Juan 1
QXOB
1
Dios kaykar kay patsaman Jesucristo shamunqan
1Imapis manarä kaptinmi Diospa Palabran kaykarqanna.
Tayta Dioswanmi payqa kaykarqan.
Payqa Diosmi.
2Qallaykunanpitam Tayta Dioswan kaykarqan.
3Paywanmi llapan imaykatapis Tayta Dios kamarqan.
Kay patsachö kaqkunaqa llapanpis pay kamanqanmi.#Gén. 1.1-3; Sal. 33.6; Prov. 8.22-31; Col. 1.15-17; Heb. 1.2; 1Juan 1.1; Apoc. 19.13.
4Paychömi mana ushakaq kaway kaykan.
Tsay kawayqa runakunapä aktsim.
5Tsay aktsiqa tsakaychöpis pasaypam atsikyan.
Tsakaypis tsay aktsita manam upitsintsu.
6Juk runam Juan jutiyuq karqan.#Mat. 3.1; Mar. 1.4; Luc. 3.1-2. Paytam Tayta Dios mandarqan 7willakuptin llapan runakuna tsay aktsiman criyiyänanpä. 8Juanqa manam tsay aktsitsu karqan, sinöqa tsay aktsipä willakuqllam.
9Rasunpa kaq aktsiqa llapan runakunatam aktsipan.
Payqa kay patsamanmi shamurqan.
10Kay patsachö kaykaptinpis y kay patsata kikin kamashqa kaykaptinpis runakuna manam payta reqiyarqantsu.
11Kuyanqan runakunaman shamuptinpis manam chaskiyarqantsu.
12Peru payman yärakur chaskikuqkunatam sïqa wamrankuna kananpä Tayta Dios chaskin.
13Manam mamanpita yurinqanpitatsu
ni runapa tsurin kanqanpitatsu Tayta Diospa wamran kayan,
sinöqa Tayta Diospita yurishqa karmi.
14Diospa Palabran kay patsaman shamurmi runanö yurirqan.
Noqakunawanmi kay patsachö purirqan.
Tayta Diospa japallan Tsurin kaptinmi poderyuq kaykaqta rikayarqä.
Kuyapäkuq y rasun kaqta parlaqmi karqan.
15Paypämi Juan willakur nirqan: <<Tsay runapämi noqa nirqä: Qepäta shamuqqa noqapita mas poderyuqmi. Payqa manarä yuriptïmi kaykarqanna>>.
16Payqa pasaypa kuyakuq karmi llapantsikta imaypis kuyamantsik.
17Leyninkunataqa Moiséswanmi Tayta Dios willakatsirqan.
Peru kuyapäkuyninta y rasunpa kaq willakuynintam sïqa Jesucristuwan tantiyatsimarquntsik.
18Manam pipis Tayta Diosta imaypis rikashqatsu.
Peru japallan Tsurinmi sïqa, Dios kar y Tayta Dioswan jukllaylla kar, Tayta Dios imanö kanqanta musyatsimarquntsik.#Mat. 11.27; Luc. 10.22; 1Juan 1.2.
Bautizaq Juan willakunqan
Mateo 3.1-12; Marcos 1.2-8; Lucas 3.15-17
19Juan pï kanqantapis tapuyämunanpämi sacerdötikunatawan levitakunata Jerusalén autoridäkuna mandayarqan. Tapuyaptinmi Juan nirqan: 20<<Rasun kaqtam nï: Noqa manam Cristutsu kä>>.
21Tsaymi yapay tapuyarqan: <<Tsayöraqa ¿pitä kanki? ¿Profëta Elíasku?>>#Mal. 4.5.
Juannam nirqan: <<Manam Elíastsu kä>>.
<<Tsayöraqa ¿shamuqpä kaq profëtaku kanki?>>#Deut. 18.15, 18.
Niyaptinmi nirqan: <<Manam tsay profëtatsu kä>>.
22Tsaymi niyarqan: <<Tsayöraqa ¿pitä kanki? Mandamaqnïkunata willayänäpä pï kanqaykitapis willayämay>>.
23Juannam nirqan: <<Profëta Isaías qellqanqanchömi nin: <Juk runam desiertuchö qayaraypa willakur nin: <<Tayta Dios shamunanpä wiksu nänita derechayay>> >. Tsay willakuq runaqa noqam kä>>.#Isa. 40.3.
24Mandayanqan fariseukunam 25Juanta niyarqan: <<Cristupis ni Elíaspis ni shamuqpä kaq profëtapis mana kaykarqa ¿imanirtä runakunata bautizanki?>>
26Juannam nirqan: <<Noqaqa yakullawanmi bautizä. Peru kaychönam mana reqiyanqayki runapis kaykan. 27Paymi [noqapita mas puntata karpis] qepätarä shamunqa. Noqaqa llanqi watunta paskanalläpäpis manam välïtsu>>.
28Jordán mayu tsimpan Betaniachö runakunata bautizaykaptinmi Juanta tsaynö tapuyarqan.
