BILANGAN 20
20
Manada'dik-kala nai Kades
(Kel. 17:1-7)
1Nai hataholi Yahudi-la bula ka esan-na dalek boema, basa hataholi Israel-la lala'en-na, losa moo solokaek Zin-na, de ala leo lahele leme Kades. Miryam maten, de latoin neme ndia.
2 #
Kel. 17:1-7
Nai faik esa boema, oe ta sila mamana oofun-na. Boema, hataholi sila-la lakamomotu-la Musa no Harun 3boema bemumu lae, “Malole lenak, sa'di leo been-na, mate ami nai Manetualain matan, sama-sama moo ami tolanom-mala! 4Tao le'e de, emi moo ami leo moo solokaek ia mai? Ade, fo ela ami ma ami bana-manum, mate nai ia do? 5Sosoak hata, emi moo ami kalua meme Masir, leo mamana doidosok ia, fo ta bisa sele hata-hata esa boen? Nai ia, ta hapu gandum, ta hapu ai kaak, angol, ma dalima fa. Nakalenak oe nininuk boeo, ta!” 6Boema Musa no Harun la'oela hataholi sila-la, de lapadeik deka Manetualain Lalaa Teman-na lelesun-na. Ala senek, boema Manetualain mandela-masa'an potin-nalas.
7 Manetualain nafa'da Musa nae, 8“Ho'i-ma ai tete'ek manai Peti Hehelu-balataak-ka matan-na, boema o moo Harun, muse maloo makabubua basa hataholi Israel-la lala'en-na. Nai basa-basas matan, o muse mafa'da neu pupuku batu manai ndia, fo ela nasapoka oe mai. No enok ndia, o kalua oe-a neme pupuku batu ndia dalek mai, fo ela laun-na ma bana-manun-nala hapu linu.” 9Boema, Musa neu ho'in-na ai tete'ek ndia, sama leo Manetualain paletan-na.
10Musa no Harun laloo lakabubua basa hataholi Israel-la lala'en-na, de lapadeik lai pupuku batu ndia matan-na. Boema Musa nafa'da nae, “Mamanene leon, hai leo-ingu manalena-la'ban paleta-la lemin! Ade ami muse kalua fe emi oe, neme pupuku batu ia dalek mai do?” 11Boema, Musa so'uk ai tete'ek ndia leo lain neu, de ana fepan la'i dua, neu pupuku batu ndia. Boema oe-a nasapoka mai, nalosa basa hataholi-la loo bana-manun-nala hapu linu.
12Tehu Manetualain fe Musa no Harun nasanene'dak nae, “Hu kande emi namahehelem neu Au-a, beita dai soaneu matu'du Au koasang fo malalao-malalafung-nga, nai leoina Israel-la matan-na, de neukose emi ta mauli-malangas losa ala masok leo nusak fo, Au helu fen neu sila fa.”
13Ndia nde oemata Meriba. Hataholi Israel-la bemumu loo Manetualain nai mamanak ndia, ma Manetualain natu'du koasa malalao-malalafun-na neu leoina ndia, nai mamanak ndia boe.
Mane Edom-ma ta fe loak neu leoina Israel-la laok tunga nusan-na fa
14Basa boema, Musa nadenu hataholi-la leme Kades, fo leu leo Mane Edom-ma leu. Lafa'da manek-ka lae, “Ami meme leo-leo Israel-la mai, fo bei daak esa moo Tuan. Fafa'kama Tuan bubuluk susa fo manatuni-ndeni nala ami-a so. 15Ami bei-ba'i kaim-mala, leu leo Masir leu, de ala leo lahele leme naa, teuk lamalala. Hataholi Masir-rala, tao ta malole neu ami, ma ami bei-ba'i kaim-mala, 16de ami maloo bou-bou neu Manetualain fo moke tutulu-fafalik. Boema namanene ami dokodoem-ma, de Ana nadenu ata nusa so'dak esa mai. Ata nusa so'dak ndia, nauli-nalanga ami kalua meme dae Masir-ra mai. Besak ia, ami nai Kades, fo kota esa nai dae too no Tuan nusan-na. 17Ami dokodoe, fo sa'di leo been-na, Tuan fe ami loak la'ok tunga nusak ia. Ami ma ami bana-manum, neukose ta singo neme enok-ka mai fa, ma ami ta meu leo tina-la ma osi angol-lala dalek meu fa. Neukose ami ta minu Tuan oedolun-nala oen-na fa. Neukose, ami la'ok tunga ka'da okofoo lain, losa ami kalua meme Tuan nusan-na mai.”
18Tehu hataholi Edom-mala lataa lae, “Ami ta fe emi loak, la'ok tunga ami nusam-ma fa. Metema, emi mapalani la'ok tunga ami nusam-ma soona, neukose ami sapu-ma emi!”
19Boema hataholi Israel-la lafa'da lae, “Neukose ami la'ok tunga okofoo lain, fo metema ami, do ami bana-manum linu emi oem-ma soona, neukose ami bae. Nana, ami hii ka'da la'ok tunga ia.”
20Boema, hataholi Edom-mala lafa'da seluk lae, “Ta bole fa!” Boema ala kalua loo solda'du mabe'i-balakaik-kala, fo sapu-la leoina Israel-la. 21Boema hataholi Israel-la, ala lepos fali, de ala sanga eno fe'ek, nana hataholi Edom-mala ta fes loak, la'ok tunga sila nusan-na fa.
Mate Harun
22Basa hataholi Israel-la lala'en-na, la'oela Kades, boema ala losa Letek Hor-ra, 23fo nai dae too no Edom-ma. Nai mamanak ndia, Manetualain nafa'da Musa no Harun nae, 24“Neukose Harun ta masok leo nusak fo, Au helu basa, fen neu leoina Israel-la fa; neukose maten, nanahu emi dua la'ban basa Au paletang-nga, neme deka no oemata Meriba so. 25Moo Harun no anan Eleazar, leo Letek Hor-ra neu. 26O'duheni Harun bua papaken-na, fo paken neu Eleazar. Nana, neukose mate Harun nai mamanak ndia.” 27Musa tao tunga Manetualain paletan-na. Boema Musa, Harun ma Eleazar nda'e leo Lete Hor-ra lain neu, de basa hataholi Israel-la lala'en-na, sakasii. 28#Kel. 29:29; Bil. 33:38; Ul. 10:6 Boema, Musa o'duheni Harun bua papaken-na, de ana paken neu Eleazar. Mate Harun nai letek ndia poin-na, de basa boema Musa no Eleazar kona falik leo dae mai. 29Basa hataholi Israel-la lala'en-na, lamanene lae mate Harun so boema, basa-basas falu ma lanuu dale he'dik, faik teluhulu dalen-na.
Currently Selected:
BILANGAN 20: twu
Highlight
Copy
Compare
Share
Want to have your highlights saved across all your devices? Sign up or sign in
