Amos 7
7
Nenaik ’gain Onuk Logo a’ge En Wene Enebam Pouwa A’ge Amos Abi ’Gela’ge Pam Yethesi Wene
Ho’bukhak en di e’gela yu e’gela ’berlegat perlengsogo nasumu yethesi wene
1Nenaik ’gain Onuk Logo a’ge en mesik yethuagoluk tagoam nabi ’gela’ge pam yethegi. Aphwami en e’gela is aphwami Israel a’ge onue ’gain onuk logo a’ge ’baligisarikmu en, e’gela pobuk ligagokhwe eria pam, at Allah en ho’bukhak oluk esan logolak modok a’bik a’ge walsogo pesimu yethegi. 2Asogo heli’gogo pesimu, at ho’bukhak ai en di e’gela yu e’gela ’berlegat ’gwiangma en ’baktak a’ge perlengsogo nasumu hegi o. Asogo yethegirik, Nenaik ’gain Onuk Logo a’ge disogo mo’gulegis,
“Allah ’gain Honuk Logo a’ge, naik. Heiyagai Israel a’ge enebe lok enanni oruak no? Is elit tu no? Mia o. Ai en e, is wiak tigisa a’ge sagalogo erlagap pemen o, naik,” oluk yo’go ebegi.
3Asogo yo’go ebegimu, at en ede epesi a’ge erlagap poluk disogo mo’gulnesi,
“Hat en hil yethegen ai pobuk ebe ema erlak o,” oluk mo’gulnesi.
Allah en aphwami Israel a’ge odouk pam warenebisoma yethesi wene
4Nenaik ’gain Onuk Logo a’ge en asogo mo’gulnesirik, mesik tisoma nabi ’gela’ge pam yethegiat o. At Nenaik ’gain Onuk Logo a’ge en e, aphwami Israel a’ge odouk pam warenebigoluk degelogo pasumu yethegi. Odouk ai en e, ik laut lok ye’gelak emin, ’gwiang yabuk o’gwe emin, perlengsogo nasumu yethegi o. 5Asogo yethegirik niak loksogo disogo mo’gulegis,
“Allah ’gain Honuk Logo a’ge, naik. Heiyagai Israel a’ge enebe lok enanni oruak no? Is e, elit pangtu no? Mia o. Ai en e, odouk ai yamugap tin o, naik,” oluk yo’go ebegi.
6Asogo yo’go ebegimu, at Nenaik ’gain Onuk Logo a’ge ede epesi a’ge ai erlagap poluk disogo mo’gulnesi,
“Hat en hil yethegen ai, pobuk ebe ema erlagat o,” oluk mo’gulnesi.
Herle elira’ge e’gikmu tenak oruakma yethesi wene
7Nenaik ’gain Onuk Logo a’ge en asogo mo’gulnesirik, mesik tisoma nabi ’gela’ge pam yethegiat o. Nil asogo yethegi ’gal e, at ebe leget pakleget herle elira’ge pam walholuk en werigisema lo’boksogo edik welat,
Leget pakleget ebe ’gorlo a? Hegit a, oluk walhaigoluk herle elira’ge a’ge e’gikmu tenakho oruakma yethegi. 8Asogo tenakho welat, disogo mo’gulnesi,
“Amos. Hil yethau wegen yu, no yethau wegen no?” oluk mo’gulnesimu, an en e,
“Ai re, herle elira’ge,” oluk mo’gulegis. Asogo mo’gulegismu, at en e,
“An en herle elira’ge yu wegirik en tegis yu re, an neiyagai enebe leget pakleget ’gorlo oruak ai ’gela’ge, oluk wegirik tegis o. ’Gorlo oruak en, an en,
Disogo tik, oluk egi a’ge ai, mo u erlakma en demat wene enebam paigat o. 9Ap Ishak en dogo’gwe a’ge en dogwi asua paget togumu eba ’goluk-’gelaksogo ’bo pasulat, aphwami Israel a’ge en,
Modok asuama, oluk ogumu ’goluk-’gelaksogo wiagariselat, at ’gain onuk logo a’ge Yerobeam en dogo’gwe a’ge enebe modok erlagap paigoluk ’garok ne’gik en wasulat, tik o,” oluk mo’gulnesi.
Amos ap Amazia e’birek wene ’baligisa wene
10Asogo egeimu, ap Amazia dogwi asua o Betel welaga a’ge eiye a’ge en ap logon yo’go enebesirik wene aphwami Israel a’ge onue onuk logo a’ge Yerobeam mo’gulesi louwagoluk disogo egei,
“Nue. Ap Amos ap Israel a’ge emin en hat hiak erlak emagoluk wene arat egesema o. At en iak asogo osokhwe ukpagup holuk, o yema wiak ema o. 11Asogo oso modok welat e,
At ’gain onuk logo a’ge Yerobeam ebe weim obogulat werak poluk e, his aphwami Israel a’ge herle wusogo his honowi pam ukpoluk o walegat eba wokhonoboluk louwa, oluk osoat oruak o,” oluk mo’gulesi louwagoluk peragenebesi. 12-13At Amazia en asogo peragenebesimu legesema, Amos disogo mo’gulesi,
“Hat Allah iak mo’gulentasu legen a’ge yu. O werik yu re, at nis aphwami Israel a’ge nonue onuk logo a’ge, Allah u’gwarek ebaget tagalat, nis aphwami Israel a’ge ’berlegat odoktak poluk togulat, togu legema ai en e, hat en Allah iak o Betel yema en mo’gulentasu lorogun no yo. We, togolik o Yehuda etleba loluk, Allah iak mo’gulentasulat, honso’boru no a’ge heratagalat, taga lomup o,” oluk wene yaknesi.
14Asogo wene yaknesimu, an Amos en e,
“An nebe re, ap Allah iak mo’gulontogwi a’ge ano a’ge erlak o. Ap Allah iak mo’gulontogwi a’ge mesik omlogo puk o. We, an niabuk e, domba wam tenakho welat, e ara e’gelema a’ge e’gen daganiselat, tago a’ge o. 15Asogo a’geat de, Nenaik ’gain Onuk Logo a’ge en an niabuk asogo tagoma yo’go nebesirik, iak aphwami Israel a’ge mo’gulontuagoluk nebam pesimu o. 16Ai en e, Nenaik ’gain Onuk Logo a’ge en egei a’ge mo’gulheik a’ge yu, hesa’go opsogo hwelin o. Hat en mo’gulneselat e,
Hat en,
Aphwami Israel a’ge, ap Ishak dogo’gwe a’ge en togu legep ai wiak. Ai en e, wiagaphonobua, oluk Allah iak mo’gulontogulom modok erlak o, oluk, wene ’baligen ai en, 17Nenaik ’gain Onuk Logo a’ge en e, hat hugwe danian a’ge otluk, o kota ’gwe ebela ebayat dedelil denaga lema o. Ye, heiyagai enebe weim obogulat waronobogulat, hat hebe aphwami Allah eneperlak a’ge onowi pam eba waragalat, tua ani o. Asogo tumu re, hat hiabuk a’ge aphwami logon en elira’ge walholuk so’busogo pagathorlouwa o. Ye, aphwami Israel a’ge enebe herle wusogo is onowi pam ugonoboluk o walegat eba wogonoboluk louwayat o,” oluk mo’gulegis.
Currently Selected:
Amos 7: Wul
Highlight
Copy
Compare
Share
Want to have your highlights saved across all your devices? Sign up or sign in
