KELUARAN 20

Paleta ka sanahuluk-kala

(Ul. 5:1-21)

1Boema Manetualain kokolak, de dede'a-kokolan nde ia, 2nafa'da nae, “Au nde emi Manetualain, fo mananoo emi kalua meme Masir mai, mamanak fo manatao emi da'di ata.

3Boso sene-do'ok neu lamatua fe'ek. Te sene-do'ok ka'da neu Au.

4 # Kel. 34:17; Im. 19:4, 26:1; Ul. 4:15-18, 27:15 Boso doki-dulak soaneu o aoinam-ma, dodoki-dudulak fo nalupa leo beek boe, nai lalai, nai daebafak-ka, do nai oe dale nai daebafak-ka buin-na. 5#Kel. 34:6-7; Bil. 14:18; Ul. 7:9-10 Boso sene-do'ok neu dodoki-dudulak matak leondiak-ka, nanahu Au nde emi Manetualain, de Au ta nau makasasamak-kana no hata esa boen. Hataholi fo nakamuu-nakadau Au-a, Au hukun losa tititi-nonosi ka telu ma ka 4. 6Tehu, Au atu'du Au susue-lalaing neu hataholi fo manasue-lai Au, ma manatunga Au paletang-ngala, tititi-nonosin lifu-lifun.

7 # Im. 19:12 Boso seseik Au na'deng-nga no sosoa-ndandaa tak, nana Au, fo emi Manetualain-na, huku su'di see fo ana pake sala Au na'deng-nga.

8 # Kel. 16:23-30, 31:12-14 Mafandendelek, fo tao malalao-malalafu fai Sabat-ta. 9#Kel. 23:12, 31:14-15, 34:21, 35:2; Im. 23:3 Nanahu, Au fe emi faik nee dalen-na, fo emi maue-male'di, ma tao-no'i basa emi tatao-nono'im lala'en-na, 10tehu fai ka hitun-na nde been-na fai hahaeaok, fo fai hehelik soaneu Manetualain. Nai faik ndia, hataholi esa boen, ta bole tao bela-ba'uk, nau emi do emi anam-mala, emi atam-mala, emi bana-manum do hataholi nusa dea fo manaleo nai emi nusam dale. 11#Kej. 2:1-3; Kel. 31:17 Nai faik nee dalen-na, Au, fo Manetualain, akadada'dik daebafak-ka, lalai-a, tasi-a no basa oe-isin lala'en-na, tehu neu fai ka hitun-na, Au hahaeaong. Hu ndia de, Au, fo Manetualain ba'e-pala fai Sabat-ta ma Au tao alalao-alalafun.

12 # Ul. 27:16; Mat. 15:4, 19:19; Mrk. 7:10, 10:19; Luk. 18:20; Ef. 6:2 Fe ha'da-holomata neu emi amam ma emi inam, fo ela emi tetu-temak, ma teu manalu nai nusak fo Au fen neu emi-a.

13 # Kej. 9:6; Im. 24:17; Mat. 5:21, 19:18; Mrk. 10:19; Luk. 18:20; Rm. 13:9; Yak. 2:11 Boso manisa.

14 # Im. 20:10; Mat. 5:27, 19:18; Mrk. 10:19; Luk. 18:20; Rm. 13:9; Yak. 2:11 Boso hohonge.

15 # Im. 19:11; Mat. 19:18; Mrk. 10:19; Luk. 18:20; Rm. 13:9 Boso mamanako.

16 # Kel. 23:1; Mat. 19:18; Mrk. 10:19; Luk. 18:20 Boso sakasii pepekok la'eneu hataholi fe'ek.

17 # Rm. 7:7, 13:9 Boso dale he'di hataholi fe'ek hata-heton; uman-na, saoinan-na, atan-nala, bana-manun, keledein-na, do su'di beek fo hataholi fe'ek nuun.”

Hataholi Israel-la bii-lamata'u

(Ul. 5:22-33)

18 # Ibr. 12:18-19 Lelek hataholi Israel-la lamanene mangguluk-ka, ma pupuuk-ka liin-na, boema lita ndelas-sa ma letek-ka namasu boema, ala dele beengge'be, ma ala bii-lamata'u ma lapadeik lai dook-ka. 19Lafa'da Musa lae, “Nemen-na, fo o nde kokolak moo ami, te neukose ami mamanene; tehu Manetualain boso kokolak no ami te neukose mate ami.”

20Musa nataa nae, “Boso bii-mamata'u. Manetualain mai fo ka'da so'ba-sudi emi, fo ela emi tunga mahelen, ma ta tao sala-singok fa.” 21Tehu hataholi sila-la, lapadeik lahele lai dook-ka, de ka'da Musa neu deka no ko'a makahatuk-ka, nai mamanak fo Manetualain nai ndia.

Nakanenetek la'eneu mei tunu-hotuk-ka

22 Manetualain paleta Musa fo nafa'da leoina Israel-la nae, “Emi mita basa tao leo beek, de Au, fo Manetualain, kokolak no emi neme lalai mai so. 23Boso tao dodoki-dudulak lilofulak do lilopilas, fo sene-do'ok neun, te emi muse sene-do'ok ka'da neu Au mesang-nga. 24Tao fe Au mei tunu-hotuk esa, taon neme dae-a mai, boema tunu-hotu emi bi'ilopom ma emi sapim-ma nai ndia, soaneu tutunu-hohotu nanatunuk, ma tutunu-hohotu mole-dame. Nai basa mamanak fo Au aketu basan ba'eneu emi, da'di leo mamanak makaluku-makatele soaneu Au-a, neukose Au mai, fo Au ba'e-pala emi. 25#Ul. 27:5-7; Yos. 8:31 Metema emi tao fe Au mei tunu-hotuk esa neme batu-a mai soona, boso taon neme batu nanapa'ak-ka mai, nana metema emi pake pa'ak fo pa'a ba'e batu-a soona, ta bole pake seluk mei tunu-hotuk ndia soaneu Au so'on. 26Boso tao mei tunu-hotuk mademaina, nalosa emi muse kae pake edahuuk, fo ela hataholi boso nita emi aopaam fo ta nandaa nita fan.”

Currently Selected:

KELUARAN 20: twu

Highlight

Copy

Compare