Mateo 18

Wamranö kanantsikpä Jesús tantiyatsinqan

Marcos 9.33-37; Lucas 9.46-48

1Juk kutinam discïpulunkuna Jesústa tapuyarqan: <<Tayta Diospa mandakuyninchö ¿pitä mas respitashqa kanqa?>>#Luc. 22.24.

2Tsaymi juk wamrata puntanman Jesús qayaskir 3nirqan: <<Rasunpam nï: Wamranö mana karqa manam imaypis Tayta Diospa mandakuyninman yaykuyankitsu.#Mar. 10.15; Luc. 18.17. 4Pipis kay wamranö humildi kaqmi Tayta Diospa mandakuyninchö mas respitashqa kanqa. 5Tsaynöllam kay wamranö kaqkunata noqapa jutïchö pipis chaskirqa noqatapis chaskiman.

Jutsaman mana ishkitsinantsikpä Jesús tantiyatsinqan

Marcos 9.42-48; Lucas 17.1-2

6<<Pipis noqaman criyikamuqta juk wamrallatapis jutsata ruratsiptinqa mas allim kanman mulinu rumita kunkanman watarkur lamarman jitarpuyaptin. 7¡Allaw, imanörä kayanqa pitapis jutsa ruratsiqkuna! Tsaynö runakunaqa kay patsachö imaypis kayanqam. Peru paykunaqa castigashqam kayanqa.

8<<Tsaymi makiki o chakiki jutsata ruratsiyäshuptikiqa roquskir jitariyay. Imaypis mana upiq ninaman ishkay chakiyuq o ishkay makiyuq qaykushqa kayänaykipa rantinqa mas allim kanman juk chakiyuqllapis o juk makiyuqllapis Tayta Diospa puntanman chäyaptiki.#Mat. 5.30. 9Tsaynölla ñawiki jutsata ruratsiyäshuptikiqa jipiskir jitariyay. Infiernuman ishkay ñawiyuq qaykushqa kayänaykipa rantinqa mas allim kanman juk ñawiyuqllapis Tayta Diospa puntanman chäyaptiki.#Mat. 5.29.

10<<Noqam nï: Kay wamrakunapa angelninkunam ciëluchö Papänïpa puntanchö imaypis kaykäyan. Tsaynö kaykaptinqa kay wamrakunata manakaqman ama churayaytsu. 11[Runapa Tsurinqa shamushqa oqrakashqakunata salvananpämi.]#Luc. 19.10.

Oqrakashqa üshaman iwalatsiypa Jesús yachatsinqan

Lucas 15.3-7

12<<Pipis pachak (100) üshankunapita jukta oqraykurqa ¿manaku wakin kaqta jaqiykur juklla ashiq aywan? 13Tariykurqa isqun chunka isqun (99) üshankunapä kushikunqanpitapis masmi kushikun. 14Tsaynöllam ciëluchö Papänïpis munantsu juk wamrallapis oqrakänanta.

Criyikuq mayintsikta corriginantsikpä Jesús tantiyatsinqan

Lucas 17.3

15<<Criyikuq mayiki ajanätsishuptikiqa tantiyatsinaykipä kikillanwan parlanki. Cäsushuptikiqa perdonanki.#Luc. 17.3. 16Mana cäsushuptikiqa yapay tantiyatsinaykipä juk ishkay yärakuq mayikita pushanki. Tsaynöpam imata ninqaykitapis mana ñëgananpä ishkay o kimsa testïgu kayanqa.#Deut. 19.15. 17Paykuna tantiyatsiyaptinpis mana cäsuptinqa criyikuq mayikikuna qorikäyanqanchö tantiyatsiyänanpä willayanki. Paykuna niyanqantapis mana cäsuptinqa tsay ajanätsishuqnikiwan amana qorikäyankinatsu. Tsaypa rantinqa mana Israel runatanö y impuestu cobraq runatanö rikayanki.

