Peragenebesi 20
20
At Paulus o Makedonia wagarik, ’bekhit o aphwami Yunani a’ge onowi pam waga wene
1O kota Efesus eniak a’bik sagalogu legesa a’ge ano erlak agama, at Paulus en e, is aphwami Yesus iak wegesa a’ge worlontoluk enesa’go weregei. Enesa’go wusogo hau waronoboluk e, ebe o propinsi Makedonia waga. 2O Makedonia eba neselat e, wene loksogo mo’gulentasulat, enede ago wetil nese lagarik, o aphwami Yunani a’ge onowi pam waga. 3Wagarik, dugwi henagan eba welaga. Eba welagarik e, pobuk ik so pam ik olo’gwe toluk o propinsi Siria laigoluk degelisoma, aphwami en e, disogo mo’gulegisa,
“Is aphwami Yahudi a’ge en wathobuogoluk wa’gun ’gabuligisarik oruak o,” oluk mo’gulegisema esa’go hwelegeitik, togolik o propinsi Makedonia akhit laigoluk tegei. 4Laigoluk tisoma, ap Sopater, Pirus omlogo, owi o Berea a’ge o, Aristarkhus, Sekundus e’birek onowi o Tesalonika a’ge o, Gayus owi Derbe a’ge o, Timotius o, Tikhikus Trofimus e’birek onowi o propinsi Asia a’ge o, enemin legesa. 5Is naduk legesarik e, o Troas eba yetnentarok welegesa. 6Asogo yetnentarok oruakhwe, aphwami Yahudi a’ge seni lok a’ge so’boru roti periso erlak a’ge ano ne’gesema re, nis o Filipi en ik olo’gwe ik so pam toluk o Troas lagalat, nogo agauwa huaben oluk, is o Troas oruakma entai legerik, eba welat nogo agauwa sabiren welege o.
At Paulus ologun ’goboksogo aphwami o Troas a’ge entil lasulat tegei wene
7Nis o eba welat, Allah paget weat welegerik e, huba’go so’boru roti a’ge nenarilak nonorokhwi nemin nouwogoluk odoktak poluk, at Paulus en wene mo’gulnentasu laga. Hubet o’gwe arat louwogoluk e, wene yat wiak mo’gulnentasulat, hup ede ’burl ogo mo’gulnentasu modok welaga. 8O holi’bo lok werikmu odoktigema eba, esaga lampu esanat ’gwielak welaga. 9Asogo odoktigerik e, ap souwe a’ge mesik onuk Eutikhus, jendela emde ’belakma hweriogo welaga. Hweriogo welat e, Paulus wene yat wiak modok oso welaga ai en, nogo il agarik e, ’gunalogo nogogei. Nogosoma, o holi’bo o holu hwerli henagan pam louk-louk werikmu ebe erabuno enat dung ’bu aga. Dung ’bu agama, ha ’bu egesa ’gal e, modogat waragarik oruakma wegesa. 10Wegesema, Paulus ebe ’bu agarik e, werak ano ebam ’bou egeitik e’gik en ebagase parliksogo tenak poluk e,
“Waragama oluk, henede porogup o. Ebe elaluk oruak o,” oluk mo’gulentesi. 11Asogo mo’gulontoluk togolik libagarik e, so’boru roti a’ge ’gusogo ne’gesarik nin pobuk wene yat wiagat mo’gulentasu lagarik e, o dakha egeimu Paulus ebe o momu laga. 12Lagama re, ap souwe ano elaluk a’ge owi pam woluk lagalat, elaluk aga a’ge ai paget onogola enagai a’bik hogulat, tigisa.
O Troas en e, o Miletus legesa wene
13At Paulus en e,
“His ik so pam ik olo’gwe toluk o Asos lit o. An ’gwiang o’gwe weik o,” oluk wene werak nenebesimu, nis naduk ik so pam o Asos eba legerik e, o eba en at ebe wik-wok emin louwogoluk, nis naduk o Asos lege. 14Legerik e, o eba en at ebe emin sarlok toluk, nenemin ik so pam toluk o Metilene lege. 15O Metilene en, ik so pam ik olo’gwe legerik e, hubet ’gela’ge, ik e’genma o Khios ai ukpoluk, hau ’gela’ge re, ik e’genma o Samos ai ’gwanisogo ukpoluk e, ua ’gela’ge o Miletus lege. 16At Paulus en ogola epasulat e,
“An o propinsi Asia yema mago tisokhwe re, seni Pentakosta paget is nolukmu laikno oluk, o kota Efesus ’gwilo erlakma en ’bekhit o Yerusalem elit laikmu en nouwa holuk e, op o,” oluk ogola opoluk, elaluesogo laigoluk tegei.
