BILANGAN 29
29
Tunu-hotuk nai Feta Teu Beuk-ka
(Im. 23:23-25)
1Neu hataholi Yahudi-la bula ka hitun-na, fain esa soona, emi muse makabubua fo makaluku-makatele, ma ta bole maue-le'di ue-le'dis mabela fa. Nai faik ndia, muse puu pupuuk-kala. 2Tunu-hotu fe Manetualain tutunu-hohotu nanatunuk, nalupa sapi maneanak esa, bi'ilopo mane esa, ma bi'ilopo ana maneanak hitu, besak-ka teuk beke esak, ma ta lu'u la'ak fa. Tutunu-hohotuk sila-la boon-na, nandaa no Manetualain dalen-na. 3Boeo, tunu-hotu tutunu-hohotu nana'ak, fo nau do ta nau fa, emi muse tunu-hotun, nalupa ha'desopuk nanasese'dok mina setun: fo nde sapi mane-a, ha'desopuk kilo telu, bi'ilopo mane-a, ha'de sopuk kilo dua, 4ma bi'ilopo ana-la, esan-na ha'desopuk kilo esa. 5Boeo, tunu-hotu bi'ihiik mane esa, soaneu tutunu-hohotuk fo, sala-singok hapu do'o do ampon. No enok ndia, emi tao feta soaneu hataholi Israel-la, sala-singon nanakoka henik. 6Tutunu-hohotuk sila-la, nalupa tatamak neu tutunu-hohotu nanatunuk-ka, sama-sama no tutunu-hohotu nana'an-na, nai tunga-tunga bulak-kala fain esa. Boeo, nalupa tatamak neu tutunu-hohotu nanatunu tunga faik-ka, fo tunu-hotun sama-sama no tutunu-hohotu nana'ak-ka, ma tutunu-hohotu angol-la. Tutunu-hohotu nanatunuk ndia boon-na, Nandaa no Manetualain dalen-na.
Tunu-hotuk nai Faik fo Sala-singok hapu do'o do ampon
(Im. 23:26-32)
7 #
Im. 16:29-34
Neu hataholi Yahudi-la bula ka hitun-na, fain sanahulu soona, emi muse makabubua, fo makaluku-makatele. Nai faik ndia, emi muse okaaom-mala, ma ta bole maue-male'di fa. 8Tunu-hotu fe Manetualain tutunu-hohotu nanatunuk, nalupa sapi maneanak esa, bi'ilopo mane esa, ma bi'ilopo ana maneanak hitu, besak-ka teuk beke esak, ma ta lu'u la'ak fa. Tutunu-hohotuk ndia boon-na, nandaa no Manetualain dalen-na. 9Tunu-hotu tutunu-hohotu nana'ak fo, nau do ta nau fa, emi muse tunu-hotun, nalupa ha'desopuk nanasese'dok mina setun: fo nde sapi mane-a, ha'desopuk kilo telu, bi'ilopo mane-a, ha'desopuk kilo dua, 10ma bi'ilopo ana esan-na, ha'desopuk kilo esa. 11Boeo, tunu-hotu bi'ihii mane esa, soaneu feta hataholi Israel-la sala-singon, nanafe do'do do ampon. Fe'ek neme tutunu-hohotuk fo, sala-singok hapu do'o do ampon, ma tutunu-hohotu nanatunuk tunga faik-ka, sama-sama no tutunu-hohotu nana'ak-ka, ma tutunu-hohotu angol fo nanatunu-hotuk nai faik ndia.
Tunu-hotuk nai Feta Lalaa Akidook-ka
(Im. 23:33-44)
12 #
Kel. 23:16, 34:22; Ul. 16:13-15 Nai hataholi Yahudi-la, bula ka hitun-na, fain sanahulu lima soona, emi muse makabubua, fo makaluku-makatele, ma ta bole maue-male'di ue-le'dis mabela fa. Nai faik hitu dalen-na, emi muse tao feta soaneu fe ha'da-holomata neu Manetualain. 13Nai fai makasososak-ka, tunu-hotu fe Manetualain tutunu-hohotu nanatunuk, nalupa sapi maneanak sanahulu telu, bi'ilopo maneanak dua, ma bi'ilopo ana maneanak sanahulu haa, besak-ka teuk beke esak, ma ta lu'u la'ak fa. Tutunu-hohotuk sila-la boon-na nandaa no Manetualain dalen-na. 14Boeo, tunu-hotu tutunu-hohotu nana'ak, fo nau do ta nau fa, emi muse tunu-hotun, nalupa a'desopuk nanasese'dok mina setun: fo nde sapi mane esan-na, ha'desopuk kilo telu, bi'ilopo mane esan-na, ha'desopuk kilo dua, 15ma bi'ilopo ana esan-na, ha'desopuk kilo esa. Boeo muse tunu-hotu angol fo nanapaluuk-ka, sama-sama no tutunu-hohotu nana'ak ndia. 16Fe-ek neme ndia mai, tunu-hotu bi'ihiik mane esa boe, soaneu tutunu-hohotuk fo, sala-singok hapu do'o do ampon. Tutunu-hohotuk ndia, nalupa tatamak neu tutunu-hohotu nanatunuk tunga faik-ka, sama-sama no tutunu-hohotu nana'ak-ka, ma tutunu-hohotu angol-la.
