Imamat 27
27
Allah wa, oluk, hau worogulat, wogogulom wene
1At Allah en Musa mo’guleselat,
2“Is aphwami Israel a’ge wene mo’gulonto ano re, yuat o.
Ap mesik en ap mu a’ge mesik woluk wotluk, ap yu re, ’gain Onuk Logo a’ge Allah, wogeik o, oluk, ho’buk ’balogo nebaget pulogo pasu a’geat de, erlak ago holuk e, ho’buk ’baliso a’ge ano o’go re, disogo pasu lemak o, oluk, 3o’go op a’ge an nowi sabo werikmu oruak a’ge ano motluk nak laga lemak o.
Ap dogo oruakhwe tahun 20 en ’bekhit 60 pam tak a’ge holuk o’go emas uang perak 50 pogulat,
4ye, hwami a’ge holuk uang perak 30 pogulat,
5Hwami ap dogo oruakhwe tahun 5 hwerli en tahun 20 tak a’ge ap holuk uang perak 20 pogulat, hwami holuk 10 pogulat,
6logomalik hwelani dogo oruakhwe dugwi mesik pelelak a’ge pam en ’bekhit 5 pam tak a’ge logomalik holuk e, uang besi perak 5 pogulat, ye, hwelani holuk e, 3 pogulat,
7Hwami ap enarlue a’ge dagotluk oruakhwe tahun 60 a? tahun a’bigat a, ap a’ge holuk e, uang perak 15 pogulat, hwami a’ge holuk e, 10 pogulat, tugu lemak o.
8A’geat de, ap ho’buk ’baliso a’ge ano disogo po yo oluk wene werak a’ge ano ouang erlak holuk e, ap an Allah wokneik oluk ho’buk ’baliso a’ge ano woluk ap an nebe eiye a’ge eneragam lagai holuk e, ap an nebe eiye a’ge en ap ano memerak poluk at ho’buk ’baliso a’ge en a’ge oruak a’ge ano motluk nak o’go pouwagoluk ogu lemak o.
9Aphwami en onuam mesik Allah nebaget opsogo woknoum a’ge yu re, Allah hebaget at o, oluk, ho’buk ’balogo woknosu agai holuk e, Allah nebaget odoksogo pasumu re, ai pam mesik tu erlak modok nebaget poligat welemak o. 10Nebaget polik a’ge ano muat mesik o’go ’balogulat, op on holuk ebalema wiak a’ge pogulat, wiak a’ge ’gela’ge holuk e, ebalema op a’ge pogulat, tu mia o. Nebalema hebalema tu holuk e, onuam ano eminat nebaget polik at welemak o. 11-12A’geat de, onuam Allah nebaget woknoum mia a’ge ano a’geat de, woknosuom a’ge oluk ogola eberiso holuk e, ’bekhit woknosuom mia o. A’geat de, ap an nebe eiye a’ge en pobirak pou wagoluk, pei lagai holuk e, ap an nebe eiye a’ge ano en onuam ai op a? wiak a, pobi holuk, ebalema uang e, disogo po yo, oluk, pobirak poluk eniak la’bolik pogu lemak o. 13O’go disogoat po ai oluk hwelak poluk e, mo’gulogwiam ap uam eiye a’ge en, ho’buk ’balegis a’ge ano erlak agama re, ebalema uangat paik o, oluk oso holuk e, ouang pasulat, ebam lo’boksogo eminat Pasu lemak o.
14Ap mesik en owi werik pam Allah nebaget po epasu holuk e, ap an nebe eiye a’ge en o werik ano wiak a? op a, pobirak pasu lemarik, o werik a’ge hegitsogoat o’go hwela, poluk, ap mesik en o’go ’balik epasulat holuk e, o’go polik a’ge anoat pogu lemak o. 15A’geat de, ap owi eiye a’ge ano en nowi Allah ebaget pegi a’ge yu ebalema re, no uang at paik o, oluk, oso holuk e, o’go polik a’ge ano ’gela’ge pasulat, ebam louksogoat emin pasu lemarik, o ano re, arat horlouwak o,
16ye, ap mesik en e, o’gwiang aik emining a’ge wogesi a’ge pema Allah wogeik o, epasulat, holuk e, e’gen owi o’go ’baliselat, 220 liter ai besi uang perak 50 at pogwimu re, o’gwiang ai pam e’gen owi meren liter pam yoru o, oluk wenakho poluk, wonogo ano ’gela’geat o’go pulogo pasu lemak o. 17Ap ano en e, tahun 50 agoam ono’gwiang hwedik ono’gwiang eiye horlogwi ano erlige, no’gwiang yu re, Allah wogeik o, oluk, oso holuk, o’go polik ano ’gela’geat o’go ’bal hwerlasu lemak o. 18A’geat de, tahun 50 ano arat takpoluk, Allah wogeik o, oluk, oso holuk nak e, ap an nebe eiye a’ge en tahun meren takpoluk ono’gwiang hwedik ono’gwiang eiye a’ge ano horlouwa o, oluk, wenakho poluk, tahun tak a’ge ’gela’geat o’go sebelogoat pulogo pogu lemak o. 19Ye, ap o’gwiang eiye a’ge en no’gwiang Allah wogegis a’ge ano ebalema re, no uang at paik o, oluk epasulat holuk e, o’go polik a’ge ano ’gela’geat pasulat, ebam louksogo emin at pasu lemarik, o’gwiang ano at enat horlouwak o. 20O’gwiang pam uang o’go ’belak a’ge ano an Allah woknoum erlakhwe ap mu a’ge mesik en o’go ’bal hwerlau wago holuk e, at o’gwiang eiye a’ge ano en pobuk uang ebalema poluk, horlo modok erlagat o. 21Ye, tahun 50 ago ano pam ono’gwiang hwedik ono’gwiang eiye a’ge en horlogwi a’ge ano erligeat wogoum erlak ’gain Nonuk Logo a’ge an no’gwiang pu agoam e, is ap an nebe eiye a’ge ono’gwiangat emak o.
