Juan 15
15
Üvapa yuranman Jesús iwalatsinqan
1Tsaypitanam Jesús nirqan: <<Noqam rasunpa kaq üvapa yuran kä.#Sal. 80.8-16; Isa. 5.1-7. Papänïnam üva cuidaq. 2Mayqan rämäpis mana wayuptinqa Papänïmi muturinqa. Peru wayuq kaqtam sïqa mas wayunanpä shumaq llawmin. 3Üvata llawmiptin limpiu kanqannömi qamkunapis ninqäkunata cäsur jutsaykikunapita limpiuna kayanki.
4<<Noqawan jukllayllanö kawayay. Tsaynö kawayaptikiqa noqapis qamkunawanmi jukllayllanö kashä. Üvapa räman yuranchö mana kaykar mana wayunqannömi qamkunapis noqawan mana jukllayllanö karqa Tayta Dios munanqannö kawayta puëdiyankitsu.
5<<Noqaqa üvapa yuranmi kä. Qamkunam rämäkuna kayanki. Tsaymi noqawan jukllayllanö kawarqa alli wayuq rämanö kayanki. Peru noqawan jukllayllanö mana kawarmi sïqa ima ruraytapis puëdiyankitsu. 6Pipis noqawan jukllayllanö mana kawarqa yuranpita mutushqa rämanömi tsakinqa. Tsakiskiptinnam qoriskir ninaman jitayanqa.
7<<Noqawan jukllayllanö kar y yachatsinqänö kawarqa llapan mañakayämanqaykitam chaskiyanki. 8Tsaynöpam alli wayuq üvanö kar rasunpa discïpulükuna kayanki. Tsaynö kawayaptikim Papänïta alabayanqa.
9<<Papänï kuyamanqannömi noqapis qamkunata kuyä. Tsaynö kuyaykaptïqa qamkunapis kuyayämay. 10Mandamientükunata cumplirqa rasunpam kuyayämanki. Tsaynöllam noqapis Papänïta kuyar mandamientunkunata cumplï. 11Tsaykunatam nï noqa kushishqa kawanqänö qamkunapis kushishqa kawayänaykipä.
12<<Mandamientü kaykan qamkunata kuyanqänö jukniki juknikipis kuyanakuyänaykipämi.#Juan 13.34; 15.17; 1Juan 3.23; 2Juan 5. 13Rasunpa kuyakurqa amïgun raykurmi wanurpis wanunman. 14Llapan ninqäkunata cäsurqa qamkunapis amïgümi kayanki. 15Sirviq kayanqaykita mananam niyäshaykinatsu. Sirviqtaqa manam patronnin imata yarpanqantapis willantsu. Peru amïguntam sïqa llapan yarpanqanta willan. Tsaynöllam qamkunatapis amïgü kayaptiki Papänï nimanqankunata llapanta willarqü.
16<<Manam qamkunatsu akrayämarquyki, sinöqa noqam qamkunata akrarqü. Tsaynömi akrarqü maypa aywarpis alli wayuq jachanö kar allikunata rurayänaykipä y tsay rurayanqaykikuna imaypis kaykänanpä. Tsaymi noqapa jutïchö imatapis mañakuyanqaykita Papänï qarayäshunki. 17Mandamientü imata ninqantapis yapaymi nï: Jukniki juknikipis kuyanakur kawayay.
Jesúsman criyikuqkunata chikiyänanpä ninqan
18<<Runakuna chikiyäshuptiki ama llakikuyaytsu. Tsaypa rantinqa tantiyakuyay noqatapis puntata chikiyämanqanta. 19Jutsata rurar kawayaptikiqa Diosta mana cäsuqkunam kuyayäshunkiman. Peru Tayta Dios munanqannö kawayaptikim chikiyäshunki.#Juan 17.14-18. Pay munanqannö kawayänaykipämi qamkunata akrarqü.
20<<Yarpäyay qamkunata ninqäta: <Sirviqqa manam patronninpita mas poderyuqtsu>.#Mat. 10.24; Luc. 6.40; Juan 13.16. Tsay ninqänöllam noqata chikimarqa qamkunatapis chikiyäshunki. Noqa ninqäkunata chaskimarqa qamkuna niyanqaykitapis chaskiyäshunkim. 21Noqa raykur runakuna chikiyäshunki mandamaqnï Papänïta mana reqirmi.
22<<Kay patsaman shamur mana willaptïqa manam jutsayuqtsu kayanman.#15.22 Tsaynö nirmi Jesucristo nirqan: Kay patsaman shamur mana willakuptïqa mana criyikayämanqanpita runakuna manam jutsayuq kayanmantsu karqan. Diospa willakuyninta willakuptï mana cäsurmi sïqa jutsayuq kayan. 23Noqata chikimarqa Papänïtapis chikinmi.
24<<Pipis mana ruranqan milagrukunata paykunapa puntanchö ruraykaptïpis chikimarmi jutsayuq kaykäyan. Noqata chikimarqa Papänïtapis chikiyanmi. Tsay milagrukunata mana ruraptïqa manam jutsayuqtsu kayanman karqan. 25Leyninkunachömi nin: <Jutsaynaq kaykaptïmi runakuna chikiyämashqa>.#Sal. 35.19; 69.4. Tsay ninqannöllam llapanpis cumpliykan.
26<<Papänï kaqpita Yanapakuqta mandamuptïmi noqapä runakunata musyatsinqa. Tsay Yanapakuqqa rasun kaqta tantiyatsikuq Espíritu Santum. 27Tsaynöllam qamkunapis qallaykunanpita noqawan purishqa kar noqapä musyatsiyanki.
Currently Selected:
Juan 15: qxo
Highlight
Share
Copy
Want to have your highlights saved across all your devices? Sign up or sign in
© 2002, 2008, Wycliffe Bible Translators, Inc. All rights reserved.