Amos 1
1
Allah en, at iak Amos en mo’gulentasu lemagoluk ebam pesi wene
1 #
2Raj. 14:23-29; 15:1-7; 2Taw. 26:1-23 Ap Uzia ebe aphwami Yehuda a’ge onue onuk logo a’ge welat, tenentarok welaga. Ye, ap Yoas omlogo Yerobeam aphwami Israel a’ge onue ’gain onuk logo a’ge welat, tenentarok welaga. Is en asogo tenentarok welegesa eria pam, Allah en e, wene aphwami Israel a’ge mo’gulontuagoluk ap Amos owi kota onuk Tekoa ai a’ge ebe wam domba tenakho welaga a’ge ai pam pesi. Asogo pesirikmu en, 2 tahun oruakma en mouk ai waga. 2#Yoe. 3:16Asogo ebam pesimu, at Amos en e,
“Nenaik ’gain Onuk Logo a’ge ebe odom Sion pam welat, iak hum oso. O Yerusalem welat, iak orlolu iak ’gela’ge oso. Asogo osoam, o leimu wam domba tenakho welagaimu e’gela ’berlegat ’buk agalat, e’gela dom Karmel pam a’ge modok sawet agalat, tegei o,” oluk egei.
At Allah en aphwami Israel a’ge eneragam o’gwe o da ya welagai a’ge wene enebam pouwa wene
Aphwami o Siria a’ge wene enebam pouwa wene
3 #
Yes. 17:1-3; Yer. 49:23-27; Zak. 9:1 Nenaik ’gain Onuk Logo a’ge en asogo egeitik, mesik aphwami Siria a’ge enebaget disogo egei,
“Is aphwami o Damsyik welagai a’ge, pobuk-naduk wiak togwi welagai ai en, an en mo u erlakma en demat wene enebam paik o. Is en e, aphwami Gilead a’ge enebe enedeap onobo erlakma en modok wik-wiak tagenebegesa ai o. 4Asogo tigisa ai en, an en ap ’gain onuk logo a’ge onuk Hazael owi pam odouk perakpou agoam, ap ’gain onuk logo a’ge Benhadad eleget pakleget werik a’ge odouk nouwa o. 5O Damsyik leget pakleget emde ’belak lerak a’ge ’berlegat an en wiagap pasulat, aphwami o Awen do’goma welagai a’ge ai, enebe welagaimu eba en perlengsogo modok mukho lebigenebasulat, tik o. Asogo tagalat, at ’gain oluk ’bouwa’gun tenakho o kota onuk Bet-Eden welago a’ge ’bouwa’gun ai delogo wasulat, aphwami o Siria welagai a’ge herle wusogo o Kir wogonoboluk lasulat, tik o, oluk an ’gain Nonuk Logo a’ge en egi,” oluk egei.
Wene aphwami Filistin a’ge enebam pouwa wene
6 #
Yes. 14:29-31; Yer. 47:1-7; Yeh. 25:15-17; Yoe. 3:4-8; Zef. 2:4-7; Zak. 9:5-7 Nenaik ’gain Onuk Logo a’ge en asogo egeitik mesik aphwami Filistin a’ge enebaget disogo egei,
“Is aphwami o Gaza welagai a’ge pobuk-naduk wiak togwi modok welagai ai en, an en mo u erlakma en demat wene enebam paik o. Is en e, aphwami ena’gul onuk mesik enebe ’berlegat eneragam a’ge ’gela’ge wogonoboluk legesarik, aphwami Edom a’ge enebam o’go wegesa ai o. 7Asogo tigisa ai en, an en odouk o Gaza leget pakleget werikmu perakpou agoam odouk modok nouwa o. 8An en aphwami o Asdod welagai a’ge emin, ye, onue ’gain oluk ’bouwa’gun tenakho o Askelon welago a’ge emin, ’berlegat erlagap poluk, aphwami o Ekron a’ge wene enebam pasulat, aphwami Filistin a’ge ado enelaluk oruak a’ge ai ’berlegat, enebe erlagap enebasulat, tik o, oluk an henaik Allah ’gain Nonuk Logo a’ge enat egi o,” oluk egei.
Wene aphwami o Tirus a’ge enebam pouwa wene
9 #
Yes. 23:1-18; Yeh. 26:1–28:19; Yoe. 3:4-8; Zak. 9:1-4; Mat. 11:21,22; Luk. 10:13,14 Nenaik ’gain Onuk Logo a’ge en asogo egeitik, aphwami Tirus a’ge enebaget disogo egei,
“Is aphwami o Tirus welagai a’ge pobuk-naduk wiak togwi modok welagai ai en, an mo u erlakma en, demat wene enebam paik o. Is en e, aphwami ena’gul onuk mu a’ge paget,
Nenemin nare-hare op wolomul o, oluk egesa a’ge ai sagalogo, enebe ’berlegat eneragam a’ge tagonoboluk, aphwami Edom a’ge enebam o’go wegesa ai o. 10Asogo tigisa ai en, an en e, odouk o Tirus leget pakleget pam perakpou wagoam, odouk modok nouwa o,” oluk egei.
Wene aphwami o Edom a’ge enebam pouwa wene
11 #
Yes. 34:5-17; 63:1-6; Yer. 49:7-22; Yeh. 25:12-14; 35:1-15; Oba. 1:1-14; Mal. 1:2-5 Nenaik ’gain Onuk Logo a’ge en asogo egeitik, aphwami o Edom a’ge enebaget disogo egei,
“Is aphwami o Edom welagai a’ge en pobuk-naduk wiak togwi modok welagai ai en, an en mo u erlakma en, demat wene enebam paik o. Is en e, enarilak Israel a’ge enebe enedeap onobo erlakma en, waronobogulat, onolot het enebam pogulat, enebam wene e’gen poluk welat, tigisa ai. 12Asogo tigisa ai en, an en odouk o kota Teman perakpou wagoam, o Bozra leget pakleget ningsogo werik a’ge odouk modok nouwa o,” oluk egei.
Wene aphwami o Amon a’ge enebam pouwa wene
13 #
Yer. 49:1-6; Yeh. 21:28-32; 25:1-7; Zef. 2:8-11 Nenaik ’gain Onuk Logo a’ge en asogo egeitik, aphwami Amon a’ge enebaget disogo egei,
“Is aphwami ena’gul onuk Amon a’ge en pobuk-naduk wiak togwi welagai ai en, an en mo u erlakma en demat wene enebam paik o. Is en onowi pam eba lok wiyalemagoluk weim obogulat, hwami o Gilead enemalik onogola a’ge onogum ’bakhegeik warenebigisa ai o. 14Asogo tigisa ai en, an en odouk o kota Raba pam perakpou wagoam leget pakleget ningsogo werik a’ge odouk nouwa o. Eria hegit e, ap weim obogulat eniak a’bik sup ogwiam eniak enesa’go holholuk, weim sogwei loksogo punhau wago ’gela’ge abolung wiak modok obogumu ontogulat, tua o. 15Asogo obogulat, is onue onuk logo a’ge emin, osilak ’gaindek emin, ene’gik herle wusogo wogonoboluk louwa o, oluk an ’gain Nonuk Logo a’ge en arat egi o,” oluk egei.
Currently Selected:
Amos 1: Wul
Highlight
Copy
Compare
Share
Want to have your highlights saved across all your devices? Sign up or sign in
