Imamat 13
13
Yebil obotut enebam ago holuk, tugulom wene
1At Allah en Musa harun e’birek disogo mo’gulentesi,
2“Ap mesik ebam periselat, agap pam hwedik periselat, agap pam ’burak ’gela’ge tagalat, asogo tago oruak holuk e yebil ’bot ebam agalat, tegei hwi a? Oluk, an nebe eiye a’ge Harun de a, at eiyagai weiyelak welema a’ge ebano mesik eneragam pou waga lemak o. 3Pou wagai holuk ap an nebe eiye a’ge ano en yebil enebam oruak a’ge ano pobirak pasu lomtik, enebam yebil oruakma eriano omutaruk ya’gwi asu ’gut a’ge ai ’gela’ge takpasulat, enedemu ’gola delil ’gwilasuam hasulat holuk e, ’bot ebam onogola aga hegi, oluk, ap ano mo’guleselat, Hat hebe asua modok onogorlok wik wiak a’geat wiak hebam ago o, oluk, mo’gulemak o. 4Ye, agap pam we ya’gwi ’gela’ge amolit deleng eselat, edemu delil ’gwi lasu erlakma en yebil oruakma, eriano omutaruk, gut ano wolom erlakma en op oruakhwe, il yethasu lomtik holuk e, ap nebe eiye a’ge ano en agauwa 7 pam ematek welemagoluk, owi wusogo pouwak o. 5Agauwa 7 arat lai lasu holuk e, ap an nebe eiye a’ge en e, ap ano pobuk nin il yethasu lemarik, yebil ano agap pam wigal luk, lo erlakma en otok nak oruakma il holuk e, agauwa 7 a’ge pam pobuk nin omuat welemagoluk, o welagoma ebanoat pouwak o. 6Agauwa 6 pam wolotluk loruk o’gwe ap an nebe eiye a’ge ano en e, agauwa mesik, yetholuk, ap iebil ano agap pam mesik emin wigalluk lo erlakma en we agap pam nak pirik nak oruakhwe il yetholuk e, ap ano disogo mo’guleselat, hebe arat op e’gen o, oluk mo’gulogwiam e, osum ik pam emet hwerlasu lemarik ebe op at neselemak o. 7Ye, asogo mo’guloso a’geat de, agap pam perik modok a’ge ano obotut agap pam wigalluk lasu holuk e, ap an nebe eiye a’ge ano en e, pobuk nin yethouwak oluk, eragam wemak o. 8Wago en e, il yethasulat, agap pam pirik a’ge ano ebe pam wigalluk lasu en e, yebil ano ’buragat aga hegi, oluk ede epasu lemarik, ap ano mo’guleselat, hebe modok ebenagaikmu miayat e’gen o, oluk, mo’gulemak o.
9Ap mesik ebam yebil obotut edip ’belak a’ge oruak holuk e, woluk ap an nebe eiye a’ge eneragam pou waga lemak o. 10Pou wagai holuk e, ap an nebe eiye a’ge en il yethasu lemarik agap pam perik a’ge ai ’gut modok welat, omutaruk eminat ’gurap pasulat, ye, yebil perik a’ge ano ogore, emep silpol hasulat, asogo tagokhwe il holuk e, 11iebil lok a’ge ai erlak om erlakma en modok-modogat welemama re, ap an nebe eiye a’ge en ap ano mo’guleselat, hat hebe ai pam ebenagaikmu onogorlok modok a’ge ano takpoluk wiagat e’gen o, oluk, mo’gulotluk at ebe-arat en wiagat agoma re, owi ematekma wusogo po erlakma en we ukpo yo. 12Ye, ap an nebe eiye a’ge en, ap yebil a’ge ano a’gul pam en ’bekhit oyuk hwerli agap pam ’berlegat wigalluk laga hwi a? oluk, opoluk, 13opsogoat hil ’gwelakhagun ’gal agap pam herasogo nak pei lasu a’ge hasulat holuk e, hiebil a’ge yu arat ’gut nak agarik oruakma re, hebe apat welegen o, oluk e mo’gulemak, o. 14A’geat de, yebil ano emep a’bosu emin sil pol hasulat oruak holuk nak e, ebe wiak a’geat ebam agarik oruak, oluk opouwak o. 15Ap an nebe eiye a’ge en e, yebil ano emep a’bosu sik’borok osokhwe hasulat holuk e, emep sik’borok eselat oruak yu re, yebil wiak a’geat edip ’balaga hegi, opoluk, ap ano mo’gulogulat, hebe wiak arat aik bal e’gen o, oluk, mo’gulemak o. 16Ye, yebil mep sik’borok oso a’ge ano erlak aga lemarik, ya’gwi ’gela’ge ’gurlnak takpasulat oruak holuk e, ap an nebe eiye a’ge ene’bek welemak o. 17Wago holuk e, ap an nebe eiye a’ge en yetholuk e, emep yebil a’ge ano erlak otluk, ebalema gut nak agalat oruak holuk e, ap yebil ebam oruak a’ge ano mo’gulogulat e, hebe arat op e’gen ai o, oluk, mo’gulemak o.
