Zacarías 8

Kuyanqan runakunata yapay alli kawayänanpä Tayta Dios promitinqan

1Llapanta mandaq Tayta Diosmi nimarqan: 2<<Noqa llapanta mandaq Tayta Dios karmi nï: Siónchö täraqkunatam pasaypa kuyä. Tsaymi chikiqninkunataqa rikaytapis munätsu.

3<<Noqa Tayta Diosmi nï: Sión jirkanmanmi kutimushä. Jerusalénchömi täräshä. Tsay markataqa cäsukuq marka kanqantam niyanqa. Llapanta mandaq Tayta Dios akranqan sagrädu jirkan kanqantam niyanqa.#Isa. 1.26.

4<<Noqa llapanta mandaq Tayta Dios karmi nï: Jerusalén markapa pläzankunachömi rukukunapis y chakwankunapis yapay jamaräyanqa. Paykunaqa pasaypa rukuna karmi tukrullankunawanna puriyanqa. 5Wamrakunapis atska karmi cällikunachö pukllayanqa.

6<<Noqa llapanta mandaq Tayta Dios karmi nï: Tsaynö kananpä kanqanta mana criyiyaptikipis noqapäqa manam ajatsu kanqa.

7<<Noqa llapanta mandaq Tayta Dios karmi nï: Noqam kuyanqä runakunata maytsay nacionman prësu apayanqanpita qorimushä. 8Paykunataqa Jerusalénchö täyänanpämi maytsaypitapis qorimushä. Paykunam kuyanqä runakuna kayanqa. Noqanam paykunapa Diosnin kashä.#Jer. 31.33; 32.38; Eze. 37.23, 27. Llapan promitinqäta cumplirmi paykunata shumaq cuidashä.

9<<Noqa llapanta mandaq Tayta Dios karmi nï: Templüpa cimientunta allitsayta qallaykuyanqayki junaqpitam profëtakuna willayäshurqayki shäritsir ushayänaykipä kanqanta. Tsaynö kaykaptinqa kushi kushilla aruyay. 10Templuta shäritsiyta manarä qallayaptikiqa manam qellay kashqatsu aruqkunata pägayänaykipä ni ashmapa flëtinta pägayänaykipäpis. Jukniki juknikipis chikinakuyänaykipä dëjaskiptïmi nänipa purirpis mantsa mantsalla puriyarqayki. 11Peru kananpitaqa manam tsaynönatsu kawayanki. Noqa llapanta mandaq Tayta Diosmi tsaynö nï. 12Tsaypa rantinmi llapaykikuna tranquïluna kawayanki. Üvaykikunapis shumaqnam wayunqa. Chakraykikunachö muruyanqaykipis allim wayunqa. Tamyapis tiempullanchömi tamyamunqa. Bendicionnïta churamuptïmi alli kawayanki. 13Judá runakuna y Israel runakuna, ñöpataqa maytsay nación runakunam niyarqan maldicionädu kayanqaykita. Tsaynö niyaptinpis noqam salvar bendicionnïta qamkunaman churamushä. ¡Mantsariyänaykipa rantin valurayay!

14<<Noqa llapanta mandaq Tayta Dios karmi nï: Unay castaykikuna rabyanätsiyämaptin castiganäpä ninqänöllam paykunata castigarqä. 15Peru qamkunamanmi sïqa bendicionnïta churamushä. Tsaynö churamushä Jerusalénchö täyaptikipis o Judáchö kaykaq wakin markakunachö täyaptikipis. Tsaynö yanapanäpä kaykaptinqa ama mantsariyaytsu. 16Ama llullapänakuyaytsu. Runakuna alli kawayänanpä shumaq arreglayay. Pïmaywanpis alli kawayay. 17Jukniki juknikipis mana allita rurayänaykipä ama yarpäyaytsu. Tsaynölla ama llullakuyaytsu.#Efe. 4.25. Tsaynö kawarqa pasaypam rabyanätsiyämanki. Noqa Tayta Diosmi tsaynö nï>>.

18Mastapis llapanta mandaq Tayta Diosmi nimarqan: 19<<Chusku kaq killachö, pitsqa kaq killachö, qanchis kaq killachö, chunka kaq killachö llakikur ayunayänanpa#8.19 Chunka kaq killachö ayunayarqan tsay killa Babilonia soldädukuna Jerusalénta atacayta qallaykuyanqanta yarparmi (2Rey. 25.1). Chusku kaq killachö ayunayarqan tsay killa Jerusalénta tsaparaq murällata Babilonia soldädukuna uchkuyanqanta yarparmi (2Rey. 25.3-4). Pitsqa kaq killachö ayunayarqan tsay killa Babilonia soldädukuna Jerusalénta y templuta rupatsir ushayanqanta yarparmi (2Rey. 25.8-9). Qanchis kaq killachö ayunayarqan tsay killa Judáchö kaykaq gobernador Gedalíasta wanutsiyanqanta yarparmi (2Rey. 25.25). rantinmi Judá runakuna kushikurnin fiestata rurar alabayämanqa. Tsaynö kananpä kaykaptinqa mana llullakurnin alli kawayätsun>>.

20Noqa llapanta mandaq Tayta Dios karmi nï: Juklä nacionkunapita y juklä markakunapitam runakuna Jerusalénman shayämunqa. 21Shayämunanpämi juk markaman juk markaman aywar niyanqa: <<¡Aywashun Tayta Diosta rugakunantsikpä! ¡Llapanta mandaq Tayta Diosta ashishun!>>

Tsaymi wakin runakunapis niyanqa: <<¡Noqakunapis aywayäshä!>>

22Tsaynö willanakurmi markankunapita y nacionninkunapitapis llapanta mandaq Tayta Diosta ashir mañakuyänanpä Jerusalénman shayämunqa.

23Noqa llapanta mandaq Tayta Dios karmi nï: Tsay witsanmi maytsay nacionpita karpis y ima idiömata parlaq karpis chunka runakuna Judá nación juk runata röpanpita tsariskir rugakur niyanqa: <<Qamwan aywaytam munayä. Tayta Dios qamkunawan kaykanqantam wiyayarqü>>.

Currently Selected:

Zacarías 8: qxo

Highlight

Compare

Copy