Miqueas 2
2
Mana alli rïcu runakunata castigananpä ninqan
1¡Allaw! Qamkunaqa punurpis mana allikunata rurayänallaykipämi yarpachakuykäyanki.
Munayanqaykita rurayänaykipä munayyuq karmi patsa waraskiptin yarpäyanqaykinö llutanta ruraykäyanki.
2Tsaymi jukpa chakrankunata munapar qechuykäyanki.
Runa mayikikunapa wayintam qechuykäyanki.
Tsaynö rurarmi warminta y tsurinkunatapis ñakaykätsiyanki.
Herenciantapis mana kuyapaypam qechuykäyanki.
3Tsaynö kayaptikim Tayta Dios nin:
<<Noqapis yarpachakuykänam qamkunata castiganäpä.
Castigaptï manam imanöpapis qeshpiyankitsu.
Pasaypa ñakatsiptï orgullösu kaynikikunapis mä maypash aywanä.
4Vincishuqnikikunam kushipäyäshurniki cantar niyäshunki:
<Allirächi pasaypa ushakäyarquyki.
Diosnikim chakraykikunata entregamashqa.
Qamkunata vinciskirmi qechuyarqü.
Chakraykikunapis noqakunapanam kaykan>.
Tsaynö nirmi wiyatsipäyäshurniki cantapäyäshunki>>.
5Tsaynöpam Tayta Dios entregamanqantsik nacionchö qamkunataqa pipis herenciata aypuyäshunkinatsu.
6Tayta Dios tsaynö castigananpä kanqanta willakuptïmi runakuna niyäman:
<<Qam niyämanqaykinöqa manam imaypis päsayämanqatsu.#Isa. 30.10.
7Jacobpita miraqkuna kayaptïmi Tayta Dios noqakunawan rabyakuntsu.
Castigayämänanpä kanqanta willakuptikipis payqa manam castigayämanqatsu.
Alli runakuna kayaptïmi payqa imaypis yanapayämanqa>>.
8Tsaynö niqkunapämi Tayta Dios nin:
<<Qamkunaqa kuyanqä runakuna kaykarmi conträ shäriyanki.
Guërrapita wayinkunaman yamaylla kutiq runakunapatam röpankunatapis qechuyanki.
9Kuyayllapä wayinkunata qechuyänayki raykurmi warmikunata qarquyanki.
Tsaynöllam wamrankunapa herenciankunatapis qechuyanki.
10<<¡Qamkunata manam rikaytapis munätsu!
¡Kaypita ras aywakuyay!
Kay nacionchöqa mananam täyankinatsu.
Qamkunam jutsayuq kaykäyanki kay nacionchö jutsa ruraylla kananpä.
Tsaymi chipyaq ushakätsiyäshayki.
11Wakinkunam llullakur niyan:
<Tayta Diosmi bendicionta churamunqa vïnupis y ima shinkatsikuqpis atska kananpä>.
Tsaynö nir pipis willakuptinqa profëtayki kananpämi kushishqa chaskiyanki>>.
Kuyanqan runakunata Tayta Dios salvananpä ninqan
12<<Jacobpita miraq runakuna,
kawaykar quëdaqkunataqa imayka üshata juk patsaman qoriqnömi nacionnikikunaman yapay qoriyämushayki.
Qorimuptïmi wallkaqlla karpis atskaqnö büllata rurar kushikuyanki.
13Juklä nacionchö kayanqaykipita kikïmi nacionnikikunaman pushayämushayki.
Marka punkupa yarquyaptikipis manam pipis tsapäyäshunkitsu.
Reynikikuna karmi puntaykikunata aywashä>>.
Currently Selected:
Miqueas 2: qxo
Highlight
Copy
Compare
Share
Want to have your highlights saved across all your devices? Sign up or sign in
© 2002, 2008, Wycliffe Bible Translators, Inc. All rights reserved.
