Mateo 12

Jamay junaqpä Jesús poderyuq kanqan

Marcos 2.23-28; Lucas 6.1-5

1Jamay junaqchömi trïgu poquraykaq chakrakunapa discïpulunkunawan Jesús päsaykäyarqan. Tsaypa päsarmi discïpulunkuna mallaqar trïguta pallaskir uchuyarqan.#Deut. 23.25. 2Tsayta rikaykurmi fariseukuna niyarqan: <<Rikay. Leynintsikta mana cäsurmi discïpuluykikuna jamay junaq kaykaptin trïguta pallaykäyan>>.

3Jesúsnam nirqan: <<¿Manaku imaypis liyiyarquyki yanapaqninkunawan mallaqar David imata ruranqantapis? 4Davidshi Tayta Diospa wayinman yaykur Diospä churayanqan tantata mikunä.#1Sam. 21.1-6. Tsay tantaqa manam David ni paywan kaykaq runakuna mikuyänanpätsu karqan, sinöqa sacerdötikunalla mikuyänanpämi.#Lev. 24.9. 5Tsaynöllam Moisés qellqanqan leykunachö nin sacerdötikuna templuchö jamay junaq arurpis jutsayuq mana kayanqanta. Tsaytapis ¿manaku liyiyarquyki?#Núm. 28.9-10. 6Tsaymi qamkunata nï: Noqam templupitapis mas poderyuq kä.#12.6 Sacerdötikuna jamay junaq templuchö aruyanqan jutsa mana kanqannömi Jesúspa discïpulunkuna jamay junaqchö trïguta pallayanqanpis jutsatsu karqan.

7<<Tayta Diospa palabranmi nin: <Sacrificiuta rupatsiyanqaykipitapis mas munä kuyapäkuq kayänaykitam>. Tsayta tantiyarqa manam discïpulükunata manakaqman churayankimantsu.#Ose. 6.6; Mat. 9.13. 8Runapa Tsurinqa jamay junaqpäpis poderyuqmi>>.#12.8 Tsaynö nirqa jamay junaqchö runa imata rurananpä y mana rurananpäpis poderyuq kanqantam Jesús nirqan.

Makin wanushqa runata jamay junaqchö Jesús allïtsinqan

Marcos 3.1-6; Lucas 6.6-11

9Tsaypita aywarmi sinagögaman Jesús yaykurqan. 10Tsaychömi makin wanushqa runapis kaykarqan. Tsaymi Jesústa tapuyarqan: <<Jamay junaq kaykaptin qeshyaykaqta ¿allïtsishwanku o manaku?>>

Tsaynö tapuyarqan allïtsiptinqa tsay achäquilla Jesúspa contran shäriyänanpämi.

11Jesúsnam nirqan: <<Mayqaykipapis üshaykikuna pözuman jeqaptin jamay junaq kaykaptinpis ¿manaku jinan höra jipiq aywayanki?#Luc. 14.5. 12Runaqa üshapitapis masmi välin. Tsaymi jamay junaq kaptinpis runa mayintsikta allïtsishwan>>.

13Tsaypitanam makin wanushqa runata nirqan: <<¡Makikita joqariy!>>

Joqarkuptinmi jukaq makinnö sänuna karqan. 14Tsaypitanam fariseukuna yarquskir Jesústa wanutsiyänanpä willanakuyarqan.

Jesúspä profëta Isaías qellqanqan

15Tsaynö willanakuyanqanta musyaskirmi tsay markapita Jesús aywakurqan. Aywakuptinmi atskaq runakuna qepanta aywayarqan. Llapan qeshyaqkunatam Jesús allïtsirqan. 16Alliskatsirnam Jesús nirqan: <<Noqa allïtsinqäta pitapis ama willayankitsu>>.

17Tsaynöpam profëta Isaías qellqanqanta Jesús cumplirqan. Tsay qellqanqanchömi nin:

18<<Sirvimaqnï imanö kanqanta tantiyakuyay.

Paytam akrarqü.

Paytam kuyä.

Paypitam pasaypa kushikü.

Espïritütam payman mandamushä.

Paymi maytsay nación runakuna munanqänö kawayänanpä willakunqa.

19Payqa manam ollqutupanqatsu ni rimanakunqatsu.

Cällikunachöpis manam abusar purinqatsu.

20Tsillishqa carrïzutapis manam pakinqatsu.