22Ap mesik aik en o’gwiang wogoum erlakma at omu enat o’go ’bal hwerlasu a’ge ano ado Allah wogeik o, opoluk wogosolom tik, 23pobuk no’gwiang at Allah wogegis a’ge ano ebalema no uang at paik o, oso holuk e, ap an nebe eiye a’ge en tahun meren takpoluk ono’gwiang o’go ’belak ono’gwiang eiye a’ge en horlogwi a’ge ano wonogo poluk o’go hegitsogo hwalogo mo’guloso holuk e, ap o’gwiang eiye a’ge en o’gwiang ano ebalema o uang wokho Allah anat woknemak o. 24Tahun 50 lai lasu holuk, nak e, at o’gwiang eiye erlak o uang pam o’go ’balogo an Allah woknosoma re, ’gwiang ano naduk eiye welago a’ge anoat horlouwa o.
25Di a’ge yu a’ge an Allah woknoum ano re, nowi rabo werikmu o’go ’balogo pogwi a’ge ai uang syikal mesigat nak ai, gera 20 atma re, ano ’gela’geat o’go ’balogo pogu lemak o.
26Onuam sapi domba doru erlakma naduk-naduk deriso a’ge ano re, an Allah na’geat o. Ai a’ge ai re, an Allah na’geatma re, an, wa, oluk, mo’gulnogulat, ai a’ge odoksogo po mia o. 27A’geat de, naduk dogo a’ge an woknoum mia ano a’ge woknosuagalom tik pobuk, no uang ebalema Allah wok eik, opogwi holuk, o’go pulogo pogwi a’ge ano pogulat, ebam louksogo eminat pogu lemak o. A’geat de, ouang ebalema an Allah woknoum opo erlak holuk e, ap mu a’ge enat o’go ’bal horlo opogwi holuk e, o’go polik a’ge ano hegitsogoat pogu lemak o.
28 #
Bil. 18:14
Aphwami emin, onuam emin, ono’gwiang emin, ena’ge ’berlegat enede arat daksogo an Allah nebaget odoksogo pogwi holuk e, Allah nebaget modok-modok degelak modogatma re, o’go ’balhorlogulat, nebaget pogwi a’ge ebano horlogulat, ebalema uang pou wagalat, tugulom mia o.
29Ap mesik woru a’ge polik oruakhwe, is en worogup erlak o, oluk, agap delogwi o’go uang ebalema pou wom mia o. Ebeat Allah ebaget wusogo pouwak o.
30 #
Bil. 18:21; Ula. 14:22-29 Di a’ge yu a’ge ’gwiangma yogo a’ge emin, E, e’gen no’gwi a’ge pema emin, e’gen 10 egesiso holuk mesik delisogo po yo oluk, wene werak a’ge ai an Allah nebageratma re, an Allah nebagerat modok poligat welemak o.
31Asogoatma re, pogu lemarik ena’ge dedilogo pouwa a’ge ebano a’ge pema is en horlo a’ge opogulat holuk o’go hwelak a’ge ano pogulat, ebam louksogo eminat pogu lemak o. 32Onuam sapi lembu emin kambing domba emin 10 oruak holuk e, mesik ai re, an na’geatma re, ap degeliso a’ge ano uam ogola lebikpasulat 9 wenakho poluk 10 wenakho lasu a’ge mesik ai an Allah nebageratma re, nebaget modok pulogo nobogu lemak o. 33Wenatil lasulat, wiak op a’ge wenarogulat, nebalema hebalema agam pagam togwi holuk e, onuam ai re, e’birek e, nebaget polik wolom miayat ai ene ebalema uang wokno’gulom mia egei o, oluk, mo’gulentemin o,” oluk, mo’gulesi.
34Disogo tip, Asogo tip, wene yu ’berlegat aphwami Israel a’ge en tugu lemagoluk at Allah en dom Sinai pam welat, Musa mo’gulesi a’ge ano re, aiat o.
Currently Selected:
Imamat 27: Wul
Highlight
Copy
Compare
Share
Want to have your highlights saved across all your devices? Sign up or sign in
