegat an nemin hwedik togumu nowi sabo werik a’ge ’godukmu hat heragam odoktu agalat, 4ye, trompet mesik pam iak inghasuam e, is Israel odoktak ’gwelagentarok welagai a’ge onuelak ebano hat oruakma he’bek wagalat 5ye, trompet iak mesigenam puhasuam e, is aphwami o mo orlu ago akhit o’gwe onowi sabo werik poluk welagai a’ge ebano lagalat, 6ye, trompet iak ’birenak a’ge puhasuam e, is aphwami o sogweik akhit onowi sabo werik poluk welagai a’ge ebano, iak oso a’ge ano holholuk lagalat, 7ye, trompet iak hwedik-hwedigat oso holuk nak e, is aphwami Israel a’ge enebe a’bigat odoktak a’ge ebano odoktu agalat, togu lemak o.
8Ye, trompet iak ing hogulom ai re, is an nebe eiye a’ge Harun eiyagai ebano en nagat togulom o. Wene yu re, his emin, heneiyagai dagetil laga lema a’ge emin, en modok-modogat togu lorogup enat, mo’gulhentegis o.
9His honowi pam oruakma, is heneselei a’ge en wathonobuok oluk togwi a’ge ano mukho lebik onobogulat, trompet iak inghogwiam e, an henaik Allah en henebe eberak honoboluk henagap delik o. 10Agauwa nin hwedik-nan hwedik honogola henagaisogo seni sorogulat, dogwi mesik peleliso holuk togulat, domba wusogo nebaget e narlogulat, an Allah nemin hwedik wolomok oluk, nebaget wusogo woknogulat, togulat e, trompet iak ingholuk nak togu lomup o. Asogo togulom ai re, an henaik Allah en nede ebet henebise lemagoluk, togulom wene ano aiat o, oluk, an henaik Allah enat mo’gulhentegis o,” oluk, mo’gulesi.
Dom Sinai ukpoluk, wemagoluk, wene hwalogo pesi wene
11Tahun mesik arat takpoluk, mesik tak a’ge dugwi mesik pelelak poluk, mesik pelelak a’ge tanggal 20 a’ge ai pam, o hena ano wene tak a’ge ano peti ogola yagasogo Allah owi werikmu ebano lo’boktak welaga a’ge ano woluk ligagoam e, 12Is aphwami Israel a’ge ebano, onosilak lo’bok degel-degel wemak oluk wene le’gelak oruak a’ge ano hegitsogoat ene’berlik wagaimu, o hena ano o leimu Paran ebano mo egeimu, is ebano o ebayat mo egesa. 13At Allah en Musa mo’gulosokhwe, Musa en Israel a’ge mo’gulentesimu, naduk-nadugat wegesa ano re, yuat o.
14Is ena’gul onuk Yehuda a’ge onosilak lo’bok logolak ebano, at Aminadab omlogo Nahason ano onue agarik, enaluksogo e pam ’gogosogo woluk naduk wagalat, 15at Zuar omlogo Netaneel ano onue agarik ena’gul onuk Isakhar a’ge onosi modok logolak ano wogonoboluk ene’berlik wagalat, 16at Helon omlogo Eliab ano onue agarik is ena’gul onuk Zebulon a’ge onosilak logolak ano wogonoboluk ene’berlik wagalat, 17is ena’gul onuk Gerson a’ge emin, Merari a’ge emin en Allah owi werik a’ge ano moluk-tak e yesogo onnum pam ’gogosogo woluk ene’berlik wagalat,
18nin pobuk at Syedeur omlogo Elizur ano onue agarik is ena’gul onuk Ruben a’ge onosilak modok esan ebano, enaluksogo e pam erlilogo woluk ene’berlik wagalat, 19at Zurisyadai omlogo Selumiel ano onue agarik is ena’gul onuk Simeon a’ge onosilak esan enemin wogonoboluk ene’berlik wagalat, 20at Rehuel omlogo Elyasaf ano onue agarik is ena’gul onuk Gad a’ge onosilak esan enemin wogonoboluk ene’berlik wagalat, 21Is logon owan wom erlakhwe, Allah owi worogu lemagoluk, is ap Kehat a’ge onosilak esan ebano, di a’ge yu a’ge op a’ge omu degelak a’ge Allah owi werikmu welago a’ge ebano, enemarlo pamsogo woluk, ’burl eba agalat,