Jesús shamuykaqta Bautizaq Juan rikanqan
29Tsaypita waraynin junaq Jesús shamuykaqta rikaskirmi Juan nirqan: <<¡Kaymi Tayta Dios mandamunqan Cordëru! Paymi runakunata jutsankunapita perdonanqa. 30Tsay runapämi noqa nirqä: <Qepäta shamuqqa noqapita mas poderyuqmi. Payqa manarä yuriptïmi kaykarqanna>. 31Noqapis manam musyarqätsu Tayta Dios mandamunqan pay kanqanta. Peru imanö kaptinpis Israel runakuna payta reqiyänanpämi runakunata bautizaykä>>.
32Mastam Juan nirqan: <<Noqa rikarqä imayka palumanö Espíritu Santu ciëlupita payman urämuqtam. 33Manarä tsayta rikar manam musyarqätsu Tayta Dios mandamunqan kanqanta. Peru yakuwan bautizanäpä mandamarmi Tayta Dios nimarqan: <Mayqan runapa jananmanpis Espíritu Santu palumanö rataqta rikarmi musyanki Espíritu Santuwan bautizananpä kanqanta>. 34Tsay nimanqannöllam tsay runapa jananman Espíritu Santu palumanö rataqta rikarqü. Tsaymi qamkunata willä Tayta Diospa Tsurin kanqanta>>.
Punta kaq discïpulunkunata Jesús akranqan
35Tsaypita waraynin junaqmi ishkay discïpulunkunawan Juan kaykarqan. 36Jesús päsaykaqta rikaskirmi nirqan: <<¡Rikayay! ¡Tayta Dios mandamunqan Cordërum päsaykan!>>
37Tsaynö ninqanta wiyarmi Juanpa ishkay discïpulunkuna Jesúspa qepanta aywayarqan. 38Tumanqanchömi qepanta paykuna aywaykäyaqta Jesús rikarqan. Tsaymi nirqan: <<¿Pitatä ashiykäyanki?>>
Paykunanam niyarqan: <<Rabí, ¿maychötä patsakurquyki?>>
(Rabíqa yachatsikuq ninanmi.)
39Jesúsnam nirqan: <<Aku, reqitsiyäshayki>>.
Tsaynö nir pusharmi maychö patsakunqantapis reqitsirqan. Tardiyaptinnam tsay ishkay discïpulukuna tsayllachöna Jesúswan quëdakuyarqan.
40Tsay ishkay discïpulunpita jukaqmi karqan Simón Pedrupa wawqin Andrés. Paymi Juan ninqanta wiyar Jesúspa qepanta aywarqan. 41Tsaypitanam Andrés aywarqan wawqin Simón kaqman. Chaykurnam willarqan: <<¡Mesíaswanmi tinkuyarqü!>>
(Mesíasqa Tayta Dios mandamunqan Cristum.)
42Tsaypitanam Jesús kaqman pusharqan. Chaykuptinnam Simónta rikaykur Jesús nirqan: <<Qamqa Jonáspa tsurin Simónmi kanki. Kananpitaqa Cefasnam jutiki kanqa>>.
(Cefasqa Pedro ninanmi.#1.42 Cefaspis y Pedrupis rumi ninanllam.)
Felipita y Natanaelta Jesús qayanqan
43Tsaypita waraynin junaq Galileaman aywaykanqanchö Felipita tariskirmi Jesús nirqan: <<Aku aywashun>>.
44Felipiqa Betsaida markapitam karqan. Andréswan Pedrupis tsay markallapitam kayarqan. 45Tsaymi Natanaelman aywaykur Felipe nirqan: <<¡Moisés y wakin profëtakunapis Cristo shamunanpä qellqayanqannöllam shamushqa! ¡Paywanmi tinkuyarqü! ¡Payqa Josépa tsurin Nazaret markapita Jesúsmi!>>
46Natanaelnam nirqan: <<Nazaretpita ¿pillaqa alli runa kanmantsurä?>>
Felipinam nirqan: <<Aku rikanaykipä aywashun>>.
47Natanael chaykaqta rikaykurmi Jesús nirqan: <<Kay runam sïqa rasunpa Israel runa. Payqa manam llullakuntsu>>.
48Tsaynö niptinnam Natanael tapurqan: <<¿Imanöpatä reqimarquyki?>>
Jesúsnam nirqan: <<Felipe manarä qayashuptikim hïgus planta chakinchö jamaraykaqta rikarqü>>.#1.48 Tsaynö niptinmi Natanael tantiyarqan Jesús payta rikanqan milagru kanqanta.
49Tsaynö niptinmi Natanael nirqan: <<Rabí, ¡qamqa Tayta Diospa Tsurinmi kanki!#Mat. 16.16. ¡Israel runakunapa mandaqnin reymi kaykanki!>>
50Jesúsnam nirqan: <<¿<Hïgus planta chakinchö jamaraykaqta rikarqü> ninqäpitaku tsaynö nimanki? Tsaypita mas espantaypä kaqkunatam rikanki>>.
51Tsaypitanam Jesús nirqan: <<Rasunpam nï: [Kananpitaqa] ciëlu punku kichakämuptin Tayta Diospa angelninkuna Runapa Tsurinman uraykämuqta y kutiykaqtam rikayanki>>.#Gén. 28.12.