18Ap mesik agap pam ’bot perik e’gin welago a’ge anoat de, erlak agoam, 19ebalema obot momi a’ge modok periso de a, a’gul edip ma’bu a’ge agalat, ’gut a’ge nak takpasu a, asogo takpasu holuk e, ap an nebe eiye a’ge en yethouwagoluk, ene’bek wemak o. 20Asogo wagoam e, an nebe eiye a’ge en yetholuk e, ebam yebil a’ge welaga a’ge ano ebalema yebil tago a’ge ano agap pam en ogola ’gwiselat, yebil oruakma eriano agap sorlum ya’gwi ’gut a’ge ’gela’ge takpasulat, tegeimu re, bot perik ano pam en modok edip balat agama re, ap ano mo’guleselat e, hat hebe modogat edip a balegentik wiagat e’gen ai o, oluk, uak o. 21Ye, ap an nebe eiye a’ge en ebam pirik a’ge ano il yethasu a’geat de, iebil oruakma eriano omutaruk ’gut a’ge daintak pasu erlakma yethasulat, ye, edemu sorlum la’gwiselat, agap op ’gela’ge agoam yethasulat, taga lemarik, ap ano agauwa 7 pam omuat welemagoluk owi ematekma wusogo pouwak o. 22A’geat de, o’bot ano agap pam logetil lasulat, tisokhwe il hasulat holuk e, ebam aik ’belak a’geatma re, ap ano mo’guleselat e, hat hebe aik bal hebegei a’ge yu en arat wiak e’gen o, oluk, uo. 23Ye, a’geat de, yebil ebam a’ge ano lok etil lo erlakma en otok eriano sogo nak oruakhwe il hasulat holuk e, yebil welaga a’ge ano ebalema weat ebam yebil a’ge e’gerlik pasu holuk e, ap ano disogoat mo’guloum o, hebe op at welegen ai o, oluk, mo’guloum o.
24Ye, ap mesik odouk nasuam e, iebil ano a’bosu sik ’borok osolomtik, emep sik ’borok eselat, esei erlipsogo pasu holuk e, 25ap an nebe eiye a’ge enil ’gwelap holuk e, yebil oruakma eriano omutaruk ya’gwi ’gut ’gela’ge takpasulat, yebil ano agap pam en ogola nil lasulat, tak oruak holuk e, odouk ne’gei ai pam en e, ebe edip at balagama hegi o, oluk ede opoluk, ap ano mo’guleselat, hiebil aik ’bal egenma re, hebe re, wiagat e’gen o, oluk, mo’gulemak o. 26Ageat de, yebil ebe oruakma eriano omutaruk ’gut ago erlak a’ge hasulat, ye ogola nil ’gwiso erlakhwe yethasulat, ye edemu agap op ’gela’ge oruakma hasulat, tago holuk e, ap ano agauwa 7 pam omuat welemagoluk e owi omuat wusogo pouwak o. 27Agauwa 6 welemarik loruk o’gwe ap an nebe eiye a’ge en yetholuk yebil ano agap pam logetil lasumu yethasulat holuk e, yebil ’buragat wiak a’geat hebam aga o oluk, ap ano mo’guleselat, hat hebe enemelmel modok hio a’ge wiagat e’gen o, oluk, mo’gulemak o, 28ye, yebil ano agap pam ano lok om erlakma en oruakhwe odouk nasumu ebano ’buk etil lo ’gela’ge tago holuk ai re, ap an nebe eiye a’ge en, odouk ne’gei a’ge ebalema sorlum nak lagarik, weat peregei hegi, opoluk ap ano mo’guleselat, hat hebe op at welegen o, oluk, mo’gulemak o.
