Hosea 10
10
Asua erliktogwi a’ge e’gin enebam po wene
1Is Israel ai, e anggur e’gik e’gela duelak poluk, e’gen op ikhasu ai ’gela’ge welegesa. E’gen a’bigat ik hasukhwe, onogorlok hogulat, enebaget wusogo wogonto a’ge ogo re, a’bigat heli’gogo pil lagalat, ono’gwiang eseimu oluk e, enasua ogo re, il obab sogo edikpil lagalat, tugu legesa 2Is ai eniak demat ogwi a’geat de, enedemu at eberak poluk ogumu re, is wiak togwi o’go onu’gwarek en herle hol tak pagathorlogwi o. Is onogorlok hogwi a’ge enebaget wusogo wogontogulomma ebale heli’gogo pil legesa ano Allah en moluk-melaksogo pil lasulat, enasua heli’gogo edikpil legesa a’ge ano ’bulogo pil lasulat, tua o.
3Ai tago holuk is en ogulat, “At ’gain Onuk Logo a’ge nonogorloksogo motluk lo erlakma re, yogodak nonue ’gain en tenentarok welago erlagat o. Ye, nonue ’gain oruak ene no a’ge taknonobouwa oluk en edik wolom epegep? Erlagat o, oluk, ogwi o. 4Is en nis disogo tagonobogu lomul o,” oluk, pulogo pogulat, eniak esei a’ge paget de, “Wene demat a’ge o,” oluk, ho’buk ’balogulat, “Nenemin disogoat tugu lomok o,” oluk, wene pulogo pogulat, togwi a’geat de, ogwi a’ge anoat togwi erlakma re, yabuk wogo a’ge pam e’gela orlok a’ge nak lebago ano ’gela’ge, is eneragam onoboluk welagai a’ge ebano enemin wene worogwi o.
5Is o Samaria a’ge en onogorlok hogwi a’ge sapi emalik ogut hele’gik o Bet-Awen oruak a’ge ano, woluk o walegat eba pei lagaimu no oluk, onogorlok hogulat, enede wathorlogulat, nge togwi o, is ap enasua ogut hele’gik modok opsogo hele’gikmu re, erliktogulat, is asua eiye a’ge ano en ogo re, nge tugulat, tua o. 6Sapi emalik ogut hele’gik a’ge ai, woluk o Asyur pei lotluk, ap ’gain o eba oruak a’ge ano, tenentarok welago a’ge o’go wok ema o. Ai tago ano pam is Efraim a’ge ononuk wiak agalat, ye, Israel a’ge e pam ogut hele’gikhweat de, enede hwediktak pegesema re, ene’gerli agalat tua o. 7E, edebi ’belak a’ge ik ogum pam ’bekhit woluk lasu ai ’gela’ge, is Samaria a’ge onue ’gain eminat asogo wiagap onoboluk wogonoboluk louwa o. 8#Luk. 23:30; Wah. 6:16O Bet-Awen dom-dom asua owi werik poluk wiak til lagai a’ge ai, is Israel a’ge o’go wiak togumuatma re, erlagapsogo pil louwa o. Is erliktogwi a’ge enebaget, wusogo wogontogumu ebale hele’gikmu ebano e e’gela orlok a’ge nak yarluk takpasuam e, is en, “Nis nenebe sebelak nenebemin o,” oluk, dom-dom mo’gulontogulat, ye, dom-dom sebelak a’ge ano is mo’gulontogulat e, “His en nenebemit o mabenap nonoboluk sebelak, an welemis o,” oluk, mo’gulontogulat, tua ani o.
Is Efraim togwi ano pam Allah en yu togwi yu logwe, epesi wene
9 #
Hak. 19:1-30
Allah en mo’gulentasulat. Is Israel ai o Gibea eba wiak tugu legesa hwerli en ’bekhit wiak nak til laga legesa o. Is An niak enesa’go hwolu erlakma en sagalogo ukpogulat, tugu legesa. Til lagaihwe, o Gibea eba eneselei a’ge en enebam lau wom erlak epegep? 10Is wiak togwi ano o’go e’gin enebam paik epasu a’ge hegitsogo am e at tak paik o. Is wiak ebam louk-louk til lagai ano pam e’gin enebam pou wagoluk, An en is aphwami ena’gul onuk lo’bok yo’go enebasuam odoktumarik mukho makho lebik onobouwa o.
11Is Efraim a’ge ai, naduk sapi dogum a’ge en yabuk tu a’ge mo’golikmu gandum e’gen sagalu a’ge paget ede eberak welago ano ’gela’ge, welagaimu re. Is enede ene e’gin ononum pam po erlak welegi a’geat de. Yogodak nak e, yabuk e’gin a’ge tuagoluk e ’belak e’gin a’ge ononum pam pasulat is Yehuda a’ge ’gwiang paluagoluk mo’gulontogwiam palugukhwe, is Yakub en ’gwiang pelak a’ge ano a’bosu ’baluagoluk mo’gulentasulat, tik o. 12#Yer. 4:3An muknoboluk wom erlige arat horok lau wagama re. O moru ’belakpou wago ai ’gela’ge ’Gain An Nonuk logo a’ge weik tik, obap paik en e, hegitsogo nak tagalom a’ge owi ’gela’ge pelil lagalat. Aphwami enede hwedik tagonobo a’ge e’gen ’gela’ge ’balil lagalat, eniabuk warlik o’gwe yabuk til lagalat, tugu lemak o. 13Asogoat tugu lemak epegi a’geat de, is en owi pelogwi ’gela’ge wiak til lagalat. E’gen ’balogwi ’gela’ge, tak pagathorlogulat, togwi ai o. Is eniak esei il no’gu legesa ai re, e’gen ’belak a’ge ’gela’ge nil lagai o. Is enanni pam onosilak enesegen oruak a’ge enebe a’bik a’ge en enede eberak poluk oruak o. 14Weim tuok oluk, edawi walhogu legesarik, is Israel enebam ’gogulat, onowi helep pak werik a’ge ano ’bulogo ’belabil laga lema ani o. Ai, tua ano re, ap ’gain Salman weim til lagalat, kota Bet-Arbel wiagapsogo pasulat. Hwami enemalik ’get dogo a’ge emin lit-latsogo ’gwiang pam ’bo pasulat, tegei ’gela’ge, tagenebaik o. 15Is o Betel oruak a’ge ai wiak logat togumu re, asogoat tagenebaik o. Ai tu ano re, is Israel onue ’gain a’guluak erlak er om a’ge oruakhwe, hegitsogo. O hirl lagabua ani o, oluk, egeimu re, mo’gulhentigis o, oluk, mo’gulentesi.
Currently Selected:
Hosea 10: Wul
Highlight
Copy
Compare
Share
Want to have your highlights saved across all your devices? Sign up or sign in
