Hosea 8
8
Allah ukpogwi holuk wene enebam pouwa wene
1Yu wene oruak hegi, oluk, opou wagoluk, iak lok oso a’ge trompet ano iak pu tuak o. Is an neiyagai en tu a’ge wene nemin arat daksogo pulogo pegi a’ge ano sagalogo ukpogulat, tugulom wene ano tu a’ge enebit opogulat, tigisema re, mugentaik oluk tue pedi-pedi darak ’gain Nonuk Logo a’ge nowi werikmu duklau wagarik oruak o. 2Asogo tagene, is Israel en Nenaik Allah o, Hat nis nenaik, nis hat heiyagaiat oluk nenaluk o, oluk, eniak lok pam mo’gulnogwi a’geat de, 3Is Israel ai op tu a’ge ano wo erlakma en ukpegesema re, is eneselei a’ge en mugonoboluk magonoboluk til laga lema ani o.
4An en io oluk, u erlakhwe, onuelak ’gain ’gain perak onobogulat, An en obat o, oluk, epasu erlakhwe, is en onuelak ’gain-’gain pulogo onobogulat, togwi ai o. A’geat de, is en a’ge perakpam emas a’ge pam enasua ogut heli’gogo edikpogwi ai pam enebe erlagapsogo pogwi o. 5Is aphwami Samaria a’ge ai enasua lembu emalik ogut hele’gik a’ge ano nebit modok epasulat, is en togwi ano pam nolot het odouk magale ’gela’ge taknebasulat, tisoma re, is op om pukmu en wiak nak til lagaihwe modok o agauwa meren lail louwano? 6Lembu emalik ogut hele’gik a’ge ai re, an Allah erlak o. A’geat de, is Israel a’ge ap e’gik a’bosu pam hele’giso a’ge mesik en opsogo hele’gegeimu re, lembu emalik ogut o Samaria pam heli’gogo oruak a’ge ai ’goluk ’gelaksogo ’bo paik ani o. 7Is Israel ai en owi yorogulat owi pelil lagai ai ’gela’ge, o sogweiat worogumu re, e’gen egesik ’balogwi ai ’gela’ge o sogwei anni modok pun-pansogo wetil wagalat, enebeat warenebisoma houwa o. Gandum owi yorogwiam edip ligago a’geat de, e’gen egesik erlak oruakma re, no a’ge emin odoksogo en at tepung hele’gu epegep? Erlagat o. Ye, e’gen oso wellepma en e, aphwami mu a’ge en ’balogo no’gullepma re, ai ogo re, wiagat elep o. 8Di a’ge yu a’ge wiak ago holuk, yu an nebit, oluk, ukpogwi ano ’gela’ge, is Israel ano enselei a’ge en enemdema yagat onobogulat, Is aphwami esanat ene’gerlakma welemagoluk ’balurak onobogulat, tigisema welagai o. 9Is Israel a’ge ai, keledai wam seiye e’gelema welat, ap Asyur a’ge en letnontouwak o, oluk, tigisa o. Is enebabut e danian en togwi ’gela’ge, welat, 10is di aphwami yu aphwami ene’gerlak o’gwe no’gulemagoluk, takpegesa a’geat de, yogodak en e, An en odoksogo onoboluk, ap ’gain a’ge mesik eragam enebaikmu sebelak oruakhwe enebe e’gin-pe’ginsogo tagenebil lasulik ani o.
11Is Efraim a’ge en onowiak erlak emak oluk wusogo wogogumu ebale a’bik heli’gogo pil legesa a’geat de, wusogo wogogumu ebale hele’gik ogwe wiak a’bigat til lagalat tugukhwe, 12tugulom wene mo’gulentil lasu laga wene enakhit a’bigat odo pelal wokho pegimu oruakhweat de, Is en e, ai ap mu a’ge enebaget pelal wogo yo, oluk, weat takpegesa o. 13An nebaget pogwi a’ge ano is en wusogo woknogulat, nebaget werak a’ge ano einnyo is no’gulat, asogo togwi a’geat de, ’gain Nonuk Logo a’ge en nede hwedik takpasu legi erlak o. Is en wiak togwi a’ge ai, an nede eberak welat, o’go e’gin enebam po a’ge ano re, pobuk togolik o Mesir peragenebaik aiat o!
14Is Israel an en walentegis a’ge ebano onolot herap sogo ukpoluk, onuelak ’gain a’ge onowi lok op a’ge nak wusogo pil lagalat, is Yehuda a’ge en kota-kota a’bigat wusogo pil loluk, helep pak wusogo pil lagalat, tigisa a’geat de, An en o kota-kota ’berlegat odouk ’belakpouwakmu re, odouk en erlagapsogo nouwa ani o, oluk, egeimu re, mo’gulhentegis ai o, oluk, mo’gulentegis o.
Currently Selected:
Hosea 8: Wul
Highlight
Copy
Compare
Share
Want to have your highlights saved across all your devices? Sign up or sign in