29Ap mesik de a? hwe mesik a, ’burak a’gul pam a? odogun pam de a, duk tegeirik oruak holuk e, 30ap an nebe eiye a’ge en ’gwelakholuk e, ’burak oruakma eriano omutaruk dousogo ukpasulat, obotut ede werisokhwe hasulat holuk e, a’gul pam a? odogun uak pam a, igani erle takpasu lotluk, edip balat aga hegi, oluk, ap ano mo’gulogulat, hat hebe modok wiagat e’genma ai o, oluk, mo’gulemak o.
31Ye, yebil ano edemu ede muat ’gwiselat e, asu esing tak erlak hasulat holuk nak e, ap ano agauwa 7 pam emategat welemagoluk, owi wusogo pouwak o. 32Agauwa 6 pam wolotluk tono en e, ap an nebe eiye a’ge en yetholuk igani pasu a’ge ano agap pam lok etil lasulat, asu momi ’gela’ge takpasulat, ye, edemu-edemu lasu erlakma en op at oruak holuk e, 33ap ano igani pasu lotluk oruakma asu ’balu erlakma en ukpasu lemarik, asu ado ano ’berlegat ’balogo poluk e, agauwa 7 a’ge pam mesik emin at ematek welemagoluk, owi ematek welagoma ebano pouwak o. 34Agauwa 6 welemarik, loruk o’gwe ap an nebe eiye a’ge en e, ap igani ebam ago a’ge ano agap pam enil holuk e, igani ano agap pam wigal om erlakma en e, otok nak welat, ye, ogola ningsogo ’gwilo erlakma en oruak holuk e, ap ano mo’gul-mo’gulogulat, hat hebe arat op e’gen o, oluk, mo’gulogwiam e, holuk e, osum ik pam emet hwerlasulat, ebe op at Neselemak o. 35Hat hebe arat op e’gen ai o, oluk, mo’gulosoam oruakma igani pasu a’ge ano agap pam wigalluk lasu holuk nak e, 36ap an nebe eiye a’ge en enil ’gwela houwagoluk, eragam wagoam e, il hogu lemarik, ap yu demat igani pesi a’ge ano wigalluk lasumu re, hebe arat wiagat e’gen ai o, oluk, asu momi a’ge pobitu mia. 37Asogo tu a’geat de, ap ano igani ebetne a’ge ano wigal om erlakma en lolok til lasulat, ye, ’burak oruakma asu esingat welat, tak a’ge ano ap an nebe eiye a’ge en il houwarik, igani ebam a’ge arat erlak agalat, ebe obat aga hegi, op oluk, ap ano mo’guleselat, hat hebe arat op e’gen o, oluk, mo’gulemak o.
38Ap mesik a? hwe mesik de a, agap pam suk-suk a’ge erlerak pasu holuk e, 39Ap an nebe eiye a’ge en il hasu lemarik, agap pam ya’gwi ’gut a’ge ’gela’ge oruakma ebano esing etil lasu holuk e, we, igani at tegeimu re, obat ema, oluk, ede eberuak o.
40Ap mesik a’gul asu pema-pema hapsogo ’belak oruak holuk e, ebe wiak erlak obat oruak o. 41Ye, ap mesik a’gul asu o’borl olukhwe haphasu holuk e, ebe wiak erlak obat oruak o. 42Asogo a’geat de, agauwa mesik pam a’gul pam de a, a’gul ’bie ma ya mep nak agalat orlongtil lasu holuk ai re yebil wiak a’ge anoat tegei ai oluk opouwak o. 43-44Asogo opoluk, ap an nebe eiye a’ge en ’gwelakhouwak oluk, e’bek wagoam e, ’gwelakholuk e, asu hap takma at, eberli pam de a, ’burak wiak a’ge ano ’gela’ge welat esei lup hasulat pit holuk emep bo puago holuk e, yebil wiak a’ge ano enat aik balagama re, ebe wiagat aga o, opoluk, ap ano mo’guleselat, hat hebe onogorlok hio a’geat wiak egen ai o, oluk mo’gulemak o.
45Mo’guloso holuk e, ap edip ’belak a’ge ano en osum derleptak a’ge ’bukhwerlasulat, asu hebilogo pasulat, taga lemarik, orogole hisogo pagathorloluk eselat, an nebe wiagat egi o. Wiagat egi o, oluk, iak loksogoat ese lemak o. 46Ye, edip balema a’ge ano erlak om erlak oruakhwe ebe wiagatma re, owi saboma wolom erlakma en o’borlma eba omuat welemak o,” oluk, mo’gulentesi.