At Paulus en aphwami o Efesus a’ge enesa’go wusogo onoboluk laga wene
17At Paulus ebe o Miletus eba welat e, is ap Allah eiyagai o Efesus a’ge tenentarok welegesa a’ge enebe wemagoluk wene wusogo perakpesi. 18Wene wusogo perakpesimu enebe wegesema re, at Paulus en e, disogo mo’gulentesi,
“An naduk o propinsi Asia wegi ai hwerli en, henemin modok welat taga legi a’ge henalugat o. 19Is aphwami Yahudi a’ge en nebe watnobuogoluk nobok ’balogulat wik-wiak taknobogukhwe, nu’gwarek en nede sebelogo, erliktu erlakma enat, nge a’bik tagalat e, nonue ’gain Onuk Logo a’ge eragam welat at ebaget taga legi ano henalugat o. 20Asogo tagalat e, wene his mo’gulhonto a’ge mo u erlakma enat, aphwami odoktak oruakma en, wene mo’gulhentasulat, honowi lo’gwe lo’bok en, wene mo’gulhentasulat, taga legi ano henalugat ani o. 21An en aphwami Yahudi a’ge emin, Yunani a’ge emin, henesa’go weriselat e,
Wiak togu legep a’ge ukpoluk, henebabut heberlotluk e, honolukhwe Allah wogemis o. Wogotluk e, henede nonue ’gain Onuk Logo a’ge Yesus ebam he’berik poluk wogorogup en mo’gulhentasu legi ai o. 22A’ge re, yogodak Allah Arogun enat nogola ’gagalegeimu, iak hologo, o Yerusalem laiogoluk taga legi yu i o. Eba lolukmu en no’gosogo taknobouwa hwe. An neperlagat o. 23Asogo neperlak a’geat de, an o kota agaikhe en agaikhe lasu leikmu eba ’berlegat at Allah Arogun en e,
He’gik herle worogulat, di obotut yu obotut hebam pogulat, tua ani o, oluk mo’gulnoso ai nak e, naluk o. 24#2Tim. 4:7Asogo a’geat de, an nebe nelaluk wolom aiat logo oluk ai a’ge logo pasu legi erlak o. Nonue ’gain Onuk Logo a’ge Yesus en yo’go nebasulat, at en e,
Allah ebabut op en tagenebasu a’ge op wene aiat mo’gulentil lu o, oluk yo’go nebesi a’ge ano ologun pam ’goboksogo tiogoluk logo pasu legi o.
25An his narilak norokhwi ’berlegat wene Allah eragam ’goluk wolomul ai wene mo’gulhentil neselegi ai re, hwerli yogodak ya en e, his en pobuk norogole henil niagup erlak o, oluk an nalugat o. 26-27Asogo Allah ede epesi wene ai, an nogola sebelogo mo u erlakma en modogat ’baksogo mo’gulhentasu legi ai en e, his logon pobuk wiak orogup holuk e, wene an nebam e, erlak o, oluk mo’gulhentegis o. 28Wam domba wam ’gwelagentarok welagai ai ’gela’ge, his en Allah eiyagai ’gwelagentarok welemagoluk, at Arogun en yo’go henebesi a’ge ai, ’gwelagentarok welat e, honu’gwarek henepe heberlogo wolomup o. Asogo henepe heberlogo welat e, Allah eiyagai yema, at u’gwarek omlogo emep pam wogenebegeimu enebe at u’gwarek eiyagai oruak, oluk opsogo ’gwelagentarok wolomup o. 29A’ge re, mene orlomene anni wiak a’ge en wam ukpo erlakma en modok nasu ai ’gela’ge, an nebe laikmu re, is logon Allah eiyagai his en ’gwelagentarok welegep a’ge ai wiagabenebil ’guma a’ge oruak ani o, oluk e, an nalugat o. 30Asogo wiagabonobogukhweat de, ap his a’ge logon inotluk e, aphwami Yesus iak wegesa a’ge lisogo wogonobuogoluk, wene eniak esei a’ge mo’gulontogu lema ani o. 31Henede we’gerlogo wolomup! An o mo ligom ’bugom osokhwe 3 tahun henemin welat e, mo u erlakma en, erlige en, huba’go en, nge tagalat, henebe lo’bok henesa’go werise legi ano, henede eberak wolomup o. 32Wene Allah ebabut op en woknenebiso ai wene hene’gik ningsogo tenakho weleripogoluk, mo’gulhentegis o. Yogodak e, at Allah anni oruak a’ge en, wene ai pam henede hurleaphenebasulat, di a’ge yu a’ge at eiyagai wogentaigoluk enebesi a’ge wokhentasulat, elit tu a’ge e’gikmu henebegi o. 33An nede en e, his hena’ge uang emas a’ge emin, perak a’ge emin, honosum emin, nagai oluk mesik opo erlak. 34We, an emin, ap an nosi ne’berlik no’gwi a’ge emin, di a’ge yu a’ge erlak en, an nu’gwarek ne’gik en mesik herasogo horlogu lege ai henalugat o. 35Wene nonue ’gain Onuk Logo a’ge Yesus u’gwarek en disogo mo’gulnentesi ai,
Is aphwami logon en wokhontogwiam horloluk honogola henagai ho mia o. We, at e, his honu’gwarek en is muon wogontogulat nak e, honogola henagai ho yo, oluk mo’gulnentesi ai nenede eberak welat e, an en is logon enanni erlak a’ge lerentasu legi ai, his en pobirak noboluk an nebabut wik-wokhene’gik annisogo lerontogulom ebele paget oluk mo’gulogo taga legi ai o,” oluk mo’gulentesi.
36Asogo mo’gulentesirik e, odogorlu pam huragarik, is ’berlegat enemin welat se’ban egei. 37Se’ban egeimu re, is ’berlegat nge a’bik togulat e, Paulus ebe ebagase parliksogo tenak poluk, enemde motok hau wit-wat, hau wusogo perakpegesa. 38Se’ban owan u erlak welat, at Paulus en e,
“His en an pobuk norogole henil niagup erlak o,” oluk mo’gulentesi a’ge ano enede eberigisarik, enede modok wiak agarik, ebe hau wusogo woluk e, ik so ano oruakma legesa.
Currently Selected:
Peragenebesi 20: Wul
Highlight
Copy
Compare
Share
Want to have your highlights saved across all your devices? Sign up or sign in
