Ibrani 1
1
At Allah en iak at omlogo mo’gulesimu, at en nis mo’gulnentesi wene
1O page enat, at Allah en is ap at iak mo’gulontogu legesa a’ge ebano agauwa nin hwedik nan hwedik, wene at mesik mo’guleselat, at mesik mo’guleselat, mu muat mo’gulentasuam e, is en nis nena’bu nene’balak mo’gulontogu legesa. 2A’geat de, o ologun hwerli pam, nis yogodak welege ya pam e, Allah en wene ai omlogo mo’gulesimu, at en nis mo’gulnentau waga o. Omlogo ai re, edipmu eba Allah en di a’ge yu a’ge ’berlegat walhesi ai, ebe at omlogo enat walhesimu, eiye welemagoluk edikpesimu welema ai o. 3Mo il sellim-wallimsogo yogo pou wago ai ’gela’ge, Allah ebe erliktogwi a’ge ano en, Yesus ebe perakpou wagama ’gwiangma atiasogo welat, aik orogole ’gela’ge at welago yo. Asogo welat, di a’ge yu a’ge ’berlegat welago a’ge ai, at iak anni pam welago yo. Oruakma, nis wiak togu lege a’ge hosogo erlagap poluk e, Allah ’gain Onuk Logo a’ge ano e’bek ligagarik eragam e’gik ’bekhit akhit ’gainat welago ai o.
Malaikat mia ’gela’ge a’geat de, Allah omlogo nak e, logo welago wene
4At Allah en e, is malaikat ebano ononuk sebelak ’gela’ge oruakhwe, at Yesus nak e, onuk ereiya ’gain logo welemagoluk tualenebegei ’gela’geat, is malaikat enebe sebelak ’gela’ge oruakhwe, at Yesus ebe nak e, ereiya ’gain logo welago yo. 5#2Sam. 7:14; 1Taw. 17:13; Mzm. 2:7 Allah en at mo’guleselat e,
“Hat an nomlogo yo.
Hebe yogodak dakhebegis o,”
oluk, mo’gulesi ai ’gela’ge, is malaikat a’ge logon wene asogo mo’gulentesi no? Erlak o. Ye, mesik e,
“An e, at aik eik.
Ye, at e, an nomlogo emak o,”
oluk, is malaikat logon mo’gulentesi no? Erlagat o. 6#Ula. 32:43Ai en e, Allah en omlogo mesigat dogo ’gwiangma yema ’belakpou waga ai erlige re, is malaikat disogo mo’gulentesi,
“His an nosi malaikat ’berlegat e,
at nak ebam he’berik welat erliktogu lomup o,”
oluk mo’gulentesi. 7#Mzm. 104:4Ye, mesik e, is malaikat paget disogo egei,
“An en is malaikat enebe o sogwei ’gela’ge takpoluk enebasulat,
is yo’go peragenebasu legi a’ge enebe odouk magale ’gela’ge takpoluk enebasulat, taga legi o,”
oluk egei. 8#Mzm. 45:6-7A’geat de, omlogo mo’guleselat e,
“Hat hebe Allah yat welat, di aphwami yu aphwami tenentarok modok-modok wolorogun o.
Asogo welat, wene hegitsogo nak hwalentasu lorogun o.
9Ye, hat hebabut e, hegitsogo nak taga legen ai a’ge tagalat,
wiak tagalom modok hebit ai en e,
harilak enemin welegep a’ge eneragam ’gela’ge oruakhwe,
hat nak e, ha’gul pam a’bosu herlilogo edikhebegi ai en e,
hogola hagai a’bik hasu lomup o,”
oluk mo’gulesirik, 10#Mzm. 102:25-27wene mesik disogo mo’gulesiat,
“Hat ’gain Honuk Logo a’geatma re, edipmu en e, ’gwiang edip yeriselat,
’bogorl he’gik pam walhasulat, tigen ai o.
11’Berlegat walhegen a’ge ai, sum ’gela’ge derlep uarik pobuk erlak ema a’geat de,
hat nak e, hotok modok wolorogun o.
12’Bogorl ’gwiang ai, sum e’girlogo pogwi ai ’gela’ge,
hat en e’girlogo poluk,
pobuk ’get a’ge pagun a’geat de,
hat hebe nak e, o mo ligom ’bugom tagokhwe,
hebe sebal om erlakma en hotok modogat wolorogun o,”
oluk mo’gulesi. 13#Mzm. 110:1Asogo mo’gulesirik, mesik disogo mo’gulesiat,
“Aphwami hat heselei a’ge ebano hoyuk en al ’besilogo enebanogoluk,
an en owan he’bek onobou wom erlak oruakhwe,
hat an neragam ne’gik ’bekhit akhit ’gain wolorogun o,”
oluk, is malaikat a’ge ebano mesik mo’gulesi no? Erlagat o. 14Allah osi malaikat ai enebe re, no’gosogo togwi a’ge no. Is enarogun ’gela’geatma enebe re, nis Allah en delnonobua a’ge nak letnontogu lemagoluk, at en yo’go onoboluk peragonobou wago a’geat o.
Currently Selected:
Ibrani 1: Wul
Highlight
Copy
Compare
Share
Want to have your highlights saved across all your devices? Sign up or sign in
