Lucas 10
10
Qanchis chunka ishkay discïpulunkunata Jesús mandanqan
1Tsaypitanam qanchis chunka ishkay#10.1, 17 Wakin qepa kaq griego copiakunachöqa qanchis chunka (70) kanqantam nin. (72) discïpulunkunata akraskir pay chänanpä kaq markakunaman Señor Jesús ishkay ishkay mandarqan. 2Mandarmi nirqan: <<Cosëcha qoriypä kanqannömi atskaq runakunapis Tayta Diospa willakuyninta chaskiyänanpä kaykäyan. Peru tsaynö kaptinpis wallkaqllam willakuqkuna kayan. Willakuqkunata mandamunanpä Tayta Diosta mañakuyay>>.
3<<Kanan willakuq aywayay. Löbukunaman üshakunata qaykuqnömi qamkunata mandaykä. 4Aywar ama apayankitsu qellayta, alporjata ni llanqikikunata. Piwanpis nänichö tinkuskir ama parlakur shäkuyankitsu.
5<<Pipa wayinmanpis charqa niyanki: <Alli kaway qamkunachö kaykullätsun>. 6Alli chaskiyäshuptikiqa niyanqaykinömi alli kaway kanqa. Peru mana chaskiyäshuptikim sïqa alli kaway kanqatsu. 7Ama wayin wayinqa puriyankitsu, sinöqa patsatsiyäshunqayki wayillachö quëdakuyanki. Qarayäshunqaykita mikuyanki y upuyanki. Arupakuq runa päguta chaskinanpä derëchun kanqannömi qamkunapapis qarayäshunaykipä derëchuykikuna kan.
8<<May markaman chäyaptikipis chaskiyäshuptikiqa qarayäshunqaykita mikuyanki. 9Tsay markachö qeshyaqkunata allïtsir niyanki: <¡Tayta Diospa mandakuynin chämushqanam!> 10May markachöpis mana chaskiyäshuptikiqa cälliman yarquskir niyanki: 11<Kikikikuna culpayuq kayanqaykita musyayänaykipämi markaykikunapa polvun chakïkunachö kaykaqtapis tapsikuyä. Peru musyayay Tayta Diospa mandakuynin chämunqanta>.
12<<Noqam nï: Sodoma runakunata castiganqanpitapis peormi juiciu finalchö tsay runakunata Tayta Dios castiganqa.#Gén. 19.1-29.
13<<¡Allaw, Corazín runakuna! ¡Allaw, Betsaida runakuna! Markaykikunachö milagrukunata ruranqänö Tiro y Sidón markakunachö#Isa. 23.1-18; Eze. 26.1—28.26; Joel 3.4-8; Amós 1.9-10; Zac. 9.2-4. rurashqa kaptïqa maynam jutsankunata dëjar lütu röpata jatikurkur uchpa jananchö jamaräyanman karqan. 14Tsaymi Tiro y Sidón runakunata castiganqanpitapis mas peorrä juiciu finalchö Tayta Dios castigayäshunki. 15Capernaúm runakuna, ¿ciëluman chäyänaykipä kanqantaku yarpäyanki? Qamkunaqa Hadesman qaykushqam kayanki>>.#Isa. 14.13-15.
16Tsaypitanam discïpulunkunata nirqan: <<Qamkuna willakuyanqaykita chaskirqa noqatam chaskiyäman. Qamkunata mana chaskiyäshurnikiqa noqatapis manam chaskiyämantsu. Noqata mana chaskimarqa mandamaqnïtapis manam chaskiyantsu>>.
Willakuq aywaqkuna kutiyanqan
17Qanchis chunka ishkay (72) aywaqkuna kushishqa kutiykurmi Jesústa willar niyarqan: <<Taytay, jutikichö qarquyaptïmi ¡supaykunapis cäsuyämashqa!>>
18Jesúsnam nirqan: <<Noqa rikarqümi imayka illaqukuynörä Satanás jeqamuqta.#10.18 Imayka illaqukuynörä Satanás jeqamurqan ninanqa Satanás poderniynaq rikakurqan ninanmi. 19Noqam podernïta qamkunata qararqü culebrakunata, atuq kurukunata jaruyänaykipä y Satanás imata ruraptinpis vinciyänaykipä. Satanásta ichipäyaptikipis manam imapis päsayäshunkitsu. 20Peru supaykuna cäsuyäshunqaykipita kushikurpis ciëluchö jutikikuna qellqashqa kanqanpita mas kushikuyay>>.
Tayta Diosta Jesús alabanqan
Mateo 11.25-27; 13.16-17
21Tsay höranam Espíritu Santupa poderninwan kushikur Tayta Diosta mañakur Jesús nirqan: <<Ciëluchö y kay patsachö poderyuq Papä, qamtam alabä. Manam yachaq tukuqkunatatsu yarpaykanqaykikunata musyatsirquyki, sinöqa wamranö kaqkunallatam. Papä, tsaynö kanantam munarquyki>>.
