KELUARAN 23

Nakanenetek la'eneu hataholi daebafak-ka haak-ka

1 # Kel. 20:16; Im. 19:11-12; Ul. 5:20 “Boso makalala'ok halak masapepeko-masandandalik, ma boso tulu-fali hataholi mangalauk fo manasakasii pepekok. 2Boso tunga hataholi ba'u, metema ala tao salak do ala ta tunga hoholo-lalanek no matetun-na nenik ala fe sakasii pepekok. 3#Im. 19:15 Boso bibinga-baba'e hataholi nai manakee-manafula matan, leomae hataholi nanakalaak ndia hataholi nuu-taa hata-taak.

4 # Ul. 22:1-4 Metema, emi mita emi musu noom-ma sapin do keledein-na sala enok-ka soona, foo meni falik-kana leo manonuuk-ka neu. 5Metema, o musu noom-ma keledein-na tu'u neu, nanahu ana fua bua-lo'a mabelaina soona, hela mafofo'a keledei ndia; boso la'oelan leondiak mesak-kana.

6 # Im. 19:15; Ul. 16:19 Tao hataholi nuu-taa hata-taak-ka no ndoos ma matetuk, metema ana kalaak dede'an-na leo manakee-manafula neu.

7Madook aoinam-ma neme kalaak pepekok-ka mai, ma boso hu kande o tatao-nono'im de hataholi sala taak-ka nanahukunisak, nanahu Au fe salak neu hataholi manatao tatao-nono'i mangalauk matak leondiak-ka. 8Boso sipo doi sosolo dalek, nanahu doi sosolo dalek ndia, tao napoke hataholi-a matan-na, la'eneu eno ndoos-sa, fo nakatutu'dak hataholi sala taak-ka.

9 # Kel. 22:21; Im. 19:33-34; Ul. 24:17-18, 27:19 Boso tao su'di bebe'ik-ka neu hataholi nusa dea; emi bubuluk, metema da'di hataholi nusa dean-na, emi mame'da he'din-na leo beek so, nana makahulun-na, emi da'di hataholi nusa dea nai Masir boe.”

Teu ka hitu ma fai ka hitu

10 # Im. 25:1-7 “Teuk 6 dalen-na, emi bole sele-nggali emi tinam-ma, fo ketu-kolu buna-boan. 11Tehu neu teu ka hitun-na soona, emi muse po'ilotak dae ndia. Nai teuk ndia dalen-na, emi ta bole ketu-kolu su'di beek fo ana moliaon nai emi tinam dale fa. Nemen-na, fo soaneu hataholi nuu-taa hata-taak-ka, ma ala ketu-kolu ela bee soona, soaneu bana fuik-kala. Tao leondiak, soaneu emi osi angol-la, ma emi ai setum-mala boe.

12 # Kel. 20:9-11, 31:14-15, 34:21, 35:2; Im. 23:3; Ul. 5:13-14 Nai mamasok esa dalen-na, emi bole maue-male'di faik nee dalen-na, tehu neu fai ka hitun-na, emi muse hahaeaom, fo ela emi bana-manum, emi atam-mala ma hataholi nusa dea fo manamaue-male'di fe emi-a, ala hapu hahaeaon-nala boe.

13Taoafik neu basa hata fo Au afa'dan neu emi. Boso sene-do'ok neu lamatua fe'ek-kala, lena-lenak seseik na'den-nala boeo, ta bole fa.”

Nakanenetek la'eneu fai matua-la

(Kel. 34:18-26; Ul. 16:1-17)

14“Tunga teuk, emi muse tao feta matua telu, soaneu fe ha'da-holomata neu Au. 15#Kel. 12:14-20; Im. 23:6-8; Bil. 28:17-25 Nai hataholi Yahudi-la bula Abib-pa dalek, fo nai faik nananaketuk-ka, emi muse tao Feta Loti Fo Ta Pake Laluteik fa, tunga eno-dalak fo Au paleta basan neu emi so, nana emi la'oela Masir nai bulak ndia dalen-na. Boso mi'a loti fo kamen no laluteik, nai feta faik hitu ndia dalen-na. Nai lelek, emi mai sene-do'ok soaneu Au soona, emi muse meni tunu-hotuk.

16 # Im. 23:15-21, 39-43; Bil. 28:26-31 Tao Feta Ketu-koluk-ka nai lelek, emi mulai ketu-kolu emi tinam-ma buna-boa makasososan-na.

