Kejadian 42
42
Yusuf uelak en o Mesir gandum o’go ’baluogoluk legesa wene
1Aphwami en,
“O Mesir gandum oruak o,” oluk ogukhwe at Yakub en esa’go hwelegeirik e, eiyagai disogo mo’gulentesi,
“His nopaget weat welegep. Mesik togupmu re! 2#Per. 7:12O Mesir gandum oruak egesema nesa’go hwelegismu re, nis yema so’boru modok erlakma re, nis en waromulno oluk his en gandum o’go ’bali lagupmu re,” oluk asogo mo’gulentesimu, 3at Yusuf arilak 10 ebano gandum o’go ’baluogoluk o Mesir ’bigisa. 4Is ’bigisa ’gal Yusuf ot Benyamin enia mesigat a’ge ano, wene mesik ebam omno oluk, aik Yakub ogorlok en perakpo erlakma en mo egei. 5O Kanaan so’boru obouk modok wiak oruakhwe, at Yakub eiyagai emin, aphwami logon a’bik ebano emin, gandum ano o’go ’bali legesa.
6Asogo legesema, at Yusuf ebe gubernur o Mesir ano, aphwami da ya a’ge ’berlegat gandum o’go ’baluogoluk legesa a’ge ebano ebam o’go ’balogu legesa. Asogo ’balogukhwe at Yusuf uelak ebano legesarik ’goluk at ologotma ’gonu oluk hau werigisa. 7Asogo togukhwe, at Yusuf en uelak il ontoluk pobi enebegeitigat de, epenenat pobitu erlak a’ge ’gela’geat welaga. At en iak annisogo re, disogo hin wogentesi,
“His o ’geba en wegep?” oluk hin wogentesimu, is en e,
“Nis o Kanaan en gandum o’go ’baluogoluk wege o,” oluk mo’guligisa.
8At Yusuf en uelak pobi enebegei a’geat de, is en e, at ebe pobitu erlakma en eneperlak welegesa. 9#Kej. 37:5-10Is asogo oruakhwe, at Yusuf abi naduk is enebaget hesi a’ge eberak welagarik eberiselat, at en e,
“His en, nis o yema a’ge no pam nenanni erlak welege a’ge henil ’gogoluogoluk wegep epegi o,” oluk mo’gulentesi. 10Asogo mo’gulentesimu is en e,
“Nue, asogo erlak o. Nis hat heragam a’ge ’gela’ge so’boru nak o’go ’baluogoluk wege o. 11Nis nenebe nenaik mesigat en dogo a’ge o. Nenil ’gogoluogoluk wege erlak o, nue. Nenebabut e, op nak welege o,” oluk mo’guligisa.
12Asogo mo’gulegisema, at Yusuf en e,
“Erlak! His en, nis yema a’ge no pam nenanni erlak welege a’ge henil ’gogoluogoluk wegep o,” oluk mo’gulentesi.
13Asogo mo’gulentesimu, is en e,
“Erlak o, nue. Nis ap nenebe 12 pam dogo a’ge nenaik mesigat nak e, o Kanaan a’ge o, nue. Nonot mesik e, arat waragama re, nonot labo a’ge mesik e, nenaik emin oruak o,” oluk mo’guligisa.
14Asogo mo’guligisa a’ge re, at Yusuf iak lagaksogoat,
“Erlak o. An naduk egi ’gela’ge demat o. His henil ’gogoluogoluk wegep ai an naluk o. 15An en disogo henebabut ’balik. At ’gain onuk logo a’ge Firaun ano onuk pam ho’buk disogo ’balik o. Honot ano yema wago erlak holuk e, his ogo honowi pam modok ’bok lagup erlak oluk, an asogo ho’buk ’balegis o. 16Henebe ap mesigat a’ge nak malik ano wai lo yo. Ado yema oruakhwe re, his egep a’ge ano demat a? Erlak a, oluk naluk emagoluk henebe yema herle werak onobogumu tenhentarok wolomul o. His heniak esei egep holuk, at ’gain onuk logo a’ge Firaun onuk pam, his demat henil ’gogoluogoluk wegep epaik o,” oluk mo’gulentesi. 17Asogo mo’gulentesimu, at en enebe herle werak onobogumu ebano ’gwelebak onoboluk agauwa henagan welegesa.
18Agauwa henaganak a’ge pam at Yusuf en disogo mo’gulentesi,
“An nebe Allah nogorlok welegi a’ge holuk e, wene ebe mesigat yu pam nak henebe erlele wokhenebik o. 19Heniak demat naluk emagoluk, his herle werak onobogumu yema henebe mesigat a’ge nak welemak o. Ye, henebe ado re, heneiyagai so’boru nele en warema no oluk gandum o’go ’baligep a’ge ene’bek woluk lo re, op o. 20Erabu laguptik en, honot labo a’ge ano woluk manup o. Asogo woluk worogupmu en de, his heniak demat naluk emarik e, henebe wathenebik erlak o,” oluk mo’gulentesi.
Asogo mo’gulentesimu, is en e,
“I o, asogo tul o, nue,” 21oluk mo’guligisarik is-is nak disogo egesa,
“Page nonot wiagap pege a’ge ano paget yogodak e’gin nenebam aga o. Naduk at di obotut yu obotut wiak ebam welat iak erlagaiksogo nenebam ese laga a’geat de, nis nenesa’go modok holu erlak nenebakenne ukpege. Asogo wiak tige a’ge ologun pam, yogodak wene wiak a’ge yu nenebam aga o,” oluk egesa.