22Asogo toluk, at ap Amihud omlogo Elisama ano onue agarik is ena’gul onuk Efraim a’ge onosilak esan ebano, enaluksogo e pam erlilogo woluk pobuk agalat, 23at Pedazur omlogo Gamaliel ai onue agarik is ena’gul onuk Manasye a’ge onosilak esan ebano wogonoboluk ene’berlik wagalat, 24at Gideoni omlogo Abidan ai onue agarik is ena’gul onuk Benyamin a’ge onosi esan ebano wogonoboluk ene’berlik agalat,
25Asogo toluk, esan mesik naduk pulogo wagaihwe ene’berlik ologun ’gobok enebe esan mesik wegesa ano re, ap Amisyadai omlogo Ahiezer ano en onue agarik is ap ena’gul onuk Dan a’ge ano, enaluksogo e pam erlilogo woluk ene’berlik wagalat, 26at Okhran omlogo Pagiel ano onue agarik ena’gul onuk Asyer a’ge onosilak esan ano wogonoboluk ene’berlik agalat, 27at Enan omlogo Ahira ai onue agarik ena’gul onuk Naftali a’ge onosilak esan an wogonoboluk ene’berlik agalat, tuagoluk poligenebegesa. 28Is Israel a’ge ebela lagalat onosilak nak esan a’ge no’gulemagoluk, pulogo enebesi ano re, aiat o.
29Asogo togwiam e, at Musa ebam, ap Midian a’ge Rehuel omlogo Hobab ano Musa en mo’guleselat, at Allah en, ’gwiang wokhentaik o, oluk, egeimu ebano lagaimu re, nis nenemin lul ene suk o. Nenemin lultik, at Allah en nis aphwami Israel a’ge obap nonobo a’ge mo’gulnentesi ano obab nenebisoam e, nis en hat obab hobul o!
30Mo’gulesimu, at Hobab ano en o’go mo’guleselat, “Erlak ne’basi o, Obat mo’gulnigen a’geat de, an nowi edip pam togolik nue nari entail laik o.”
31Asogo mo’gulesimu, at Musa en e’basi ano mo’guleselat, “nis o leimu yema nonowi sabo wetil lo a’ge neneperlakma re, hat haluk a’ge enat, mo’gulnentil loma re, uknonobo mia o. 32Nenemin lulmu re, at Allah en nis obab nenebiso a’ge ano nis ene hat obab hobul o,” oluk, mo’gulesi.
Aphwami Israel a’ge wegesa wene
33Is aphwami Israel a’ge dom Sinai Nenaik ’gain Onuk Logo a’ge welagoma eba ukpoluk agauwa henaganamat wegesa o. Asogo wagalat, is onowi sum a’ge worumu ebale heratuogoluk peti Allah en wene wusogo woknenebegei oluk hele’gik a’ge ano naduk woluk wegesa. 34Asogo womogoluk, o sum a’ge werik poluk welegesema ebano en wagaiam e, o erlige re, o hena Nenaik ’gain Onuk Logo a’ge ano is ena’gul hegit modok waga laga.
35 #
Mzm. 68:1
Ye, peti Allah en wene wusogo woknenebegei oluk hele’gik a’ge ano woluk womogoluk holuk e, at Musa en Nenaik ’gain Onuk Logo a’ge ano disogo mo’gulese laga,
“Nenaik, hebe inoroguntik e, aphwami hat heselei a’ge hebe enebit a’ge ai hweiye ’bogoluagoluk mugentasulomup o,” oluk mo’gulese laga. 36Ye, peti Allah en wene wusogo woknenebegei o, oluk hele’gik a’ge asogo woluk e, o worumu ebano pou wegesa holuk e, at Musa en Nenaik ’gain Onuk Logo a’ge ano disogo mo’gulese laga,
“Nenaik, nis aphwami Israel a’ge nenemalik enemin nenebe modok a’bik nene’gik wenaru mia a’ge yema nenebam louk la suk o, nenaik,” oluk mo’gulese laga.
Currently Selected:
Bilangan 10: Wul
Highlight
Copy
Compare
Share
Want to have your highlights saved across all your devices? Sign up or sign in
