2 Korintus 13
13
At Paulus en wene ologun ’goboksogo enesa’go weriselat, hau warenebiselat, tegei wene
1 #
Ula. 17:6; 19:15 An naduk agauwa ’birenam hene’bek wegirik e, pobuk mesik weik ai o. Allah iak pam pelal disogo oluk wogo oruak,
“Aphwami en is logon di wene yu wene enebam pouwogoluk holuk e,
aphwami logon enebe ’biren de a? Henagan de a, wiak togukhwe enil hegesa a’ge en,
Demat nenil hege o, ogwi holuk e, demat opo yo,”
oluk egei ai en e, an weiktik, ai ebelesogoat tu weik ai o. 2An naduk agauwa mesik wegirik pobuk wegi ai pam, is aphwami his a’ge logon naduk wiak tigisa a’ge emin, ye, is ado pema o eba a’ge enebe ’berlek emin, enesa’go weregis a’ge yogodak an nebe walekma welat enede ebesogo mo’gulentaigat o. An pobuk weiktik e, is ai sebelogo onobou weik erlak o. We, wene enebam pou weik o. 3His en e,
“Paulus ai re, Kristus ogola welat oso a? Erlak a,” oluk nebabut ’baluogoluk egep ai re, nebe wagoam enagat pobi nobogup o. At Kristus his togu legep ai paget ebe maben en ebakhenne mo oso puk. At his henemin welat anniat oruak o. 4At Kristus ebe maben en oruakma e pam edikpoluk werigisa a’geat de, at Allah anni pam elalugaptegeimu elalugat welago. Ai ’gela’geat, nis at emin hwedik welat maben welege a’geat de, at Kristus emin hwedik nenelaluk welat e, Allah anni pam his henebaget tumul o.
5His en e,
“Nis nenede Kristus ebam he’berik pege ano he’berigat welege a? Erlak a,” oluk honu’gwarek en henebabut dokhumsogo ’balhorlomup o. Asogo ’balhorlogulat, mia ago erlak holuk,
“Yesus Kristus nonogola oruak o,” oluk enagat hagup o. 6Ye, his en, nis nenebabut ’balogulat,
“Paulus lak enebabut ’balige a’ge mia om erlak. Kristus en demat yo’go enebesimu o,” oluk enak a’geat nontogu legep epegi. 7Nis en e, his wiak mesik togupno oluk, Allah yo’go pogu lege o. Ai re, his en henil nontogulat e,
“Paulus lak op togwi o,” oluk nenebabut ’balogo ogu lorogup en ogu lege erlak o. Nis nenebabut ’balogwiam, his en,
“Is mia ’gela’ge egesa o,” epagup holuk e, yogunat o. Ukpemit o. Hisat op togu lorogup en his henebaget Allah yo’go pogu lege o. 8Ai re, nis en dem wene sagalu re, mia. We, logo po a’ge nak welege o. 9Nis maben oruakhwe re, his henanni oruak ’gela’ge wolom holuk e, op o, oluk, nonogola nenagai hogu lege o. Ai pagerat, his henede ’garoksogo hurle emagoluk, Allah yo’go pogu lege o. 10Ai en e, nebe walekma welat wene yu pelal wokho pasu legi o. Nebe pobuk weikmu nemin welat e, niak harosogo wene yakhentaikno oluk e, pelal asogo wokho pasu legi ai o. Nonue ’gain Onuk Logo a’ge en anni woknesimu eiye welegi ai re, his henebe wiagaphonobuagoluk puk. We, henede hurleaphonobuagoluk eiye welegi o.
11Narilak norokhwi. Wene ologun ’balogo re, disogo mo’gulhentaik. Honogola henagai hogulat, henede ’garoksogo hurleap pogulat, togu lomup o. Wene henesa’go wetil wegi ai, henesa’go opsogo hwelip o. Henede mesigat welat, henemin la’bulogo wolomup o. Asogo togu lorogup holuk e, Allah en aphwami edeabenebiselat, opsogo is enemin la’bulik enebasulat, tiso a’ge ano en, ’gwelakhentarok welema o.
12His-his e, Allah paget hau henemde motok wat-wat til laga lomup o. Allah eiyagai yema a’ge ’berlek en e, hau wathenebigisayat o.
13Nonue ’gain Yesus Kristus ebabut op ano pam obaphenebiselat, nenaik Allah en edeaphenebiselat, Arogun en la’bulogo henebasulat, taga lemak o.
Currently Selected:
2 Korintus 13: Wul
Highlight
Copy
Compare
Share
Want to have your highlights saved across all your devices? Sign up or sign in