22Tsaypitanam tsaychö kaykaq runakunata nirqan: <<Papänïmi llapantapis podernïman churamushqa.#Juan 3.35. Tsurin kanqäta payllam musyan. Tsaynöllam noqalla musyä Tayta Dios Papänï kanqanta. Tsaymi noqa tantiyatsinqä kaqkunalla Papänï imanö kanqantapis musyayan>>.#Juan 1.18; 10.15.
23Tsaypitanam discïpulunkunallata nirqan: <<Kanan päsanqankunata rikarmi kushishqa kayanki. 24Noqam nï: Unay profëtakunapis y reykunapis rikayanqaykita rikayta munarpis manam rikayashqatsu. Wiyayanqaykita wiyayta munarpis manam wiyayashqatsu>>.#Mat. 13.16-17.
Runa mayinta Samaria runa kuyapanqan
25Juk kutichönam ley yachatsikuq runa Jesús yachanqanta o mana yachanqantapis musyayta munar tapurqan: <<Rabí, ¿imatatä ruräman mana ushakaq kawayta tarinäpä?>>
26Jesúsnam nirqan: <<¿Imatatä Tayta Diospa leyninchö nin? Liyir ¿imatatä tantiyanki?>>
27Tsay runanam nirqan: <<Tayta Diospa leyninchömi nin: <Tayta Diosta kuyanki llapan shonquykiwan, llapan voluntänikiwan, llapan kallpaykiwan y llapan yarpaynikiwan. Runa mayikitapis kikiki kuyakunqaykinö kuyanki> >>.#Deut. 6.5; Lev. 19.18.
28Niptinnam Jesús nirqan: <<Allitam nirquyki. Tsaykunata cumplirqa mana ushakaq kawaytam tarinki>>.
29Tsay runanam yachaq tukur tapurqan: <<¿Pitä tsay runa mayïqa?>>
30Tsaynö tapuptinmi Jesús nirqan: <<Juk runash Jerusalénpita Jericó markaman aywaykänä. Aywaykaptinshi suwakuna pasaypa maqakacharkur llapan apanqanta y jatiranqan röpantapis qechuyänä. Tsaypitash wanushqatanö jitaskir aywakuyänä.
31<<Tsay nänipash juk sacerdöti päsaykänä. Tsay runata rikaykarpis mana rikaq tukurshi päsakunä. 32Tsaynöllash levitapis tsay runa jitaraykanqan kaqman chänä. Paypis mana rikaq tukurshi päsakunä.
33<<Paykunapa qepantanash Samaria runapis chänä. Payshi sïqa jitaraykaqta tariykur kuyapänä. 34Tsayshi aceitiwan y vïnuwan jampiykur herïdankunata shumaq watapänä. Tsaypitanash ashnunman muntarkatsir patsakuna wayiman apaykur cuidanä. 35Waraynin aywakurnash wayiyuqta ishkay junaq jornaltanö pägar ninä: <Kay qeshyaq runata jampiykullanki. Masta gastaptikiqa kutimurmi pägalläshayki> >>.
36Tsaynö willaskirnam Jesús tapurqan: <<Tsay kimsan runakunapita ¿mayqan kaqtä runa mayinta kuyaparqan?>>
37Niptinmi nirqan: <<Samaria runam>>.
Jesúsnam nirqan: <<Kanan qampis tsay runanölla runa mayikita kuyapanki>>.
Martapa y Maríapa wayinman Jesús chanqan
38Tsaypita discïpulunkunawan Jesús aywarmi juk takshalla markaman charqan. Tsaychömi Marta jutiyuq warmi wayinman patsatsirqan. 39Martapa ñañanmi karqan María. Paymi Jesús yachatsinqanta wiyar ñöpanchö jamaraykarqan. 40Peru Martanam wayichö imayka rurayninkunawan ocupädu kar Jesúsman witiykur nirqan: <<Taytay, ¿imanirtä ñañä tsaychö jamaräkun japallä ñakaykaptï? ¡Yanapamänanpä niykullay!>>
41Señor Jesúsnam nirqan: <<Ä Marta, Marta, qamqa imayka ruraynikikunallapämi yarpachakuykanki. 42Peru llapanpitapis jukllayllam mas alliqa. Tsaytam ñañayki María akrashqa. Pay yachakunqantaqa manam pipis qechunqatsu>>.
Currently Selected:
Lucas 10: qxo
Highlight
Share
Copy
Want to have your highlights saved across all your devices? Sign up or sign in
© 2002, 2008, Wycliffe Bible Translators, Inc. All rights reserved.