2 Korintus 1
1
Hau warenebegei wene
1 #
Per. 18:1
Narilak norokhwi. An Paulus Allah ede eberegei pam, Yesus Kristus en yo’go noboluk e, peraknobou waga a’ge ano nenare Timotius ano ne’birek en his Allah eiyagai o Korintus odoktogu legep a’ge emin, o propinsi Akhaya da ya eba welegep a’ge ’berlek emin, wene yu pelal wokho hene’bek perakpou wege ai o. 2Nenaik Allah nonue ’gain Onuk Logo a’ge Yesus Kristus e’birek enebabut op ano en, op a’ge wokhontogulat, henede ha’bugaphonobogulat, togu lemak o.
“An en Allah hau werise legi o,”
oluk mo’gulentesi wene
3Nonue ’gain Onuk Logo a’ge Yesus Kristus aik Allah ai erliktogu lomok o. At nenaik Allah ebabut opma re, aphwami di paget yu paget enede wiak oruakma, edeabonoboluk enede obabenebiso yo. 4Aphwami logon di e’gin yu e’gin hogulat enede wiak oruakma, nis en is enede op emagoluk enede sebeluagoluk e, at Allah en nis asogo di e’gin yu e’gin hogulat nenede wiak agoam, nenede sebeliso yo. 5At Kristus di obotut yu obotut hil-hil pobuk ebenagaikmu loksogoat hesi ai ’gela’ge, nis asogoat hogu lege o. Asogo hogumu at Kristus en nis nenede op otluk pobuk ebenagaikmu op emagoluk nenede sebeliso modok welago yo. 6Nis di e’gin yu e’gin hogu lege ai pam, Allah en his henede op emagoluk henede sebeliselat, henebe delhenebiselat, tuayat o. Ye, nis di e’gin yu e’gin hogumu Allah en nenede sebeliso ai pam, his asogoat di e’gin yu e’gin hogulat henepe mosogo wolorogup holuk e, Allah en henede op emagoluk henede sebeluayat o. 7Di obotut yu obotut nenemin hegitsogo hogu lege ai ’gela’ge, nenede op emagoluk Allah en nenemin hegitsogoat nenede sebelua o, oluk naluk ai en e, his op orogup ani o, oluk nenede mesigat ’garoksogo welege o.
8 #
1Kor. 15:32
Narilak norokhwi. Nis o propinsi Asia etleba en di e’gin yu e’gin taknonobogu legesa ai heneperlak wolom nebit en mo’gulhentaik o. Asogo taknonobogulat, e’gin modok a’bik nis en tu mia a’ge nenebam pegesema,
“Nis nenelaluk wolomul erlak hegi o,” oluk nenede hwenik aga. 9Enebe modok waronobuogoluk onobok ’balogumu,
“Nis arat waromul hegi o,” oluk opogwi ’gela’ge aga ai o. Asogo agoam, nenede nonu’gwarek nenebe pam nak eberak poluk wolom erlakma en, we, at Allah aphwami waragaiam enelalugabenebiso a’ge ano pam he’berik poluk welemagoluk asogoat aga ai o. 10-11Nis nenebe modogat watnonobua o, oluk epegerikmu en, at Allah enat delnenebegeitik e, pobuk delnonobuayat o. Ye, nis nenebaget his heneminat se’ban ogu lege ano pam, pobuk ogo delnenebise lemayat o, oluk e, nenede at ebam eberak poluk welege. His en, nis nenebaget se’ban ogwi modok wolorogup ano pam, at Allah ebabut op en nis delnenebisoam e, is aphwami pema a’bik en enil nontoluk e, Allah hau woruayat ani o.