Tao feta Lalaak Akidook-ka nai teuk-ka basan, fo nai lelek emi ketu-kolu basa emi osi angol-la ma osi aiboam-mala.

17Tunga teun, fo nai lelek emi tao feta ka teluk sila-la, basa touk-kala muse mai sene-do'ok soaneu Au, Manetualain fo emi Manetualaim-ma.

18Boso tunu-hotu loti fo kamen pake laluteik, nai lelek emi tunu-hotu bana-manu fe Au. Bana-manu nanatunu-hotuk fe Au, nai feta ndia dalek-ka, boso pe'da bana-manu sila-la minan-nala, losa balahaa fafaik.

19 # Ul. 26:2; Kel. 34:26; Ul. 14:21 Tunga teuk, emi muse meni emi gandum-ma buna-boa makasososan-na leo Au mai.

Ta bole nasu bi'ilopoana do bi'ihiiana paan-na nenik bi'iana sila inan su'uoen-na fa.”

Helu ma paleta

20“Neukose Au adenu Au ata nusa so'dang-nga, ana la'ok nai emi uluk, fo nasulu-nahapa emi nai emi leleo-lala'om dale, ma no emi leo mamanak fo Au sadiak-ka. 21Taoafik neun, fo tungan. Boso la'ban-nana, nanahu Au hataholi nadedenung ndia, de neukose ana ta fe do'o do ampon neu emi la'o lenam-ma fa. 22Metema emi tungan, ma emi tao basa hata fo Au paletan neu emi soona, neukose Au atee-atati la'ban la'i esak emi musum-mala. 23Neukose Au ata nusa so'dang-nga, ana la'ok nai emi uluk, fo noo emi leo leoina Amori, Het, Feris, Kanaan, Hewi ma Yebus nusan-na neu, fo neukose Au tao amopo-amate leoina sila-la. 24Boso sene-do'ok neu sila dodoki-dudula manamasulu-mahapan-na, ma boso nana dulak neme sila makaluku-makatelen eno-dalan mai. Tao makalulutuk sila dodoki-dudulan manamasulu-mahapan sila-la, ma tao mala'di dii batu fo ala paken soaneu makaluku-makatele. 25Metema, emi sene-do'ok neu Au, Manetualain fo emi Manetualaim-ma soona, neukose Au ba'e-pala emi nenik nana'ak ma nininuk, ma neukose Au tao adook basa he'di-laus lala'en-na neme emi mai. 26Neukose, ta hapu ina manakalahenik do manabongi tak nai emi nusam dale fa. Neukose Au fe emi teu naluk.

27Emi meu leo leoina-la meu-a, neukose Au tao-alas ala bii-lamata'u neu Au; neukose Au tao-alas matan-nala kelupuak; neukose basa emi musum-mala ala lepos fali, fo lalai. 28Neukose, Au tao-a emi musum-mala lalai kii-konak ma Au usi heni leoina Hewi, Kanaan ma Het neme emi matam-ma mai, fo ela emi hapu tutulumatak. 29Neukose, Au ta usi heni la'iesak-kasa, nai teuk esa dalek fa, fo ela dae ndia boso nanapo'ilotak, fo bana fuik-kala boso henu dalek. 30Neukose, Au usi luma-luma os, losa emi hataholim-mala dede'un-na dai, soaneu langatuu-la dae ndia. 31Neukose, Au aketu emi nusam-ma dae toon-na neme Namo Akaba losa leo Lee Efrat-ta neu, ma neme Tasi Tala'dak losa leo mook solokaek-ka neu. Nai lelek emi tutulumatak fo emi loso-ma dae ndia soona, Au fe emi koasa soaneu koasa nusak ndia laun-na, nalosa emi hapu usi henis. 32Boso tao hehelu-balataak moo hataholi sila-la, do sila lamatua daebafan-nala, fo ela emi boso masala-masingo neu Au. 33Boso po'ilotak hataholi sila-la leo nai emi nusam dale, fo ela emi boso sene-do'ok neu sila-lamatua daebafan-nala, fo emi masala-masingo neu Au. Metema, emi sene-do'ok neu sila lamatua daebafan-nala soona, emi tu'da leo mamates-sa hihi'in dale meu.”

Currently Selected:

KELUARAN 23: twu

Highlight

Copy

Compare