Keluaran 6
6
1Asogo mo’gulesimu, at Nenaik ’gain Onuk Logo a’ge en Musa disogo mo’gulesi,
“At Firaun en an neiyagai o yema en mukho lebigonobouwagoluk an en at ningsogo mo’gulosoam e’gik selangap poluk lebigenebasumu hil entagunat o,” oluk mo’gulesi.
Allah en Musa yo’go pesi wene
2 #
Kej. 17:1; 28:3; 35:11; Kel. 3:13-15 At Allah en asogo mo’gulesirik, mesik at Musa disogo mo’gulesi,
“Henaik ’gain Nonuk Logo a’ge re, anat o. 3Holuk e, An Allah nanni a’bik ano pam di a’ge yu a’ge tu nak welat, Abraham emin, Ishak emin, Yakub emin, onorogolema inaga legi a’geat de, An nonuk, henaik ’gain Nonuk Logo a’ge anoat o, oluk pobisogo mo’gulonto erlak o. 4An enat e, o Kanaan is naduk enebe ap ’bok ’gela’ge welegesema ebano his wokhentaik o, oluk wene wusogo wogenebegisat ani o. 5Wene wusogo wogenebegis ai en e, is aphwami Israel a’ge aphwami Mesir a’ge en eneragam a’ge ’gela’ge tenentarok oruakma, is e,
Eige, nebit e, oluk ogumu eniak nesa’go hwelegistik e, An en is wene wusogo wogenebegis a’ge ai nede eberegis o. 6Holuk e, An en is aphwami Israel a’ge disogo mo’gulentegis a’ge ai hat en selakmayat mo’gulentai lu o,
At Allah en,
Henaik ’gain Nonuk Logo a’ge re, anat o. Aphwami Mesir a’ge en eneragam a’ge ’gela’ge tenhentarok oruakma, An enat lebikhenebaik ani o. An en his delhenebigoluk e, nanni a’bik a’ge selakma pasulat, aphwami Mesir a’ge wene e’gin a’ge enebam pasulat, tik o. 7An en his neiyagai takhonoboluk e, An henaik Allah weleik ani o. Welat, aphwami Mesir a’ge en eneragam a’ge ’gela’ge tenhentarok oruakma wokhonoboluk liplau wagoam, his en e,
Nenaik ’gain Onuk Logo a’ge Allah at o, oluk pobuk pobi nobogubat ani o. 8An en e, o Abraham emin, Ishak emin, Yakub emin,
O his wokhentaik, oluk wene wusogo wogenebegismu eba wokhonoboluk laik ani o. Laiktik, o eba, his honu’gwarek henebaget eiye modok wolorogup en wokhentaik o. Henaik ’gain Nonuk Logo a’ge re, anat o,” oluk mo’gulentesi. 9Nenaik ’gain Onuk Logo a’ge en,
“Disogo mo’gulontomup o,” oluk Musa mo’gulesi a’ge ano ’berlegat, at Musa en aphwami Israel a’ge mo’gulentai laga. Asogo mo’gulentesi a’geat de, is aphwami Mesir a’ge en eneragam a’ge ’gela’ge tenentarok welat, wik-wiak tagonobogumu no oluk e, enede en e,
“Op ema erlak a’ge paget oso yo,” oluk Musa en wene asogo mo’gulentasuam holho erlak on ’gela’ge ukpegesa.
10Pobuk, at Nenaik ’gain Onuk Logo a’ge en Musa disogo mo’gulesi,
11“Hat hebe Firaun e’bek laguntik e, disogo mo’gulomup o,
Aphwami Israel a’ge o his oruakma yema ukpoluk lebemagoluk mo’gulentagun en wegi o, oluk mo’gulesi lu o,” oluk mo’gulesi. 12Asogo mo’gulesimu, at Musa en disogo mo’gulesi,
“Aphwami Israel onu’gwarek en e, an niak enesa’go holu modok enebit ai o. Holuk e, at Firaun en an niak hwelak wolom a’ge paget oso erlak ai en mo’gulomma, at en niak hwelak poluk tu epegen a? Modok mia o,” oluk mo’gulesi.
