Zacarías 11
11
1¡Líbano nación, punkuykikunata kichay nina yaykur cedru qeruykikunata lunyar ushananpä!
2Ciprés qerukuna, waqayay cedru qerukuna ishkiyanqanpita.
Kuyayllapä cedru qerukunam ushakashqana kaykäyan.
Basánchö kaykaq encina qerukuna, jatun munti ushakaptin waqayay.#Isa. 2.12-13.
3Lloqlluypa lloqlluykaq qewakunapis tsakishqanam kaykäyan.
Tsaymi üsha mitsiqkuna qayarayparä waqaykäyan.
Jordán mayu pampachö muntikunapis ushakashqanam kaykäyan.
Muntikuna manana kaptinmi leonkunapis qayaraykäyan.
Ishkay mitsikuqman iwalatsiypa tantiyatsinqan
4 Tayta Diosnïmi nimarqan: <<Pishtaypä kaykaq üshakunata shumaq mitsiy. 5Üshakunata rantiqkunaqa mana kuyapaypam pishtaykäyan. Rantikuqkunam niyan: <¡Graciasllä! ¡Tayta Diospa bendicionninwanmi rïcuyäyarqü!> Üsha mitsiqkunapis manam üshankunata kuyapäyantsu.#11.5 Üshakunaqa Tayta Dios kuyanqan runakunam kaykäyan. Üsha mitsiqkunaqa autoridäninkuna y sacerdötikunam kaykäyan. Üshakunata rantiqkunaqa Tayta Dios kuyanqan runakunapa contrankunam kaykäyan. Rantikuqkunaqa contrankunapa poderninman entregaqkunam kaykäyan.
6<<Tsaynö kaptinmi noqapis kay nacionchö täraq runakunata kuyapäshätsu. Tsaymi chikiqninkunapa y mandaq reykunapa poderninman entregashä. Chikiqninkuna kay nacionta ushakätsiptin manam imanöpapis salvashätsu. Noqa Tayta Diosmi tsaynö nï>>.
7Tsaymi üshata rantiq negociantikuna minkakamaptin pishtananpä kaq üshankunata shumaq cuidarqä. Cuidanäpämi ishkay tukruta ashirqä. Jukaq tukrutam jutitsirqä Alli Kaway jutin kananpä. Jukaq tukrutanam jutitsirqä Juntakashqa jutin kananpä. Tsay tukrükunawanmi#11.7 Üshata mitsinanpä tukruqa väranö jatunmi kaykan. Peru tsaynö kaptinpis puntan doblakashqa kaykan üshata sutamunanpämi. üshakunata mitsirqä. 8Makïchö kaykaq kimsaq mitsiqkuna chikimar rabyanätsiyämaptinmi juk killallachö paykunata qarqurqä.
9Tsaymi üshakunata nirqä: <<¡Manam qamkunata mitsiyäshaykinatsu! ¡Wanuyaptikipis, wanutsiyäshuptikipis y kikikikunapura wanutsinakuyaptikipis manam imapis importamannatsu!>>
10Tsaynö nirmi Alli Kaway jutitsinqä tukrüta pakirqä. Tsaynö pakirmi musyatsirqü maytsay nación runakunawan ruranqan pactuta Tayta Dios ushakätsinqanta. 11Tsaymi tsay junaq ushakarqan paykunawan Tayta Dios pactu ruranqan. Pakinqäta rikarmi üshata rantiq negociantikuna tantiyayarqan pactu ruranqanta Tayta Dios ushakätsinqanta.
12Tsaymi nirqä: <<Qamkunapä alli kaptinqa mitsinqäpita pägayämay. Pägamayta mana munarqa ama pägayämaytsu>>.
Tsaymi mitsinqäpita kimsa chunka (30) qellayta pägayämarqan.
13Tsaynö pägayämaptinmi Tayta Dios nimarqan: <<Mitsinaykipä qamta churaykaptïqa wallkallata pägayäshurniki noqatapis manakaqmanmi churaykäyäman. Arunqaykipita pägayäshunqayki qellaytaqa templuchö kaykaq babulman wiñay>>.
Tsaymi tsay kimsa chunka (30) qellayta apar templuchö kaykaq babulman wiñarqä.#Mat. 27.9-10. 14Tsaypitanam Juntakashqa jutiyuq tukrüta pakiskirqä. Tsaynöpam musyatsirqä Judá runakunawan Israel runakuna chikinakur kawayanqanta.
15Tsaymi Tayta Dios nimarqan: <<Kananqa mana alli mitsikuq runa kanqannö kay. 16Kananpitaqa kay nacionman juk mitsikuqta churashä oqrakashqatapis mana ashiqta, ashkashtapis mana cäsuqta, chakin pakishqatapis mana jampiqta y uyukunatapis alli qewaman mana qatiqta. Shumaq mitsinanpa rantin wera werallanta mikurmi shillullantana dëjaykunqa>>.#Eze. 34.2-4.
17¡Allaw, mana väliq mitsikuq runa!
Mitsiykanqayki üshata dëjanqaykipita derëcha kaq makikitapis pishtaypa pishtatsun.
Derëcha kaq ñawikitapis espädawan oqtiyätsun.
Rikraykipis usunkätsun.
Derëcha kaq ñawikipis qaprayätsun.
Currently Selected:
Zacarías 11: qxo
Highlight
Share
Compare
Copy
Want to have your highlights saved across all your devices? Sign up or sign in
© 2002, 2008, Wycliffe Bible Translators, Inc. All rights reserved.
