1 Korintus 5
5
Ap mesik aik ugwe a’ge wesimu Paulus en enesa’go weregei wene
1 #
Ula. 22:30
Aphwami en, ap his a’ge mesik hwe wo puk a’ge wesirik oruak oluk obok ogulat mo’gulnegisema nesa’go hwelegis o. Is aphwami Allah iak eneperlak a’ge en asogo togwi erlak a’ge, ap ai aik ugwe a’ge wesirik oruak ai o. 2Asogo togukhweat de, his erlikhorlogu legep ai o. His en tu re, henede wiak otluk, ap wiak tiselat oruak ai, lebikpo a’ge henemin la’bulogo welegep ai o. 3-4An nebe walegat welegi a’ge re, nede his henemin welege ’gela’ge o. Ai en, nebe henemin welat u ’gela’ge re, nonue ’gain Onuk Logo a’ge Yesus onuk ’balogo re, at ap wiak tiselat oruak ai wene ebam pegimu oruak o. Holuk e, his mesikmu odoktogwiam, an nede henemin welege ’gela’ge ai en, nonue ’gain Onuk Logo a’ge Yesus anni pam, disogo tip. 5Ap ai ede nonue ’gain Onuk Logo a’ge wema ai erlige wagalat deluagoluk e, yogodak ebe Iblis en wiagaruagoluk, at Iblis at wogomup o.
6 #
Gal. 5:9
Aphwami en eniak ebam elitsogo ogulat,
“E’gen so’boru roti a’ge poruagoluk ’gwelabogwi a’ge wei nak ogola ’gwelebak poma re, roti ebe ’berlegat periso yo,” oluk ogwi ano heneperlak no? Henaluk welarat erlikhorlogu legep ai op puk. Wiak o. 7#Kel. 12:5Aphwami Yahudi a’ge seni Paskah no’gulat, domba wam wusogo, e’gen roti poruagoluk ogola ’gwelabogwi a’ge lebikpoluk, periso erlak a’ge nak no’gwi ’gela’ge tip o. Nonuam domba wam Paskah a’ge woru ’gela’ge, Kristus nis nenebaget arat werigisa ai en e, henebe roti ’get periso erlak a’ge egeptik welegep ’gela’ge demat orogup en, e’gen roti poruagoluk ’gwelabogwi a’ge naduk a’ge lebikpogwi ’gela’ge, wiak togu legep a’ge ai hosogo ukpomup o. 8#Kel. 13:7; Ula. 16:3Holuk e, seni Paskah no’gulat, e’gen roti poruagoluk ogola ’gwelabogwi a’ge ogola ’gwelebak erlak a’ge no’gwi ’gela’ge, nis wiak togulat, ’babi tenontogulat, togulom mia o. We, nenede mesigat welat, demat a’ge nak togu lomok o.
9An en nadugat wene pelal wokho hene’bek perakpou wagalat e, disogo mo’gulhentegis ani o,
“His e, is aphwami ’babi tenontogwi a’ge enemin la’buksogo wolorogup o,” oluk mo’gulhentegis ani o. 10Asogo mo’gulhentegis ai re, is aphwami Allah iak eneperlak welat ’babi tenontogwi a’ge emin, enemikmik wiak togwi a’ge emin, lalonobogwi a’ge emin, enede dogwi asua pam he’berik welat erliktogwi a’ge emin, is ai enebaget mo’gulhentegis erlak o. Is asogo togwi a’ge enemin wolorogup o, oluk elimu re, is aphwami ’gwiangma a’ge yema modok ugonoboluk libelep o. 11Asogo mo’gulhentegis ai re, wene ebe disogo. At mesik en eselat e,
“An henare Allah omlogoat o,” oluk eselarat de, ’babi tenentasulat, emikmik wiak tagalat, dogwi asua pam he’berik poluk erliktagalat, iak orlouk wiak wene yagentasulat, a’bosu honuk-honuk ’baluogoluk no’gwi ano a’ge nasu modok welat, aphwami lalenebiselat, tago a’ge ai ’gela’ge enebe enemin la’buksogo wolom erlakma en, so’boru enemin nagup erlagat, oluk mo’gulhentegis ani o. 12-13#Ula. 13:5; 17:7Is aphwami Allah iak eneperlak a’ge wene an en enebam po no? Erlak o. We, Allah en enebam pouwa a’ge oruak o. Allah iak pelal wokho pogulat, disogo egesa,
“At mesik hene’gerlakma welat wiak tago a’ge ai, lebikpomup o,”
oluk egeimu pelal wokho pegesema oruak ai en e, ap mesik his Allah eiyagai enemin odoktugu legep a’ge en wiak tago holuk e, his en wene ebam po erlak no? Poat o.
Currently Selected:
1 Korintus 5: Wul
Highlight
Copy
Compare
Share
Want to have your highlights saved across all your devices? Sign up or sign in
