Apocalípsis 1
1
Librupa qallanan
1Kay libruchömi qellqashqa kaykan Tayta Dios Jesucristuta revelanqan. Jesucristum angelninta mandamur tsay revelacionta sirviqnin Juanta revelarqan. Tsay revelacionwanmi sirviqninkunata imapis päsananpäna kaqkunata tantiyatsirqan. 2Juannam tsay revelacionta qellqar Tayta Dios ninqankunata, Jesucristo ninqankunata y llapan rikanqankunata qellqashqa.
3Kushishqam kayanqa kay qellqashqa kaykaqkunata liyiqkuna y liyipäyanqanta wiyar cäsukuqkunapis. Kay qellqashqa kaykaqkunaqa cumplinanpänam kaykan.
Qanchis iglesiakunachö qorikaq wawqikunata y panikunata saludanqan
4Asia provinciachö kaykaq qanchis iglesiakunachö qorikaq wawqikuna y panikuna:
Noqa Juanmi qamkunaman qellqaykämü. Unaypita kawaq, kananpis kaykaq y shamunanpä kaykaq Tayta Dios y trönunpa puntanchö kaykaq qanchis espïritukunapis#1.4 Qanchis espïritukunaqa qanchis angelkuna kanqanpis o Espíritu Santu kanqanpis manam musyakantsu. kuyapäyäshurniki alli kawayänaykipä yanapaykuyälläshuy.#Apoc. 4.5.
5Jesucristupis alli kawayänaykipä qamkunata yanapaykuyälläshuy. Paymi Tayta Dios munanqannölla willakuyninta willakushqa y wanushqakunapita puntata kawamushqa.#Hech. 26.23; Col. 1.18. Kay patsachö llapan mandaq reykunapitapis mas poderyuqmi.#Sal. 89.27. Paymi kuyamarnintsik yawarninta jichar llapan jutsantsikta mayllamarquntsik.
6Mandamaqnintsik rey karmi poderninchö kanantsikpä qorimarquntsik. Tsaynöllam Papänin Tayta Diosta sirviq sacerdötikuna kanantsikpä churamarquntsik.#Éxo. 19.6; Isa. 61.6; 1Ped. 2.5, 9; Apoc. 5.10; 20.6. ¡Jesucristo imaypis alabashqa kaykullätsun! ¡Pay japallan mandamaqnintsik kaykullätsun! Amén.
7¡Pukutay jananchömi Jesucristo kutimunqa!#Dan. 7.13; Mat. 24.30; Mar. 13.26; Luc. 21.27; 1Tes. 4.17.
Kutimuqtam llapan runakuna rikayanqa.
Payta tuksir wanutsiqkunapis rikayanqam.#Zac. 12.10; Juan 19.34, 37.
Kutimuqta rikarmi maytsaychöpis runakuna waqayanqa.
Tsaynömi kanqa. Amén.
8Unaypita kawaq, kananpis kaykaq y shamunanpä kaykaq poderösu Tayta Diosmi nin: <<Alfa y Omegam noqa kä.#1.8 Alfa ninanqa griego alfabëtuchö punta kaq letram kaykan. Omega ninanqa ultimu kaq letram kaykan. Tsaymi Alfa y Omegam noqa kä ninqanqa qallanan y ushananmi kä ninan. [Qallanan y ushananmi kä]>>.#Isa. 41.4; 44.6; Apoc. 1.17; 22.13.
Jesucristuta Juan rikanqan
9Noqaqa Jesucristuman yärakuq mayiki Juanmi kä. Qamkunanöllam Jesucristupa mandakuyninchö kaykä. Ñakatsiyäshunqaykinöllam noqatapis Jesucristuman yärakunqäpita ñakatsiyäman. Qamkunanöllam paypa puntanman chänäpä mana ajayaypa shuyaykä. Tayta Diospa willakuyninta willakunqäpita y Jesucristo salvamaqnintsik kanqanta willakunqäpitam Patmos islachö prësu kaykä.
10Tsaychö kaykarmi domingu junaq Espíritu Santupa poderninchö kar cornëta tukamuqnörä qepächö nimuqta wiyarqä: 11<<[Alfa y Omegam noqa kä. Qallanan y ushananmi kä.] Revelacionchö rikatsinqäkunata juk rölluman qellqaskir apatsiy [Asia provincia] qanchis markakunachö kaykaq iglesiakunaman. Tsay markakunam kayan Éfeso, Esmirna, Pérgamo, Tiatira, Sardis, Filadelfia y Laodicea>>.
12Qepächö parlamuqta wiyarmi tikrarqä pï kanqantapis rikanäpä. Tsaychömi qoripita rurashqa qanchis candelërukunachö nina tsariykaqta rikarqä.#Éxo. 27.21; Lev. 24.1-4; Zac. 4.10. 13Tsay candelërukuna chawpinchömi runapa tsurinnö kaykaqta rikarqä.#Dan. 7.13. Paymi chaki puntanyaq röpan jatishqa kaykarqan. Pëchunpam qoripita rurashqa wachukuwan wataraykarqan.#Dan. 10.5. 14Aqtsanpis yuraq millwanö y rashtanö yuraqmi karqan.#Dan. 7.9. Ñawinnam ninanörä atsikyarqan. 15Chakinkunapis pulishqa broncinörämi chipipirqan.#Dan. 10.6. Parlanqanpis atska yaku aywar qayaraqnörämi karuman wiyakarqan.#Eze. 1.24; 43.2. 16Derëcha kaq makinchömi qanchis qoyllurkunata tsarararqan. Shiminpitanam ishkan lädunpa afilashqa espäda yarqamurqan. Cäranpis rupaynörämi chipipirqan.
17Payta rikaykurmi puntanman wanushqanö ishkiskirqä. Tsaymi derëcha kaq makinwan yataykamar nimarqan: <<Ama mantsamaytsu. Noqam qallanan y ushanan kä.#Isa. 41.4; 44.6-8; 48.12; Apoc. 1.8; 2.8; 22.13. 18Imayyaqpis kawaqmi kä. Imayyaqpis kawanäpämi wanutsiyämanqanpita kawamurqü. [Amén.] Noqam tsararaykä wanushqakunapa almankuna kaykäyanqan llävita.#1.18 Wanushqakunapa almankuna kaykäyanqan llävita tsararaykanqanta nirmi Jesucristo tantiyatsirqan wanushqakunata kawatsimunanpä poderyuq kanqanta. 19Llapan rikanqaykita qellqay. Kanan päsaykanqanta y päsananpä kaqkunatapis llapanta qellqay.
20<<Kananmi tantiyatsishayki derëcha kaq makïchö rikanqayki qanchis qoyllurkuna y qoripita qanchis candelërukuna ima kanqantapis. Qanchis qoyllurkuna kaykäyan tsay qanchis iglesiakunapa angelninkunam. [Rikanqayki] qanchis candelërukuna kayan tsay qanchis markakunachö kaykaq iglesiakunam>>.
Currently Selected:
Apocalípsis 1: qxo
Highlight
Share
Copy
Want to have your highlights saved across all your devices? Sign up or sign in
© 2002, 2008, Wycliffe Bible Translators, Inc. All rights reserved.