KELUARAN 17
17
Oe kalau neme batu matuaina dale mai
(Bil. 20:1-13)
1 #
Bil. 20:2-13
Basa boema, basa hataholi Israel-la lala'en-na, la'oela moo solokaek Sin-na, de ala lali leme mamanak esa leo mamanak esa leu, sama leo Manetualain paletan-na. Faik esa boema, ala ofu leme Rafidim, tehu ta hapu oe nininuk nai ndia fa. 2Boema, ala beemumu loo Musa ma lae, “Fe ami oe nininuk.” Musa nataa nae, “Tao le'e de, emi makamu ma emi so'ba-su'di Manetualain?”
3Tehu hataholi sila-la maan-nala ma'da nanseli, de beemumu lahele Musa. Lafa'da lae, “Tao le'e de, o moo ami kalua meme Masir mai? Fo ela ami moo ami anam-mala, ma ami bana-manum mate no maa ma'dak-ka do?”
4Boema Musa naloo bou-bou neu Manetualain nae, “Au muse tao hataholi ia-la le'e? Mitak, ala nau tapa au nenik batu.”
5 Manetualain nafa'da Musa nae, “Maloo-ma, maneleo de'ubee, fo la'ok makabubua moos, nai leoina ia uluk. Boeo ho'i meni aitete'ek fo o paken, nai lelek o fepa Lee Nil-la. 6Neukose, Au apadeik nai o matam-ma, nai batu matuaina esa lain, nai Lete Sinai-a. Fepa batu ndia, soona neukose oe-a kalua, nalosa hataholi sila-la bisa linu.” Musa tao leondiak, nai basa maneleo Israel-la matan.
7Ala foi mamanak ndia na'de Masa nanahu nai mamanak ndia, hataholi Israel-la so'ba-su'di Manetualain, nai lelek latane lae, “Ade Manetualain no ita do ta?” Ala foi mamanak ndia boeo na'de Meriba nanahu nai mamanak ndia, hataholi Israel-la lakamuu-muu.
Latee-lata'ti loo hataholi Amalek-kala
8Basa boema, hataholi Amalek-kala mai de ala sapu-la hataholi Israel-la nai Rafidim. 9Musa nafa'da Yosua nae, “Hele-ma hataholi de'ubee, fo latee-lata'ti loo hataholi Amalek-kala. Balahaa soona, neukose au apadeik nai pupukuk lain, fo au ho'u aitete'ek fo Manetualain nadenu au ho'i inik-ka.” 10Yosua tao tunga Musa paletan-na. Neu natee-nata'ti no hataholi Amalek-kala, te Musa, Harun ma Hur, ala nda'e leo pupukuk lain leu. 11Lelek Musa so'uk liman-na, hataholi Israel-la sengi. Tehu metema, Musa nakona liman-na soona, hataholi Amalek-kala nde sengi-a. 12Lelek Musa sota-mangu boema, Harun ma Hur ho'i fe Musa batu esa, fo ela ana bisa nangatuuk; Harun ma Hur lapadeik lai Musa boboa kii-konan, fo ala to'ba liman-na, fo ela ana so'uk nahele liman-na, losa le'do tenak. 13Mate'en-na, Yosua sengi hataholi Amalek-kala.
14 #
Ul. 25:17-19; 1Sem. 15:2-9 Manetualain nafa'da Musa nae, “Sulak-ma sesengik ia, fo ela nananafandendelek nahele. Mafa'da Yosua, mae neukose Au tao amopo-amate hataholi Amalek-kala.” 15Boema, Musa napadedeik-na mei tunu-hotuk esa, de ana foin na'de “Manetualain nde been-na, au Dedeong-nga.” 16Musa nae, “So'uk mamadema Manetualain dedeon-na! Manetualain natee-nata'ti la'ban hataholi Amalek-kala, losa dodoon-na!”
Currently Selected:
KELUARAN 17: twu
Highlight
Copy
Compare
Share
Want to have your highlights saved across all your devices? Sign up or sign in