22 #
Kej. 37:21,22 Asogo egesema, at Ruben en,
“An en e, nonot yu worogup no, oluk mo’gulhentegis a’ge re, his henesa’go holu erlakma en at ebe waraga pam yogodak wene e’gin nenebam aga o,” 23oluk is-is asogo ogwi a’ge ano at Yusuf en modok pobi tegei a’geat de, ap mu a’ge mesik nak e, eniak Yusuf ebam hegitsogo Pei lasuam e, is en e, Yusuf e, is eniak hweliso erlak epegesa.
24Is eniak ano esa’go hwelegeirik e, at Yusuf en enebe ugonoboluk odipmu loluk nge tegei. Nge tegeirik pobuk iak opsogo u a’ge agama, togolik ene’bek ’gwegei. ’Gwegeirik at ue Simeon pulogo wesirik e, ap mu a’ge e’gik herle woruagoluk yo’go pesimu, is enil pam asogo herle weregei.
Yusuf uelak o Kanaan togolik legesa wene
25At Yusuf en at eragam a’ge disogo mo’gulentesi,
“His en e, ap yu onosum ano gandum yagarogulat, is onuang perak hundomok togolik sum ogola yagarogulat so’boru ebela pam no a’ge yagarogulat, tit o,” oluk mo’gulentesimu, is en e, asogoat tigisa. 26Asogo tigisema, at Yusuf uelak ebano gandum o’go ’baligisa a’ge sum pam yagarak a’ge ebano wam keledai ebano o’borl pam pei ligegesarik legesa.
27Asogo ebela pam lagalat, huba’go nogouwogoluk mo egesarik ap mesik wam keledai gandum e’gen wogeigoluk sum herle hebelegeirik at u’gwarek uang perak ano sum emdema ’gwelakhesirik e, disogo egei,
28“A. An no uang perak togolik woknesimu hegi o,” oluk uelak worlentesirik e,
“Uang perak ano nosum ogola yema yagarak o,” oluk mo’gulentesimu, is enede wiak agalat, onogorlok en is-is nak disogo egesa,
“Nenaik Allah en no’gosogo taknenebesi, nonogorlok o,” oluk egesa.
29Pobuk, o Kanaan enaik e’bek ’gwigisarik is tigisa a’ge ebano ’berlek ’beli’gogo mo’gulogulat e, is en e,
30“At gubernur o Mesir a’ge ano iak harosogo nenebam eselat e,
His henebe o yema henil ’gogoluogoluk wegep hegi, oluk mo’gulnentesimu, nis en e,
31Erlak o, nue. Nis nenil ’gogoluogoluk wom erlak o. Nis nenebabut op a’ge nak o. 32Nenebe 12 nenaik mesigat en dogo a’geat de, nonot mesik nak e, arat waraga. Mesik labo a’ge o Kanaan nenaik emin oruak o, oluk mo’guligema 33at ap ’gain ano en e,
His henebe henebabut op a? Wiak a, an disogo naluk eik o. Henebe mesik nak yema an nemin welemak, ye, his ado gandum ano henaiklak heneiyagai so’boru obouk en warema no oluk ene’bek woluk lit o. 34A’ge re, honot labo a’ge ano togolik an ne’bek woluk manup o. Asogo togupmu re, his henebabut op welat henil ’gogologwi erlak a’ge ai an naluk eik o. Asogo togupmu an en honot togolik wokhentaikmu his en o’go ’baluogoluk yema wolorogup op o,” oluk mo’guligisa.
35Asogo mo’gulegisema pobuk onosum gandum sum ano ’gollo hegesema, enebe lo’bok sum wei a’ge pam onouang perak yagarak a’ge hwiarigisa. Asogo onouang hegesarik is emin, enaik Yakub emin, onogorlok a’bik aga. 36Asogo tigisema, is enaik ano en e,
“Eige. An neiyagai ’berlek almarom henagai hegi o. Yusuf arat erlak aga. Simeon arat erlak aga, ye, yogodak his Benyamin woluk lo henagaiat hegi. Eige, di obotut yu obotut nebam modok wiak aga ai hegep a?” oluk mo’gulentesimu,
37at Ruben en, aik disogo mo’gulesi,
“Naik o. An homlogo Benyamin he’bek togolik woluk weik erlak holuk, an neiyagai ’biren ebano, hat en waronobu op o. Not ano an ne’gik pam poluk, pobuk togolik woluk weik o, naik,” oluk mo’gulesimu,
38at Yakub en e,
“Erlak. An nomlogo hat he’birek lo modok erlak o. Mia o. At ue arat waragama. At nak oruakma re, nebit o. Ebela pam en, at ebe no’gosogo wene ebam ema. An nebe arat narlue egimu nomlogo pobuk nalemma re, hat en wiagap noboluk nogola wiak emma wareik o, nomlogo,” oluk mo’gulesi.
Currently Selected:
Kejadian 42: Wul
Highlight
Copy
Compare
Share
Want to have your highlights saved across all your devices? Sign up or sign in
