Hosea 1
1
1 #
2Raj. 14:23–15:7; 15:32–16:20; 18:1–20:21; 2Taw. 26:1–32:33 Aphwami Yehuda a’ge onuelak ’gaindek ononuk logo a’ge Uzia, e’berlik Yotam, e’berlik Ahas, e’berlik Hizkia, enebe eria en tenentarok welegesa. Ye, aphwami Israel a’ge onue ’gain onuk logo a’ge re, Yoas omlogo Yerobeam ai en tenentarok welaga. Is asogo tenentarok welegesa eria hegit e, at Allah en Beeri omlogo Hosea ai en, aphwami Israel a’ge wene disogo mo’gulontuagoluk mo’gulesi a’ge oruak yu o.
“Allah en Israel a’ge enebabut e, Hosea ugwe ebabut emin hegit o,” oluk egei wene
2At Allah en an Hosea yo’go noboluk wene aphwami Israel a’ge mo’gulontuagoluk naduk disogo mo’gulnesi,
“Neiyagai o yema an nebam lo’boksogo welagai erlak uknoboluk libagai. Ai hegitsogo, hat en, hwe danian nil noso a’ge ai wokho heiyagaiat ebabut ’gela’geat dagenebip o,” oluk mo’gulnesi. 3At Allah en asogo mo’gulnesimu, an en e, hwe Gomer, Diblaim agalogo wai legirik wegi. Wegimu, hwe ano emalik ogola agarik e, nomlogo naduk ap deregei. 4#2Raj. 10:11 Deregeimu, Allah en disogo mo’gulnesi,
“At Yehu en enebe a’bik o onuk Yizreel eba enemep namogo warenebegei ai en, an agauwa wolom erlakma enat wene Yehu e’ba Israel a’ge onue ’gain onuk logo a’ge oruak a’ge ai pam poluk e, Yehu en dogo’gwe a’ge ’gain ononuk logo a’ge welemano oluk, erlagap paik o. Asogo tik ai en, homlogo ai onuk Yizreel tualin o. 5Eria hegit e, an en aphwami Israel a’ge, o onuk Yizreel do’goma eba en segen wa’gun porlolu ’gela’ge enanni erlagap pasulat mabenap enebaik o,” oluk mo’gulnesi.
6Asogo mo’gulesirikmu en, hwe ano pobuk emalik ogola agarik e, emalik agalogo deregei. Asogo deregeimu, at ’gain Onuk Logo a’ge Allah en Hosea, mo’guleselat,
“An en aphwami Israel a’ge ai pobuk emin nedeap enebiselat, is wiak togwi a’ge sagalogo ukpaik modok erlak o. Ai en e, hagalogo ai onuk enebit a’ge oluk tualu ’gela’ge, onuk Lo-Ruhama tualip o. 7Asogo a’geat de, an en aphwami Yehuda a’ge nedeap onoboluk delenebik ani o. Asogo tagalik ano re, segen pam, wa’gun pam, segen ’garok pam emin, weim obogwi a’ge mesik pam emin, ap tentara wam onuk kuda ai o’borl pam ligagalat, weim obogwi a’ge pam emin en, delenebik modok erlak o. We, an enaik ’gain Nonuk Logo a’ge an Allah enat enagap deliselik ani o,” oluk, mo’gulesi.
8Asogo mo’gulesirikmu en, at hwe Gomer ano emalik Lo-Ruhama agamu ’balogo re, emalik mesik ogola agarik e, emalik abat deregei. 9Deregeimu re, Nenaik ’gain Onuk Logo a’ge en Hosea mo’guleselat e,
“His Israel ai re, an neiyagai erlagat o. Ye, an his henaik Allah erlagat ai en e, an neiyagai erlak oluk u ’gela’ge re, onuk Lo-Ami neiyagai erlak tualip o,” oluk mo’gulesi.
“Aphwami Israel a’ge naduk opsogo welegesa ’gela’ge pobuk asogoat tagenebaik ani o,” oluk egei wene
10 #
Rom. 9:26
Asogo mo’gulnesirik e, mesik disogo mo’gulnesi,
“A’geat de, pobuk an en e, aphwami Israel a’ge ik’berlik ik laut lok a’ge ye’gelak esa’goma ene’gik wenarogulat, sogoluak ogola yagasogo walhogulat, tu modok mia ai ’gela’ge, enebe modok a’bik tagenebaik ani o. Yogodak An en e,
His an neiyagai erlak o, oluk mo’gulentasu legi ai o. Asogo a’geat de, pobuk,
His an Allah nelaluk modok welegi a’ge neiyagai o,” oluk mo’gulentaik a’ge oruagat o. 11Asogo mo’gulontoluk, aphwami ena’gul onuk Yehuda a’ge emin, Israel a’ge emin, pobuk mesikmu henebasuam, is en onue ’gain mesik a’ge en tenentarok welemagoluk edikpaik o. Asogo edikpoluk onowi pam eba oruakma, enebe a’bik yarluk ogulat, opsogo nak welat, togu lema ani o. O ai erlige, An en aphwami Israel a’ge enebe so’boru owi yoru ’gela’ge yerik ani o, oluk u ’gela’ge, hari onuk Yizreel ua ai lok logo a’ge at ema o.
Currently Selected:
Hosea 1: Wul
Highlight
Copy
Compare
Share
Want to have your highlights saved across all your devices? Sign up or sign in