17Nai faik-ka duan-na, tunu-hotu sapi maneanak sanahulu dua, ma bi'ilopo mane dua, ma bi'ilopo ana maneanak sanahulu haa, besak-ka teuk beke esak, ma ta lu'u la'ak fa 18-19Tunu-hotu basa sila-la, sama-sama no basa tutunu-hohotu fe'ek-kala, sama leo tutunu-hohotuk nai fai makasososak-ka.
20Neu faik-ka telun-na, tunu-hotu sapi maneanak sanahulu esa, bi'ilopo mane dua, ma bi'ilopo ana maneanak sanahulu haa, besak-ka teuk beke esak, ma ta lu'u la'ak fa 21-22Tunu-hotu basa sila-la, sama-sama no basa tutunu-hohotu fe'ek-kala, sama leo tutunu-hohotuk nai fai makasososak-ka.
23Neu faik-ka haan-na, tunu-hotu sapi maneanak sanahulu, bi'ilopo mane dua, ma bi'ilopo ana maneanak sanahulu haa, besak-ka teuk beke esak, ma ta lu'u la'ak fa. 24-25Tunu-hotu basa sila-la, sama-sama no basa tutunu-hohotu fe'ek-kala boe, sama leo tutunu-hohotuk nai fai makasososak-ka.
26Neu faik-ka liman-na, tunu-hotu sapi maneanak sio, bi'ilopo mane dua, ma bi'ilopo ana maneanak sanahulu haa, besak-ka teuk beke esak, ma ta lu'u la'ak fa. 27-28Tunu-hotu basa sila-la, sama-sama no basa tutunu-hohotu fe'ek-kala boe, sama leo tutunu-hohotuk nai fai makasososak-ka.
29Neu faik-ka neen-na, tunu-hotu sapi maneanak falu, bi'ilopo mane dua, ma bi'ilopo ana maneanak sanahulu haa, besak-ka teuk beke esak, ma ta lu'u la'ak fa. 30-31Tunu-hotu basa sila-la, sama-sama no basa tutunu-hohotu fe'ek-kala boe, sama leo tutunu-hohotuk nai fai makasososak-ka.
32Neu faik-ka hitun-na, tunu-otu sapi maneanak hitu, bi'ilopo mane dua, ma bi'ilopo ana maneanak sanahulu haa, besak-ka teuk beke esak, ma ta lu'u la'ak fa. 33-34Tunu-hotu basa sila-la, sama-sama no basa tutunu-hohotu fe'ek-kala boe, sama leo tutunu-hohotuk nai fai makasososak-ka.
35Neu faik-ka falun-na, emi muse makabubua, fo makaluku-makatele, ma ta bole maue-male'di ue-le'dis mabela fa. 36Tunu-hotu fe Manetualain tutunu-hohotu nanatunuk, nalupa sapi maneanak esa, bi'ilopo mane esa, ma bi'ilopo ana maneanak hitu, besak-ka teuk beke esak, ma ta lu'u la'ak fa. Tutunu-hohotuk sila-la boon-na, nandaa no Manetualain dalen-na. 37-38Tunu-hotu basa sila-la, sama-sama no basa tutunu-hohotu fa'ek-kala boe, sama leo tutunu-hohotuk nai fai makasososak-ka.
39Basa sila-la nde da'di nakanenetek la'eneu tutunu-hohotu nanatunuk, tutunu-hohotu nana'ak, tutunu-hohotu angol, boema tutunu-hohotu mole-dame, fo emi muse tunu-hotu fen neu Manetualain nai emi fai malolem-mala, fo nananaketu basak so. Tutunu-hohotuk sila-la, nalupa tatamak neu tutunu-hohotuk fo, emi tunu-hotun soaneu bae nasar, do tutunu-hohotuk fo, emi fe tunga emi dale hihii-nanau mesam-ma.
40Musa nanduku-nalosak neu leoina Israel-la, basa hata lala'en, fo Manetualain paleta neun.
Currently Selected:
BILANGAN 29: twu
Highlight
Copy
Compare
Share
Want to have your highlights saved across all your devices? Sign up or sign in
