BILANGAN 32

Leoina Israel-la, leon-nala lai Lee Yarden-na boboan dulu

(Ul. 3:12-22)

1Leo Ruben ma leo Gad-ta, bana-manun makadotok nanseli Lelek lita dae Yaezer ma dae Gilead-ta, lolen-na seli, soaneu nakaboboi bana-manu boema, 2leu leo Musa, Imam Eleazar ma Israel mauli-malanga fe'en-nala, de lafa'da lae, 3-4“Kota Atarot, Dibon, Yaezer, Nimra, Hesybon, Eleale, Sebam, Nebo ma Beon, fo no Manetualain tutulu-fafalin, de Israel nangatuu nan so, daen-na lolen-na seli soaneu nakaboboi bana-manu. De hu kande, ami bana-manum makadotok nanseli, 5de ami dokodoe, fo ela fe dae sila-la leo ami mai, fo da'di ami nuum. Boso madenu ami, fo lali leo Lee Yarden-na selik meu.”

6Boema Musa nataa nae, “Masa bole, emi nau leo maele meme ia, te se'kona hataholi, fo emi leoina esa, leu latee-latati? 7Tao le'e de, emi makabibiik nggileo-boongik Israel-la, fo ala bii lena leo Lee Yarden-na selik leu, fo ala masok leo Manetualain fe sila nusak-ka dalek leu? 8#Bil. 13:17-33 Emi amam-mala tao leondiak boe, nai lelek au adenus leu la'ok okofefeo nusak ndia. 9Ala losa Bafak Eskol-la so, de lita dae ndia so boe. Tehu nai lelek ala fali ma'is boema, ala tao-la leoina Israel-la bii masok leo dae fo, Manetualain fen leo sila neu. 10-11#Bil. 14:26-35Boema nai lelek ndia boe, Manetualain namanasa, nalosa nafa'da nae, ‘Hataholi sila-la, ta lilineka neu Au fa. Hu ndia de, Au soo ae nai lelek ala kalua leme Masir mai-a, sila see teun duahulu leo lain neu soona, neukose ta hapu esa boen, fo ana masok leo Au helu fe Abraham, Isak ma Yakob nusak-ka, dalek leu fa.’ 12Huhukuk ndia, la'e basa hataholi-la, ta'da fe'e Kaleb, fo Yefune hataholi Kenas ndia, anan-na, ma Yosua, fo Nun anan-na, nanahu sila dua, lilineka lahele neu Manetualain. 13Manetualain namanasa leoina Israel-la, nalosa Ana po'ilotak-kasa, laleu-lalaak lai moo solokaek-ka, teuk haahulu dalen-na, losa mate la'iesak bobongik fo, manalena-la'ban paletan-na. 14De besak ia, emi lena-la'ban paleta, sama leo emi amam-mala boe! Memak emi hataholi masala-masingok bubuak esa, fo emi taom-ma Manetualain nasa-melun lua ponu-ponu seluk neu leoina Israel-la! 15Metema emi lepos masadea Manetualain, soona neukose Ana po'ilotak leoina ia, laleu-lalaak dook-ka seluk nai moo solokaek-ka, fo emi nde tataom, sila momopo-mamaten ndia!”

16Boema, hataholi Ruben-nala, ma hataholi Gad sila-la, leu deka loo Musa, de lafa'dan lae, “Malole lenak, ami nde makasososa, tao fe ami bi'ilopom-mala lalae nanadamak, ma kota-kota makota musuk-kala, soaneu ami sao-anam-mala. 17Neukose ami maheheleaom, fo no lai-laik ami meu matee-matati sama-sama moo ami tolanom-mala. Neukose ami mauli-malanga natee-natatik ndia, ma ami moos leo nusak fo ana da'di sila nuun ndia. Ndia te, ami sao-anam-mala leo leme ia, fo nai kota-kota makota musuk-kala dalek, fo nusak ia laun-nala, ta hapu sapu-la fas. 18Neukose ami ta fali leo ami umam meu fa, metema hataholi Israel-la, beita hapu sila dae pusakan-na fa. 19Ami ta nau sipo sila daen manai Lee Yarden-na selik, faaanak boen, nanahu ami sipo-ma, ami baba'em-ma nai ia so, fo nde Lee Yarden-na boboan dulu.”

