Lucas 21
21
Pobri viüda ofrendata churanqan
Marcos 12.41-44
1Tsaypitanam templuchö Jesús rikaskirqan ofrenda wiñakuyänan cäjaman rïcu runakuna ofrendata wiñaykaqta. 2Tsaynöllam rikarqan juk pobri viüdapis ishkay centävullata wiñaqta. 3Tsaymi Jesús nirqan: <<Rasunpam nï: Kay pobri viüdaqa llapanpitapis mas atskatam wiñashqa. 4Wakinkunaqa sobraq kaqllantam wiñayashqa. Peru kay viüdam sïqa tsaylla rantipakunanpä kaykaptinpis llapanta wiñashqa>>.
Templuta juchutsiyänanpä kanqanta Jesús willanqan
Mateo 24.1-2; Marcos 13.1-2
5Templu pirqaraq rumikuna kuyayllapä kanqanta y templu shumaq adornashqa kanqanta parlayaptinmi Jesús nirqan: 6<<Kay llapan rikayanqaykita chipyaqmi juchutsiyanqa. Manam ni juk rumillapis pirqaraykar quëdanqatsu>>.
Manarä kutimuptin imanö kananpä Jesús ninqan
Mateo 24.3-28; Marcos 13.3-23
7Jesústanam tapuyarqan: <<Rabí, ¿imaytä ninqaykinö kanqa? Tsaynö kananpä ¿ima señaltä kanqa?>>
8Jesúsnam nirqan: <<Cuidädutä pipis engañayäshunkiman. Atskaqmi jutïchö shamur niyanqa: <Noqam Cristo kä> y <kay patsa ushakanqanam>. Peru tsaynö niyäshuptikipis ama criyiyankitsu. 9Guërra kanqanta y wanutsinakuy kanqanta musyarpis ama mantsayaytsu. Puntataqa tsaykunarämi kanqa. Tsaynö kaptinpis kay patsaqa manarämi ushakanqarätsu>>.
10Mastam Jesús nirqan: <<Juk nacionmi juk nacionwan guërrata rurayanqa y juk marka runakunam juk marka runakunawan wanutsinakuyanqa. 11Patsapis pasaypam kuyunqa. Mallaqaypis y pestipis maytsaychömi kanqa. Ciëluchöpis mantsariypä señalkunam rikakämunqa.
12<<Tsaykuna manarä päsaptinmi qatikachar prësu tsariyäshunki. Sinagögakunaman aparmi juzgar carcelmanpis wichqatsiyäshunki. Noqa raykurmi reykunamanpis y gobernadorkunamanpis prësu apayäshunki. 13Tsaynöpam willakuynïta paykunatapis willayanki. 14Tsaychö imata parlayänaykipäpis ama yarpachakuyaytsu. 15Noqam imata parlayänaykipäpis tantiyatsiyäshayki. Tsaymi chikiyäshuqnikikuna ima niytapis puëdiyanqatsu.
16<<Qamkunapa contraykikunam shäriyanqa mamaykikuna, papänikikuna, wawqikikuna, castaykikuna y amïguykikunapis. Wakikikunataqa wanutsiyäshunkim. 17Noqa raykurmi pïmaypis chikiyäshunki. 18Peru tsaynö kaptinpis Tayta Dios manam jaqiyäshunkitsu. Manam ni juk aqtsaykikunallapis oqrakanqatsu. 19Imanö ñakarpis noqaman criyikamurmi salvashqa kayanki.
20<<Soldädukuna Jerusalénta jiruruparaykaqta rikarmi ushakänanpäna kanqanta musyayanki. 21Tsaynö kaykaqta rikar Judea markakunachö täraqkuna jirkakunapa qeshpir aywakuyätsun. Jerusalénchö täraqkunapis qeshpir aywakuyätsun. Chakrakunachö kaykaqkunapis markaman ama kutiyätsuntsu. 22Tsay junaqkuna pasaypa castïgu kaptinmi Tayta Diospa palabranchö ninqankuna llapan cumplinqa.
23<<¡Ay imanörä ñakayanqa qeshyaq warmikuna y llullu wamrayuq warmikuna! Maytsaychöpis Israel runakunata Tayta Dios castigaptinmi pasaypa ñakayanqa. 24Wakintam espädawan wanutsiyanqa y wakintanam maytsay nacionkunapa prësu apayanqa. Tayta Diosta mana cäsuq runakunam Jerusalénta poderninchö tsararäyanqa hasta Tayta Dios ninqan tiempu chämunqanyaq.
Jesucristo kay patsaman kutimunanpä kanqan
Mateo 24.29-31; Marcos 13.24-27
25<<Rupaypis, killapis y qoyllurkunapis mantsaypämi rikakuyanqa. Kay patsachö lamar bunyaypa bunyar laqchikachaptinmi runakuna mantsariywan ni ima ruraytapis puëdiyanqatsu. 26Ciëlupis siksikyaptinmi kay patsata imapis päsananpä kanqanta yarpar runakuna pasaypa mantsariywan pitiyanqarä. 27Tsaypitanam runakuna rikayanqa Runapa Tsurin pukutay jananchö chipipiykar pasaypa poderyuq shamuykaqta.#Dan. 7.13. 28Tsay ninqänö llapanpis qallaptinmi valorta tsarirnin kushikuyanki. Tsaykunata rikarmi musyayanki ñakaykunapita Tayta Dios salvayäshunaykipä kanqanta>>.
29Tsaynöllam iwalatsiypa yachatsir Jesús nirqan: <<Hïgus plantata y wakin jachatapis rikar tantiyayay. 30Raprankuna tseqllimuqta rikarmi usya tiempu qallananpäna kanqanta musyayanki. 31Tsaynöllam ninqänö päsanqanta rikar musyayanki Tayta Diospa mandakuynin cercachöna kanqanta. 32Rasunpam nï: Kanan tiempu runakuna manarä ushakaptinmi llapan ninqäkuna cumplinqa. 33Ciëlu y kay patsa ushakaptinpis noqa ninqäkunaqa manam ushakanqatsu.
34<<Cuidädutä tsay junaq illaqpita shamur tariyäshunkiman jutsata ruraykaqta, machashqata y imaykayuqpis kayänaykipä yarpachakur chukru shonqu kaykaqta. 35Imayka trampanömi kay patsachö llapan runakunatapis tsay junaq illaqpita tsarinqa. 36Tsaynö kananpä kaykaptinqa Tayta Diosman imaypis mañakur listu kaykäyay. Tsaynöpam shamunanpä ñakaykunapita qeshpir Runapa Tsurinpa puntanchö kushishqa kayanki>>.
37Junaqpam templuchö Jesús yachatsiq y paqaspanam Olivos jirkanman aywaq tsaychö quëdananpä. 38Jesús yachatsinqanta wiyayänanpämi wärayllana llapan runakuna templuman aywayaq.
Currently Selected:
Lucas 21: qxo
Highlight
Share
Copy
Want to have your highlights saved across all your devices? Sign up or sign in
© 2002, 2008, Wycliffe Bible Translators, Inc. All rights reserved.