Keluaran 31
31
Allah en owi woruagoluk, pulogo enebesi wene
1At Allah en ap Musa ano pobuk mesik emin mo’guleselat,
2-5“Ap Hur eba ap Uri omlogo onuk Bezaleel a’gul onuk Yehuda a’ge ano en emas pam emin, perak pam emin, tembaga pam emin, di a’ge yu a’ge tu a’ge il mu-mu hele’giselat, helep amolit erli penne tak a’ge ebano odoktak poluk hele’giselat, e a’ge pam di a’ge yu a’ge hele’giselat, di a’ge yu a’ge e’gik ’bogun pam tagalat, taga lemagoluk, pulogo pasu lagarik, an narogun emin, di a’ge yu a’ge e’gik ’bogun pam tu a’ge emin, at omu enat ede eberak poluk, tu a’ge emin, aluk ago a’ge emin, ’berlegat wogegis o. 6Ye, asogo tisokhwe, ap a’gul onuk Dan a’ge mesik onuk Ahisamakh omlogo onuk Aholiab en ogo, at lethouwagoluk, edikpasulat, An en is ap ene’gik ’bogun togwi a’ge en tugu lemagoluk enebabut wogentegismu re. Is ’berlagenat tuagoluk an en mo’gulhegis a’ge ai, mo’gulontomup o. 7An nemin hwedik togulomma nowi woru a’ge emin, nepeti heli’gogo wene werak a’ge yagaru a’ge emin, nepeti hele’gik poluk emde laru a’ge o’borl pam an nemin hwedik tuagalomma emin nowi werikmu di a’ge yu a’ge tugulomma emin, 8roti pogulomma e dalu a’ge emin, e delak a’ge ai pam en tugulom a’ge emin, esaga uak emas il op a’ge pam nak hele’gu a’ge paget emin, esaga heberlogulat di a’ge yu a’ge tugulom a’ge emin, e’ben op a’ge odouk narlogulom a’ge emin 9Nebaget wusogo odouk narlogulom a’ge paget emin, narlogulat di a’ge yu a’ge tugulom a’ge paget emin, ene’gik onoyuk emerogwi a’ge ebe emin edip yogo a’ge hele’gu a’ge emin, 10Harun eiyagai enemin en an nebe eiye otluk nebaget tugulat, onosum ’buktak wolom a’ge poligatma re Harun osum emin, eiyagai onosum emin, 11ena’gul pam herlelik pogulom a’ge a’bosu emin, o polik wolomma e’ben op a’ge odouk narlogulom a’ge emin, mo’gulhegis ano ’gela’ge ene’gik ’boguntak tugu lemagoluk, emin takpegi o,” oluk, Musa mo’gulesi.
O agauwa 6 wolotluk loruk o’gwe set hwal horlogulom wene
12At Allah en Musa wene pobuk mesik emin mo’guleselat,
13“Aphwami Israel a’ge mo’gulonto ano re, yuat o, agauwa 6 wolotluk loruk o’gwe re, an nu’gwarek nebaget polik pagathwerlegimu re, is en modok opsogoat enede eberogulat, erliknobogu lemak o. Asogoatma re, is poligenebasu legi a’ge enaik Allah anat enaluk aga lemagoluk, an emin, is emin, eneiyagai dagenebil lagai a’ge emin, wene ai eberak welat, erliknobogwi ano pam is nemin welagai a’ge naluk ema o. 14Agauwa 6 wolotluk loruk o’gwe re, is enebagerat pulogo pegimu re, modok opsogoat eberogu lemak o. Ap mesik en agauwa 6 wolotluk, mesik 7 nebaget pulik a’ge ai pam sagalogo poluk yabuk tago holuk e, at en tago ano o’go warom a’geatma re, ap mesik en agauwa 6 takpoluk mesik 7 nebaget polik a’ge ai pam yabuk tiso holuk e, ue ari ene’gerlakma en a’guluak erlagapsogo pogu lemak o. 15#Kel. 20:8-11; 23:12; 34:21; 35:2; Ima. 23:3; Ula. 5:12-14Agauwa 1 en ’bekhit 6 pam e, yabuk tugulom obat a’geat de, agauwa 6 wolotluk, loruk o’gwe re, weat set hwal horlogulomogoluk, Allah an nu’gwarek nebaget pulogo pagathwerlegimu re, ap mesik en yabuk tago holuk e, o’go re, at ebeat wusogo pogu lemak o. 16Asogoatma re, agauwa 6 wolotluk, tono hubet 7 a’ge ai, is en modok-modok eberak welemagoluk, pulogo pegimu re, is eneiyagai dagenebil laga lema a’ge emin, onogola enagai en eberogulat, erliknobogu lemak o. 17#Kel. 20:11An emin, aphwami Israel a’ge emin, modok-modok eberogu lomogoluk an Allah en agauwa 1 en ’bekhit ’bogorl ’gwiang walholuk loruk o’gwe yabuk tu erlakma en we set hwal hwerlasulat welegi a’ge ano is enede eberak oruak holuk e, an is enemin nede hwedik welagai a’ge ai naluk ema egei, oluk mo’gulontomup,” oluk, mo’gulesi.
18Allah en Musa emin dom Sinai pam en wene arat egesarik, Allah en wene nenesa’go wusogo,
Disogo togu lomup, asogo togu lomup, oluk e’gik pam pelal helep ’biren ebak a’ge pam wesi a’ge ai Musa wogesi.
Currently Selected:
Keluaran 31: Wul
Highlight
Copy
Compare
Share
Want to have your highlights saved across all your devices? Sign up or sign in