18<<Rasunpam nï: Kay patsachö watayanqaykiqa ciëluchöpis watashqam kanqa. Kay patsachö paskayanqaykiqa ciëluchöpis paskashqam kanqa.#18.18 Apostolkuna watayanqanpä parlarqa mana cäsukuqkunata corrigiyänanpämi Jesucristo parlarqan. Apostolkuna paskayanqanpä parlarqa tsay mana cäsukuq runa tantiyakuptin payta perdonayänanpämi parlarqan. Tsaynö parlarmi Jesucristo nirqan: Mana cäsukuqkunata corrigiyänaykipä poderyuqmi qamkuna kaykäyanki.#Mat. 16.19; Juan 20.23. 19Yapaymi qamkunata nï: Ishkaqllapis tsay yarpaylla mañakuyaptikiqa ciëluchö Papänïmi yanapayäshunki. 20Juk ishkaqllapis jutïchö qorikäyaptikiqa qamkunawanmi kaykäshä>>.

Perdonanakur kawanantsikpä Jesús ninqan

21Tsaynö yachatsiptinmi Jesúsman witiykur Pedro tapurqan: <<Taytay, yärakuq mayï llutanta rurar ajanätsimaptin ¿ayka kutitä perdonäman? ¿Qanchis kutitsurä?>>

22Jesúsnam nirqan: <<Manam qanchis kutillatsu perdonanki, sinöqa qanchis chunka (70) kuti qanchispis perdonanki>>.#Luc. 17.3-4.

23Tsaypitanam Jesús nirqan: <<Tayta Diospa mandakuynin imanö kanqantapis willashayki. Juk reyshi sirviqninkunata ninä jaqan kayanqanpita pägakuyänanpä. 24Jaqanta pägayänanpäshi juk sirviqninta reyman pushayänä. Tsay sirviqqa chunka waranqa (10,000) talentush#18.24 Juk talentum karqan juk runa ishkay chunka (20) wata arur gänanqannö. jaqan kanä. 25Jaqanta pägayta mana puëdiptinshi yanapaqninkunata tsay rey ninä: <Jaqäta pägamänanpä kay runata, warminta, tsurinkunata y imaykankunatapis rantikuyay>.

26<<Tsaynö niptinshi sirviqninqa puntanman qonquriykur rugakunä: <Taytay, shuyaykallämay. Jaqaykitaqa llapantam pägalläshayki>.

27<<Tsaynö rugakuptinshi tsay rey kuyaparnin llapan jaqanta perdonar rantikunänatsu.

28<<Perdonaskiptin aywaykanqanchöshi paypa jaqan kaq sirviq mayinwan tinkuskinä. Tsay sirviq mayinqa pachak (100) denariullash#18.28 Juk denariuqa juk junaq arur gänanqanmi karqan. jaqan kanä. Tsaynash kunkapita tsariskir ninä: <¡Jaqäta pägamay!>

29<<Tsaynö ruraptinshi qonquriykur rugakunä: <Taytay, shuyaykallämay. Jaqaykitaqa llapantam pägalläshayki>. 30Peru tsaynö rugakuptinpis manash perdonayta munanätsu. Tsaypa rantinqa jaqanta päganqanyaqshi carcelchö qaykurätsinä.

31<<Tsaynö ruranqanta rikaykurshi wakin sirviqkuna carcelman wichqatsinqan runata kuyaparnin reyman aywaykur ima päsanqantapis willayänä. 32Tsaynash tsay runata qayaykatsir rey ninä: <¡Mana kuyapäkuq runa! Pasaypa jaqä kaykaptikipis rugakamaptikiqa llapantam perdonarqü. 33¿Imanirtä qamta kuyapanqänö sirviq mayikita kuyaparquykitsu?> 34Tsaynö nirshi pasaypa rabyar kikintapis carcelman wichqatsinä. Tsaychöshi wardiakuna castigayänä reypa llapan jaqanta päganqanyaq>>.

35Tsaynö willaskirnam Jesús nirqan: <<Yärakuq mayikikunata llapan shonquykiwan mana perdonayaptikiqa tsaynöllam qamkunatapis ciëluchö kaykaq Papänï rurayäshunki>>.

Currently Selected:

Mateo 18: qxo

Highlight

Compare

Copy