Upinaykaq aktsitapis manam upitsinqatsu.#12.20 Kay textuchömi llakikuqkunata iwalatsirqan tsillishqa carrïzuman y upinaykaq aktsiman. Tsaymi kay textuchö nin llakishqa kaykaq runakunata manakaqman churananpa rantin Jesucristo kuyapänanpä kanqanta.

Payqa llapantapis allim juzganqa.

21Juklä nacionchö täraqkunapis paymanmi yärakuyanqa>>.#Isa. 42.1-4.

Jesúspa contran parlayanqan

Marcos 3.20-30; Lucas 11.14-23; 12.10

22Tsaypitanam supay qaprayätsinqan y upayätsinqan runata Jesús kaqman pushayarqan. Tsay runata allïtsiptinmi rikarqanna y parlarqanna. 23Tsayta rikarmi runakuna kushikur niyarqan: <<¿Kay runaqa Davidpa Tsurintsurä?>>

24Tsaynö niyanqanta wiyarmi fariseukuna niyarqan: <<Kay runaqa supaykunapa mandaqnin Beelzebúpa#12.24 Beelzebúqa Satanáspa jukaq jutinmi. poderninwanmi supaykunata qarqun>>.#Mat. 9.34; 10.25.

25Paykuna mana allita yarpäyanqanta musyarmi Jesús nirqan: <<Juk nacionchö runakuna kikinkunapura chikinakurqa ¿manatsurä wanutsinakur ushakäyanman? Tsaynöllam juk markachö täraqkunapis o juk wayichö täraqkunapis chikinakurqa ¿manatsurä wakpa kaypa aywakur ushakäyanman? 26Tsaynöllam Satanáspis kikinpa contran shärirqa rakikashqa kayanqa. Tsaynö kaptinqa mandakuyninpis ushakanqam.

27<<Beelzebúpa poderninwan supaykunata qarquptïqa ¿pipa poderninwantä discïpuluykikunaqa supaykunata qarquyan? Diospa poderninwan supaykunata qarquyanqanta tantiyaykarqa ¿imanirtä tantiyayankitsu noqapis Diospa poderninwan qarqunqäta? 28Diospa Espïritunwan supaykunata qarquptïmi Tayta Diospa mandakuynin qamkunaman chämunqanta musyayanki>>.

29<<Kallpayuq runata manarä pankarqa manam pipis wayinman yaykur imantapis apanmantsu. Peru pankaskirmi sïqa imantapis apanman.#12.29 Kallpayuq runamanmi Satanásta iwalatsin. Kallpayuq runapa imaykankunamanmi poderninchö tsararanqan runakunata iwalatsin. Satanáspita mas kallpayuq runamanmi Jesucristo iwalatsikun. Tsaynöpam tantiyatsirqan Satanáspita mas poderyuq kanqanta.

30<<Pipis favornï mana karqa conträmi kaykan. Noqawan mana qorimuq kaqqa qarqunmi.#12.30 Tsaynö parlarqa Jesús nirqan: Tayta Diospa mandakuyninchö runakuna kawayänanpä noqawan mana qoriq kaqqa tsapatam churapaykan. 31Tsaymi qamkunata nï: Runakuna jutsata rurayanqanta y Diospa contran parlayanqantam Tayta Dios perdonanqa. Peru Espíritu Santupa contran parlayanqantam sïqa perdonanqatsu. 32Runapa Tsurinpa contran parlayaptinqa perdonanqam. Peru Espíritu Santupa contran parlayaptinmi sïqa kay vïdachöpis ni washa vïdachöpis perdonanqatsu.#12.31-32 Espíritu Santuqa jutsantsikta dëjaskir Jesucristuman yärakunantsikpämi tantiyatsimantsik (Juan 16.8-11). Tsaymi Espíritu Santupa contran parlarqa pay tantiyatsinqanta mana chaskikur Jesucristuman imaypis yärakuntsu (Hech. 7.51). Peru Jesucristuman yärakuq kaqmi sïqa perdonashqa kanqa.#Luc. 12.10.