20Boema Musa nataa nae, “Metema, te'e-te'e emi nau maheheleaom, fo meu matee-matati soaneu Manetualain, 21ma basa emi hataholi fo natee-natati nai Lee Yarden-na selik, fo no Manetualain nauli-nalangan, de ala sapu-la musu-la, losa Manetualain usi henis, 22nalosa nusak nakatele neun, soona emi bole fali, ma emi matapo'i meme emi bela-ba'um soaneu Manetualain ma soaneu emi tolanom-mala, de neukose Manetualain fe emi manuu, dae manai Lee Yarden-na boboan dulu. 23Tehu mafandendelek, te metema emi ta tao matetu, emi hehelu-balataam fa soona, emi masala-masingo neu Manetualain, de neukose emi nanahukuk, nanahu emi sala-singom ndia. 24Meu leona, fo mapadedeik kota-kota-la, ma tao fe emi bi'ilopom-mala lalae, ma boso mafandele henin, fo tao matetu hata fo emi helu basan ndia so!”

25Boema, leo Gad ma leo Ruben-na, hataholin-nala lafa'da lae, “Tuan, neukose ami tao tunga hata fo, Tuan paletan. 26Neukose ami la'oela ami sao-anam ma ami sapim-mala loo ami bi'ilopom-mala leme ia, fo nai Gilead kotan-nala. 27Tehu ami ia soona, ami maheheleaom fo meu matee-matati, fo Manetualain nde nauli-nalanga ami-a. Neukose ami lena leo Lee Yarden-na selik meu, fo ami matee-matati sama leo Tuan nafa'dak-ka.”

28 # Yos. 1:12-15 Boema Musa fe paleta ia neu Imam Eleazar-ra, Yosua ma mauli-malangan Israel-la nae, 29“Metema Gad ma Ruben hataholin-nala tunga Manetualain paletan-na, fo ala lena leo Lee Yarden-na selik mai, fo latee-latati, ma metema no sila tutulu-fafalin, de emi hapu loso-ma nusak ndia, soona emi muse fes dae Gilead-ta, fo da'di sila pusakan. 30Tehu metema, ala ta lena leo Lee Yarden-na selik mai, fo latee-latati sama-sama loo emi fa, soona ala muse ala hapu dae pusaka nai nusa Kanaan-na, sama-na leo emi boe.”

31Boema Gad ma Ruben hataholin-nala lataa lae, “Tuan, neukose ami tao tunga hata fo, Manetualain paletan. 32No Manetualain hehela-nonolen, de neukose ami lena leo nusa Kanaan-na meu, fo matee-matati, tehu ela leo been-na, ami manuu mahele dae manai Lee Yarden-na boboan dulu.”

33Boema Musa fe la'iesak nusa Sihon-na, hataholi Amori-la manen-na, nusa Og-ka, mane Basan-na, ma kota-kota ma dae manai titia-tatain-nala leo, leo Gad ma leo Ruben-na neu. 34Boema leo Gad-ta, nafofo'a falik kota Dibon, Atarot, Aroer, 35Atarot-Sofan, Yaezer, Yogbeha, 36Bet-Nimra, ma Bet-Haran, da'di leo kota musu, ma da'di leo bi'ilopo-la lalaen-na. 37Leo Ruben-na, nafofo'a falik kota Hesybon, Eleale, Kiryataim, 38Nebo, Baal-Meon, ma Sebam. Ala nggati heni lapadedeik falik kota sila-la, na'den-nala.

39Leo-ingu Makhir, fo Manasye anan-na, sapu-na dae Gilead-ta, boema ana loso-nan, de ana usi heni hataholi Amori manai sila-la. 40Hu ndia de, Musa fe dae Gilead ndia leo leo-ingu Makhir-ra neu, de ala leo lahele leme ndia. 41Yair, fo neme leo Manasye mai, neu sapu-na desa de'ubee, de ana loso-nalas, boema ana foi desa sila-la na'de, “Desa-desa Yair.” 42Nobah, neu sapu-na Kenat no nggolo-nggolok manai titia-tatain-nala, de ana loso-nalas, boema ana foi Kenat na'den-na, tunga ndia na'den-na.

Currently Selected:

BILANGAN 32: twu

Highlight

Copy

Compare