Di a’ge yu a’ge pobut ago holuk togulom wene
47-49Mo’gulentesirik, at Allah en wene mesik emin Musa Harun emin mo’gulentasulat, aphwami onosum domba asu pam egeik a’ge de a, kain op a’ge pam egeik a’ge pam de a, we sum ebak domba asu egeik a’ge pam a opsogo egeik a’ge pam a domba agap pam a, di a’ge yu a’ge enagap pam ’buktak a’ge pam de a, ai a’ge pam ’berlegat mugetil lasulat, di a’ge yu a’ge ebano pam orogole soduk balagalat borlu iltak pasulat, tago holuk e, poburat agarikmu re, oluk, ap an nebe eiye a’ge en ’gwelakhouwak oluk, e’bek poumak o 50pou wagai holuk e, ap an nebe eiye a’ge en di a’ge yu a’ge pobut ema a’ge ebano ’gwelakhouwarik, wokho agauwa 7 a’ge pam emde o momu welemagoluk, pulogo pouwak
51Nogo 6 nogoluk loruk o’gwe di a’ge yu a’ge ebano ’gwelakhasu lemarik, pobut ema a’ge ebano aphwami onosum egeik emin, sum kain ebak herle domba asu pam a, herle modok op a’ge pam de a, ebano pam egeik a’ge emin, di a’ge yu a’ge enagap pam ’buktak a’ge ebano emin ebano pam hegit nak ago holuk e, pobut nak agarik modok wiagatma re, sum eba re modok onogorlogat o, oluk 52oluk di a’ge yu a’ge pobut etil louwama modok wiak a’ge ebano re, modok wiagatma re, mesik emin pobut etil lo no oluk, di a’ge yu a’ge togwi a’ge oruakhwe, perlengsogo odouk en nouwak oluk narlik pouwak o.
53Ye, ap an nebe eiye a’ge di a’ge yu a’ge ebano pam pobut etil lo erlak holuk e, 54ik pam hosogo pouwagoluk mo’gulontul mu hosogo pogwi holuk agauwa 7 pam pobuk emin omuat pegesema welagama ebano pou wama welemagoluk pouwak o. 55Ye, ebano agauwa 7 welemarik, sum ebano emesogo pogwi holuk, ap an nebe eiye a’ge en ’gwelakhaik tik, pobut a’ge ebano pam mesik emin til lo erlak a’geat de, ilmu mesik erlak hegit a’ge nak oruak holuk e, sum ano pam wiagapsogo pobut et til laga hegi, o poluk, pema akhit nak aga a’ge ai oruakhweat de, perlengsogoat odouk nouwak oluk narlik pouwak o. 56Ye, di a’ge yu a’ge pobut et til louwa a’ge ebano ik pam emesogo pogwi holuk, ap an nebe eiye a’ge en ’gwelakhasu lemarik, pobut om a’ge erlak hasulat holuk e, aphwami onosum egeik a’ge a, di a’ge yu a’ge enagap pam ’buktak a’ge, kain ebak a’ge egesik a, ebesik a’ge oruakhwe, pobut agoma eriano en nak derlep-derlapsogo ukpouwak o. 57Ye, di a’ge yu a’ge ebano pam pobut ago a’ge ebano pobuk eminat pobut ago holuk e, pobut ago a’ge ebano a’geat ’bete osoma re, sum ebano ’berleksogo odouk nouwak oluk, narlik pouwak o. 58Aphwami onosum egeik a’ge emin, herle domba asu tuelak a’ge pam kain ebak a’ge a, herle modok op a’ge pam de a, egeik a’ge emin, di a’ge yu a’ge enagap pam ’buktak a’ge ebano emin, ebano am pobut takpil lasu a’ge emesogo pouwa a’ge pobut a’ge ebano, erlak ago holuk e, pobuk emin emerogwi holuk e, modok obat ema ani o, oluk mo’gulentesi.
59Aphwami onosum domba asu pam egesik a’ge a, kain modok op a’ge pam egesik a’ge a, we herle domba asu tuelak a’ge pam sum ebaksogo egeik a’ge a, herle modok op a’ge pam egesik a’ge pam a, domba agap pam de a, di a’ge yu a’ge enagap pam ’buktak a’ge pam a, ebano pam ’berlegat pobut etil nak lasu holuk e, il ’gwelakholuk, yu wiagat aga o. Yu obat aga o,” oluk, togulom wene legelogo mo’gulentesi ano re aiat o.
Currently Selected:
Imamat 13: Wul
Highlight
Copy
Compare
Share
Want to have your highlights saved across all your devices? Sign up or sign in
