KELUARAN 36
36
1Bezaleel, Aholiab, ma basa tuka fo manahapu dudu'a-aafi maneu ma malelaina neme Manetualain mai, ala tao-no'i lalelak basa hatan-nanapaluuk soaneu tao Manetualain Lalaa Teman-na. Sila muse tao basa hata lala'en-na, sama leo hata fo Manetualain paleta basan so.”
Leoina Israel-la fe tutulu-fafalik makadotok
2Musa naloo Bezaleel, Aholiab ma basa hataholi fo manahapu malelaina neme Manetualain mai, ma hataholi fo no dale hihii mesan-na, ana fe tutulu-fafalik, boema nadenus mulai leona. 3Musa fes basa hata lala'en fo hataholi Israel-la tulu-falin soaneu Manetualain Lalaa Teman-na nafofo'an-na. Tehu leoina Israel-la tunga-tunga fafain-na, ka'da bei leni lahele tunu-hotuk sila leo Musa neu. 4Boema basa tuka fo manatao-no'i tatao-nono'ik ndia, 5leni halak leo Musa neu lae, “Dii-ai fo hataholi-la tulu-falik sla-la, lena neme nanapaluuk soaneu tatao-nono'ik fo Manetualain fen neu ami so.”
6Boema Musa po'a-benga neu basa uma ofu lala'en-na, nae tutulu-fafalik soaneu Manetualain Lalaa Teman-na, dai so; da'di hataholi-la ta leni hata-hata so'on. 7Dii-ai fo ala tulu-falik-kala, dai-ma lena so, soaneu ala tao lakababasak tatao-nono'ik ndia.
Manetualain Lalaa Teman-na tataon-na
(Kel. 26:1-37)
8Basa boema, tuka malelaina manai basa tuka-la dalek, tao Manetualain Lalaa Teman-na. Ala tao Lalaa Temak ndia neme tema abalutu biak sanahulu, fo nanatenuk neme tema kabelik balau, pilabalanggeok ma pilas, boema nanaseu-sook nenik kerub-pa dulan-na. 9Basa tema bibiak sila-la, uukun-na sama; nanalun-na metel sanahulu dua, ma loloan-na metel dua. 10Temak biak 5 nanatutik da'di neu temak bia matua esa, ma biak 5, ala tao taon leondiak boe. 11Nai bia ka-5-k sila-la su'u doon-na, ala tao ndeli neme tema balau mai, 12temak esa soona, ndeli 50, nalosa nalupa tema maloa pasan esa. 13Boema ala taok soloka'do lilopilas 50 neu, soaneu tuti nakabubua temak maloa ka duak sila-la.
14Basa ndia boema, ala tao Lalaa Temak ndia sinin-na neme temak biak 11, fo neme bi'ihiik-ka bulun-na mai. 15Temak sila-la uukun-na sama, nanalun-na metel 13, ma loloan-na metel dua. 16Tuti biak 5 da'di tema maloa esa, ma bia ka 6k-kala ala tao taon leondiak boe. 17Ala tao ndeli 50 neu temak-ka esa su'udoon-na, ma ndeli 50 neu temak-ka dua su'udoon-na. 18Boema ala tao la soloka'do 50 neme liti mai, soaneu tuti lakabubua tema maloa ka duak sila-la, fo ana da'di Lalaa Temak sinin-na. 19Basa ndia boema, ala tao-la tatanak 2 soaneu Lalaa Temak, esa neme bi'ilopo mane bulun-na, fo nanalosek nenik dula pilas, ma esak-ka neme bana louk mangana'uk-ka mai.
20Basa boema, ala tao-la Lalaa Temak diin-nala ndos, fo neme ai akasia mai. 21Dii esa soona, nanalun-na metel 4, ma loloan-na senti 66. 22Ala tao ai papakuk 2 neu dii esa, nalosa dii sila-la esa natutik no esa. 23Ala tao dii 20 neu Lalaa Temak boboan kona, 24no dii eik lilofulak 40, fo dii esa soona, dii eik duan nai dii dae, soaneu ai papaku ka duak-kala. 25Ala tao dii duahulu neu Lalaa Temak boboan kii, 26no dii eik lilofulak 40, fo dii esa soona, dii eik duan nai dii dae. 27Ala tao dii 6 neu Lalaa Temak buin muli, 28ma dii 2 neu bu'un-na. 29Dii bu'uk sila-la nanatutik nai ein-na, losa nakandoo leo lain neu. Dii ka duak manai bu'un-na, ala tao taon leondiak boe. 30Da'di basa-basan hapu dii 8 loo dii eik lilofulak 16, de dii esa soona, dii eik duan nai dii dae.
31Boema ala tao-la ai betubalak 15 neme ai akasia mai, fo 5 soaneu dii manai Lalaa Temak boboan esa, 325 soaneu Lalaa Temak boboan esa seluk bai, ma 5 soaneu Lalaa Temak buin muli. 33Ai betubala tala'dak-ka dedeman-na ba'e duak dii tala'dak-ka, fo neme Lalaa Temak ndia pe'dak leo pe'dak neu. 34Lalaa Temak diin-nala loo ai betubalan sila-la nananakadiditak nenik lilopilas, boema ala tao sue lilopilas neu fo nakataka ai sila-la.
35Boeo ala tao tema lelesu-a neme tema abalutu mai fo nanatenuk nenik tema kabelik balau, pilabalanggeok ma pilas, boema nanaseu-sook nenik kerub dulan-na. 36Soaneu lolo'e temak ndia neu de, ala tao la dii 4 neme ai akasia mai de lakadiditak-kana nenik lilopilas ma soloka'do lilopilas, de ala taon neu dii ei lilopilas ka 4k-kala lain. 37Boema ala tao tema lelesu soaneu Lalaa Temak lelesun-na neme tema abalutu mai, fo nanatenuk nenik tema kabelik balau, pilabalanggeok ma pilas, de nanabalias nenik seseu-sosoo mana'ahiik. 38Soaneu tema lelesu ndia, de ala tao-la dii lima fo nanatutik nenik soloka'do. Dii ka 5k fo pe'dan-nala nanatutik ndia, nananakadiditak nenik lilopilas, te dii eik ka 5k-kala nanataok neme liti mai.
Currently Selected:
KELUARAN 36: twu
Highlight
Copy
Compare
Share
Want to have your highlights saved across all your devices? Sign up or sign in