Paulus en, “Pageat hene’bek weigoluk tegis
a’ge re, mo egi o,” oluk mo’gulentesi wene
12Nis erlikhorlogu lege ai, ebe disogo oluk. Nis is aphwami ’gwiangma a’ge logon ene’gerlak o’gwe welat, is enebaget togu lege re, weiyat ’gela’ge o. A’ge re, his henebaget nak e, logo ’gela’geat togu lege o. Ai re, aphwami ’gwiangma a’ge enede ’gagalak a’ge en togwi ’gela’ge togwi erlak o. We, at Allah ebabut op ano en, nenede mesigat op welat togu lemagoluk nenebabut woknentesimu togu lege a’ge ai nenede eberogulat,
“Nis op togu legema o,” oluk erliktogu lege ai o. 13-14An en e, wene his en onuk elirat mo’gulogulat, pobi togulat, tu a’ge nak pelal wokho hene’bek perakpou wegi o. Naduk e, an en perakpou wegi a’ge ai wei nagat pobi tigep. A’ge re, pobuk nak e, ’berlegat pobi togup epasu legi. Asogo pobirak poluk e, nonue ’gain Onuk Logo a’ge Yesus wema ai erlige, nis en e, his henebaget honomot wul ai ’gela’ge, his en e, nis nenebaget nonomot wagubat o.
15-16 #
Per. 19:21
Asogo pobi togubat o, oluk epegi ai en, his agauwa ’birenam honogola henagai hagup en e, an nadugat o Makedonia yema wagalat his hene’bek til-til weiktik e, pobuk togolik lasulat ogo hene’bek til tilat, o Yudea laigoluk lasumu, his en letniouwak oluk epegi o. 17Asogo weigoluk epegi a’geat de, pobuk mo egi ai re, an niak ’biren epegep? An nede en e,
“Disogo tik o,” oluk wenemennei eberiselat e, nu’gwarek nogola nagai en,
“I o,” oluk ningsogoat oluk en, pobuk,
“Erlak o,” oluk oso epegep? 18Erlak o. At Allah iak demat nak mo’gulnentasu ai ’gela’ge, nis en ogo,
“I o,” oluk en,
“Erlak o,” ogulat, mo’gulhontogu lege erlak. 19#Per. 18:5At Allah omlogo Yesus Kristus, an nebe en mo’gulhentasulat, Silas en mo’gulhentasulat, Timotius en mo’gulhentasulat, mo’gulhentige a’ge ano ebabut e,
“I o,” oluk en,
“Erlak o,” oluk oso erlak. Allah en,
“I o. Wokhentaik o,” oluk obok mo’gulnonto ’gela’ge, Yesus ebe woknentesimu oruak aiat o. 20At Allah en di a’ge yu a’ge obok mo’gulnentesi a’ge ai ’berlek e,
“I o, wokhentaik o,” oluk u ’gela’ge, Yesus ebe woknentesimu oruak ai en e, nis at emin hwedik welat Allah erliktogulat e,
“Demat emak o,” oluk u ’gela’ge,
“Amin,” oluk ogu lege ai o. 21-22At Allah enat, his emin, nis emin, Kristus ebam he’berik nenebesimu welege. Nenebe at u’gwarek paget togu lemagoluk yo’go nenebasulat, silo ’gela’ge nenebasulat, tagalat e, di a’ge yu a’ge pobuk loksogo nouwogoluk, naduk-naduk ’gomuk no’gwi ’gela’ge, Allah en nis nenebaget ’berlegat nenebesi a’ge pobuk woknentaigoluk, naduk nadugat Arogun naduk nenedemu pesimu welege o.
23An o Korintus hene’bek wom erlakma en mo egi ai re, his henede wiak ema no oluk mo egi a’ge ano, at Allah en nedemu il niasu a’ge enaluk o. 24His henede Allah pam he’berik pegep a’ge ai, demat oluk henede ha’buksogo welegep ai en e, nis en,
“Henede ai a’ge pam he’berik po yo,” oluk neniak ningsogo mo’gulhontul erlak o. We, his honogola henagai hagup en e, lethontogu lege ai o.
Currently Selected:
2 Korintus 1: Wul
Highlight
Copy
Compare
Share
Want to have your highlights saved across all your devices? Sign up or sign in
