IMAMAT 18

Kekena-kaka'ik soaneu touk esa sungu no inak esa

1 Manetualain nadenu Musa 2nanduku-nalosak paleta ia-la neu leoina Israel-la, “Au nde emi Manetualain. 3Emi boso na'da dulak, sama leo hata fo hataholi manai dae Masir-ra tao-no'in. Masir fo makahulun-na emi leo hai meme naa so, do hataholi manai Kanaan-nala, fo besak ia Au sanga o emi leo naa meu. 4Tunga Au hoholo-lalaneng, ma tao-no'i hata fo Au paletan. Au nde emi Manetualain. 5#Neh. 9:29; Yesk. 18:9, 20:11-13; Luk. 10:28; Rm. 10:5; Gal. 3:12 Tunga Au fe emi nakanenetek ma hoholo-lalanek-kala. Metema, emi tao leondiak soona, emi maso'da. Au nde Manetualain-na.”

6 Manetualain fe nakanenetek-kala nde ia: Boso sungu moo hataholi esa neme emi tolanoo ka'a-fa'dim mai. 7Boso sungu moo o inam, fo o amam saon-na, nana o amam hak ndia. 8#Im. 20:11; Ul. 22:30, 27:20 Boso makadadaek o amam, nenik sungu moo saoina fe'en esa. 9#Im. 20:17; Ul. 27:22 Boso sungu moo o fetom-ma, do o feto palam, fo nau emi mamatua sama-sama nai uma esa dalek, do namatua nai uma fe'ek boe. 10Boso sungu moo o upum-ma; neukose tatao-nono'ik ndia, tao nakamamaek seluk o aoinam-ma. 11Boso sungu moo o fetom fo emi ama esa, te inan fe'e, do emi ina esa, te aman fe'e, nanahu o tolanoom ndia boe. 12-13#Im. 20:19-20 Boso sungu moo o te'om, nau o amam tolanoo inan ndia, do o inam tolanoon-na boe. 14Boso sungu moo o to'om saon-na, nanahu o te'om ndia boe. 15#Im. 20:12 Boso sungu moo o manafeum-ma anan-na, 16#Im. 20:21 do o ka'am-ma saon-na. 17#Im. 20:14; Ul. 27:23 Boso sungu moo inak esa, o sungu hai moon so anan-na do upun-na. Fafa'kama o tia-laim sila, de tatao-nono'ik ndia, ta kandaak fa. 18Boso sao o saom-ma tolanoon-na, nai lelek o saom-ma bei naso'da.

19 # Im. 20:18 Boso sungu moo inak esa, nai lelek ana hapu bulak, nanahu, inak ndia bei nai manggenggeok dale. 20#Im. 20:10 Boso sungu moo hataholi fe'ek saon; nana tatao-nono'ik ndia, ana tao-na o da'di manggenggeo. 21#Im. 20:1-5 Boso fe o anam esa, fo tunu-hotun nai sosongo-tatangok Molokh-ka dalek, nanahu tatao-nono'ik ndia, tao nakadadaek o Manetualain na'den-na. 22#Im. 20:13 Touk ta bole sao touk fa. Manetualain nakamuu-nakadau tatao-nono'ik ndia. 23#Kel. 22:19; Im. 20:15-16; Ul. 27:21 Nau touk do inak boe, ta bole sao bana fa; nana tatao-nono'ik mangalauk ndia ana tao nanggenggeo emi.

24Boso tao manggenggeo o aoinam-ma nenik tatao-nono'ik sila-la, nana no enok ndia, leoina manaleo makahuluk neme emi nai Kanaan-na, ala tao langgenggeo aoinan-nala so. Hu ndia de, Manetualain usi henis, fo ela emi hapu leo nusak ndia. 25-27Ala tao la'iesak tatao-nono'ik nanamaluak sila-la, nalosa sila daen-na da'di nanggenggeo. Boema Manetualain hukus, ma Ana ta fes loak, fo ala leo lai naa fa. Tehu emi boso tao tatao-nono'ik sila-la makandondook. Emi basa-basam-mala hataholi Israel, ma hataholi nusa dea manaleo lahele sama-sama loo emi-a, muse tunga Manetualain nakaneneten ma paletan-nala, 28fo ela Ana boso huku emi, ma Ana usi heni emi neme dae ndia mai, sama leo hataholi fo ta lalelak Manetualain-na, ala leo lai naa, te emi beita mai fa. 29Emi bubuluk, mae ba'eneu see fo ana tao tatao-nono'ik nanamaluak sila-la soona, ana ta da'di Manetualain anan-nala so'on.

30Boema, Manetualain nafa'da nae, “Tunga Au fe nakanenetek-kala leona, fo boso nanadulak neme hataholi fo ala leo lakahuluk neme emi nai dae Kanaan-na, tatao-nono'in-nala. Boso tao manggenggeo o aoinam-ma mesak-kana, nenik tatao-nono'ik sila-la. Au, fo emi Manetualain.”

Currently Selected:

IMAMAT 18: twu

Highlight

Copy

Compare