Amos 9
9
Aphwami wene enebam pouwa a’ge paget mo’gulesi wene
1Nenaik ’gain Onuk Logo a’ge ebe, at ebaget wam di a’ge yu a’ge wusogo narlogumu eragam horoksogo edik oruakma yethegi. Asogo welat, disogo mo’gulnesi,
“An nowi werik ’godukmu aphwami odoktogumu eba o’borlogouk uagoluk e, o dit uak wa’gi lekho dainsogo legenak a’ge eba he’gik en uarekma hannisogo dapou lu o. Asogo pou hasuam lebaksogo ’bulogo ’bu agalat, aphwami ena’gul ’bakhegeik modok waronobua o. Ye, is logon enebe waronobua erlak a’ge holuk, an en weim ebiselat, warenebigat o. Asogo warenebisokhwe, is logon hweiyesogo enelaluk libema modok erlak o. 2Is ai logon hweiyesogo opma’gwe aphwami warotluk lagaimu eba demat lo holuk, an en togolik lebik ono’borluomat o. Ye, hweiyesogo ’bogorl pam elit ligom holuk, an en ’belabono ’buomat o. 3Is enil hweiyesogo dom Karmel duk pam ligotluk, an en is enebe hwiogo onoboluk tenagenebasulat, is enebe ik laut ye’gelakma ik al delakma orogobu elit hisak la’bu holuk, an en ’gosu lok iak en lebilenebiso a’ge en lebilonobuagoluk mo’guleselat, tu elirat o. 4Ye, is enebe eneselei a’ge en herle wusogo wogonoboluk lo holuk, an en e,
Enebe modok warenebip o, oluk mo’gulonto elirat o. Ye, an en is enebe op emagoluk puk. Enebe erlak emagoluk nil orlouk weragenebise leik o,” oluk egei.
5Nenaik ’gain Onuk Logo a’ge di a’ge yu a’ge tu nak a’ge ano en ’gwiang o’borlogouk hasuam e, aphwami ’gwiangma welagai a’ge ’berlegat werakma pong worogwi ai ’gela’ge nge a’bik tua o. Ik onuk Nil ebe pam ik ogum lek agalat, deng-deng ’biselat, tago ai ’gela’ge, is ena’gul yat ’gela’ge otluk en pobuk horok ema o. 6Nenaik ’gain Onuk Logo a’ge owi ’bogorl hwerli werak a’ge pam weregei. Ye, o u’gwea ’gela’ge re, ’bogorl dualogo pesi. Ye, ik laut ye’gelak a’ge logon inotluk ’bogorl pam ligemarik ’gwiang o’gwe ’gwesalogo ’bu aga lemagoluk mo’guloso yo. Asogo ’berlegat tago ai, at ’gain Onuk Logo a’ge enat o.
7Nenaik ’gain Onuk Logo a’ge en disogo egei,
“His aphwami Israel a’ge yu. An en his nilen wokhenebise legi ai ’gela’ge, aphwami Etiopia a’ge nilen wogenebiso erlak epegep? Ye, an en his henebe o Mesir en wokhonoboluk liplau wegi ai ’gela’ge, is aphwami Filistin a’ge o ik e’genma onuk Kreta en wogonoboluk wagalat, aphwami Siria a’ge o Kir en wogonoboluk wagalat, tegis erlak no? Tigisayat o. 8An henaik ’gain Nonuk Logo a’ge en his aphwami Israel en wiak togu legep a’ge yu. His honue onuk logo a’ge en eragam tenhentarok welagoma yema nil orlouk wathenebise legi o. Holuk e, henebe o ’gwiangma di owi yu owi en erlagap henebik o. Asogo a’geat de, aphwami Israel a’ge Yakub en dogo’gwe a’ge henebe modogat erlagap henebik erlak o, oluk an henaik ’gain Nonuk Logo a’ge en arat egi o.
9An en wene edip lebikpoluk, aphwami Israel a’ge, enebe aphwami ena’gul onuk lo’bok ene’gerlak o’gwe peragonoboluk aphwami en gandum e’gen degelogwi ai ’gela’ge, degelenebik o. Degelenebiselat, e’gen op a’ge mesik ukpaik erlak o. Wiak a’ge nak ukpaik o. 10Asogo a’geat de, is aphwami logon wiak togwi a’ge an neiyagai ene’gerlakma welagai a’ge en e,
Nis modok wiak a’ge nenebam emagoluk Allah en taknonobua erlak o, oluk ogwi a’geat de, is enebe pobuk weim obogulat waronobuayat o,” oluk egei.
Aphwami Israel a’ge enebe pobuk togolik obap onobua wene
11 #
Per. 15:16-18
Nenaik ’gain Onuk Logo a’ge en asogo egeitik, mesik disogo egei,
“At Daud onuk logo a’ge en eragam tenentarok welaga ai a’ge yogodak e, o werik a’ge orlo’buk oluk welago ai ’gela’ge lai lagarik oruak a’geat de, an en pobuk togolik o logogwi ai ’gela’ge legeselat, o hebat delek hele’gik a’ge dopnosogo weriselat, asogo takpaikmu pageat op welaga ’gela’geat tik a’ge oruagat o. 12Pobuk aphwami Edom a’ge ado pema enelaluk oruak a’ge emin, aphwami ena’gul onuk logon o pageat en, an nonuk oluk e,
An Allah neiyagai, oluk mo’gulentasu legi a’ge ai emin, aphwami Israel a’ge en ene’gik pam tenentarok welema o, oluk wene ai an henaik ’gain Nonuk Logo a’ge ebe tik a’ge en arat egi o,” oluk egei.
13Nenaik ’gain Onuk Logo a’ge en asogo egeitik, mesik disogo egei,
“Pobuk e, gandum owi yogo a’ge e’gen owan ’balogukhwe, pobuk a’ge yabuk ebe wogulat, anggur owi owan yorogukhwe, e’gen ’balogo a’bosu arat na’gogulat, togu lema ani o. Ye, anggur e’gen a’bosu dom pam en ik dep-dep egeik ’bu ago ’gela’ge ’bu agalat, ik elaruk porlolu tago ’gela’ge ’gulogo duk pam en ’bu agalat, taga lema a’ge oruagat o. 14Pobuk an en aphwami Israel a’ge pobuk togolik op welemagoluk tagenebaik o. Onowi kota moluk egei a’ge ai, is en pobuk togolik utholuk, enebe eba welema o. Welat, anggur owi yakho e’gen ’balogo no’gulat, yabuk ebe wokho, di a’ge yu a’ge yogo poluk, ebe ’balogulat, dorogulat, no’gulat, togu lema o. 15Di a’ge yu a’ge owi yorogwi ai ’gela’ge, pobuk an en neiyagai onowi wogentegismu eba modok-modok welemagoluk enebaik o. Ye, di a’ge yu a’ge yogo a’ge is logon en henokho hwikhogwi ai ’gela’ge, is enebe onowi pam eba en o momu akhen wogonoboluk laga lema modok erlak o, oluk an henaik ’gain Nonuk Logo a’ge en arat egi o,” oluk egei.
Currently Selected:
Amos 9: Wul
Highlight
Copy
Compare
Share
Want to have your highlights saved across all your devices? Sign up or sign in