Parlakuyninpita runata reqinqantsikta Jesús ninqan

Lucas 6.43-45

33<<Alli jachaqa allitam wayun. Peru mana alli jacham sïqa mana allita wayun. Wayuyninpitam jachataqa reqintsik.#12.33 Tsaynö parlarmi Jesucristo nirqan: Jachata wayuyninpita reqinqantsiknömi runatapis imanö parlanqanta wiyar alli runa kanqanta o mana alli runa kanqantapis reqintsik.#Mat. 7.20; Luc. 6.44. 34¡Culebra casta runakuna!#Mat. 3.7; 23.33; Luc. 3.7. Mana alli runa kaykarqa ¿imanöparä allita parlayankiman? Runaqa shonqun yarpanqantam allitapis o mana allitapis parlan.#Mat. 15.18; Luc. 6.45. 35Alli runaqa shonqun alli yarpanqantam parlan y mana alli runaqa shonqun mana alli yarpanqantam parlan. 36Tsaymi qamkunata nï: Imatapis llutankunata parlayanqanpitam Tayta Dios juiciu finalchö juzganqa. 37Allita parlaqtaqa salvanqam. Peru llutankunata parlaqtam sïqa infiernuman qaykunqa>>.

Milagrutarä Jesús rurananta munayanqan

Marcos 8.11-12; Lucas 11.29-32

38Tsaynö niptinmi wakin fariseukuna y ley yachatsikuqkuna Jesústa niyarqan: <<Rabí, Tayta Dios rasunpa mandamushunqaykita musyayänäpä ima milagrutapis ruramuy>>.#Mat. 16.1; Mar. 8.11; Luc. 11.16.

39Jesúsnam nirqan: <<¡Mana cäsukuq jutsasapa runakuna! Milagruta ruranäta munayaptikipis#Mat. 16.4; Mar. 8.12. manam ima milagrutapis rurashätsu. Tsaypa rantinqa profëta Jonásta salvar milagruta ruranqannömi Tayta Dios juk milagruta ruranqa. 40Kimsa junaq kimsa paqas jatun pescädupa pachanchö Jonás kanqannömi#Jon. 1.17. Runapa Tsurinpis kimsa junaq y kimsa paqas pamparanqa.

41<<Jonás willakunqanta cäsurmi Nínive runakuna jutsankunata dëjayarqan.#Jon. 3.5. Peru kananqa Jonáspita mas poderyuq kaqmi willaykäyäshunki.#12.40-41 Runapa Tsurinpä parlar y Jonáspita mas poderyuq kaqpä parlarqa kikinpämi Jesucristo parlarqan. Tsaymi juiciu finalchö Nínive runakuna shärimur kanan tiempu runakunata shimpiyanqa>>.

42<<Salomón yachatsinqanta wiyananpämi mandaq reinapis sur kaq lädu karu nacionpita shamurqan.#1Rey. 10.1-10; 2Crón. 9.1-12. Peru kananqa Salomónpita mas yachaq kaqmi willaykäyäshunki.#12.42 Salomónpita mas yachaq kaqpä parlarqa kikinpämi Jesucristo parlarqan. Tsaymi juiciu finalchö tsay reina shärimur kanan tiempu runakunata shimpinqa.

Runaman supay kutinqan

Lucas 11.24-26

43<<Runapita supay yarqurmi maychöpis tänanpä ashir tsunyaq jirkakunapa purin. Mana tarirnam 44nin: <Yarqamunqä wayïman kutishä>. Kutiykurnam pitsapakushqa y churapakushqa jäkuykaqtana tarin. 45Tsaynöta tariykurmi supay mayinkunaman aywar paypita mas mana alli qanchis supaykunata pushakurkur tsay täranqanman kutin. Tsaymi ñöpata kanqanpitapis mas peorrä tsay runa tikran. Tsaynöllam päsanqa kanan tiempu mana alli runakunatapis>>.

Jesúspa maman y wawqinkuna pï kayanqanpis

Marcos 3.31-35; Lucas 8.19-21

46Jesús tsaynö yachaykätsiptinmi paywan parlayta munar maman y wawqinkuna punkuchö shuyaraykäyarqan. 47Tsaymi Jesústa juk runa willarqan: <<Mamaykiwan wawqikikunam waqtachö shuyaykäyäshunki>>.

48Jesúsnam nirqan: <<Kananmi mamä y wawqïkuna pï kayanqantapis musyatsiyäshayki>>.

49Tsaynö nirmi discïpulunkunaman toquykur nirqan: <<Paykunam mamä y wawqïkuna. 50Pipis ciëluchö kaykaq Papänï munanqannö kawaq kaqmi wawqï, panï y mamä kayan>>.

Currently Selected:

Mateo 12: qxo

Highlight

Compare

Copy