13Asogo mo’gulesirik, Nenaik ’gain Onuk Logo a’ge en is Musa Harun e’birek yo’go enebasulat,
“His en disogo mo’gulentai lu o.
Nis en his aphwami Israel a’ge o Mesir yema en wokhonoboluk lebemagoluk yo’go nenebesimu wege o, oluk mo’gulontogulat, ye, at Firaun ano mo’gulogulat,
Nis en aphwami Israel a’ge wogonoboluk libemagoluk yo’go nenebesimu wege o, oluk mo’gulogulat, til lu o,” oluk peragenebesi a’ge re, ai at o.
Musa Harun ene’balak ononuk ’belak wene
14-15Musa Harun ene’balak weigalak a’ge ononuk e yuat o: At Simeon eiyagai ai re, Yemuel, Yamin, Okat, Yakin, Zohar ye, hwe mesik Kanaan a’ge agalogo Shaul ano eminat dagenebegei. At Simeon pam en wigalak dogo ano re ai at o. 16At Lewi eiyagai dogo’gwe a’ge ononuk ano re, Gerson, Kehat, Merari ai at o. Ap Lewi ano dogo oruakhwe tahun 137 takpoluk at waraga. 17#Bil. 3:17-20; 26:57,58; 1Taw. 6:16-19At Gerson pam en dogo a’ge ai re Libni, Simei e’birek at o. 18At Kehat ano eiyagai Amram, Yishar, Hebron, Uziel ano at o. At Kehat ano dogo oruakhwe tahun 133 takpoluk at waraga. 19At Merari ano eiyagai Mahli, Musi, eminat o. Is ap Lewi pam en degel-degel dogo weigelak ano re ai at o. 20Ap Amram ano en at aik ot Yokhebed weisirik eiyagai Harun, Musa e’birek at ebalema at dagenebegei. Ye, Amram ano re dogo aruakhwe tahun 137 at tegei. 21At Yizhar eiyagai Korah, Nefeg, Zikhri at o. 22Ye, Uziel eiyagai ai re Misael, Elsafan, Sithri at o. 23At Harun ano Aminadab eiyagai Eliseba Nahason ot ano wesirik, eiyagai enemin Nadab emin Abihu emin Eleazar emin Itamar emin at ebalema at daganebegei. 24Ye, Korah eiyagai ai re Asir, Elkana, Abiasaf, ai at o. At Korah pam en degel-degel dogo a’ge weigagalak ano ai at o. 25Harun omlogo Eleazar ano en ap Putiel agalogo mesik wesirik, omlogo Pinehas at ebalema at deregei. At Lewi en dagenebegei ano pam enematek lo’bok weiyal egesa a’ge ano, re is ai at o. 26Harun Musa e’birek ano re, o Mesir en aphwami Israel a’ge onosi degelak a’ge lo’bok wogonoboluk libemagoluk at ’gain Onuk Logo a’ge Allah en wene le’gelogo mo’gulentesi ano re, ap mu a’ge erlak, Harun Musa e’birek ai at o. 27Ye, aphwami Israel o Mesir en libemagoluk ap Mesir onue, Firaun, mo’gulegisa a’ge ano mu a’ge erlak Musa Harun e’birek nak at o.
At Allah en e, “Disogo tip, asogo tip,” oluk Musa Harun emin mo’gulentesi wene
28At Nenaik ’gain Onuk Logo a’ge en at Musa o Mesir en mo’guleselat, disogo mo’gulesi,
“Henaik ’gain Nonuk Logo a’ge Anat o. An en di wene yu wene mo’gulhegis a’ge ai, ap Firaun ano mo’gulesi lu o,” oluk mo’gulesi.
29Asogo mo’gulesimu, at Musa en e, disogo mo’gulesi,
“’Gain Honuk Logo a’ge, Naik o. An en wene mo’gulonto re, niak hwelak wolom a’ge ’gela’ge oso erlak ai hat haluk o. Holuk e, at Firaun en an niak hologo tua epegen a? Mia o!” oluk mo’gulesi.
Currently Selected:
Keluaran 6: Wul
Highlight
Copy
Compare
Share
Want to have your highlights saved across all your devices? Sign up or sign in
