Juan 8
8
Adulteriu jutsachö kaq warmita Jesús perdonanqan
1Jesúsnam Olivos jirkanman aywarqan. 2Tsaypita waraynin wäray templupa patiunman kutiptinmi llapan runakuna pay kaqman qorikäyarqan. Tsaychö Jesús jamaykur yachaykätsiptinmi 3ley yachatsikuqkunawan fariseukuna juk warmita apayarqan. Tsay warmitaqa runanta engañar juk runawan kakuykaqtam tariyarqan. Runakunapa puntanman chaykatsirmi 4Jesústa tapur niyarqan: <<Rabí, kay warmitam runanta engañar juk runawan kakuykaqta tariyarqü. 5Moisés qellqanqanchömi nimantsik tsaynö warmikunataqa saqmaypa wanutsinantsikpä.#Lev. 20.10; Deut. 22.22-24. Qamqa ¿ima ninkitä?>>
6Jesústa tsaynö tapuyarqan llutanta parlaskatsir acusayänanpämi.#8.6 Roma autoridäkunaqa manam munayarqantsu Israel runakuna pitapis wanutsiyänanta. Tsaymi: <<Moisés qellqanqanchö ninqannö saqmashun>> niptinqa Jesústa prësu tsariyanman karqan. <<Ama saqmashuntsu>> niptinqa ley yachatsikuqkunawan fariseukunam: <<¿Imanirtä Moisés qellqanqanta cäsunkitsu?>> niyanman karqan. Peru Jesúsnam umpuykur dëdunwan patsachö qellqarqan. 7Kutin kutin tapuyaptinnam ichirkur Jesús nirqan: <<Mayqaykipis jutsaynaq karqa kay warmita puntata saqmayay>>.
8Tsaynö niskirmi yapay umpuykur patsachö qellqarqan.
9Tsaynö ninqanta wiyaykurmi#8.9 Wakin qepa kaq griego copiakunachömi jutsayuq kayanqanta tantiyakurnin nir yapayashqa. rukukunapita qallaykur llapanpis juk juklla yarqur aywakuyarqan. Tsaymi tsay warmillana Jesúspa puntanchö quëdaskirqan. 10Jesúsnam ichirkur tsay warmita nirqan: <<¿Maytä apayämushuqnikikuna? ¿Manaku ni jukllayllapis saqmayäshurquyki?>>
11Warminam nirqan: <<Taytay, manam mayqanpis saqmayämashqatsu>>.
Jesúsnam nirqan: <<Noqapis manam saqmashqa kanaykita munätsu. Kananqa wayikipana aywakuy. Peru jutsata amana rurankinatsu>>.]
Pïmaypäpis Jesús aktsi kanqan
12Tsaypitanam runakunata Jesús nirqan: <<Noqam kay patsachö aktsi kä.#8.12 Aktsi kanqanta nirqa runakunata salvaq kanqanta y Dios munanqannö kawananpä tantiyatsiq kanqantam Jesús nirqan.#Sal. 27.1; 119.105; Prov. 6.23; Isa. 49.6; Juan 9.5. Tsaymi ninqäta wiyakuqkunaqa tsakaychönatsu kawayanqa, sinöqa kawatsikuq aktsichönam>>.
13 Fariseukunanam niyarqan: <<Tsaynö nirqa kikikipa yarpayllaykitam nikanki. Tsaymi ninqaykita criyiyätsu>>.#Juan 5.31.
14Jesúsnam nirqan: <<Kikïpa yarpaylläpita niptïpis ninqäkunaqa rasun kaqmi. Noqa musyämi maypita shamunqäta y maypa aywanäpä kanqanta. Qamkunaqa tsayta manam musyayankitsu. 15Qamkunaqa yarpayllaykikunapitam juzgayämanki. Noqaqa manam qamkunanötsu pitapis juzgä. 16Mandamaqnï Papänï noqawan imaypis kaptinmi pitapis juzgarqa rasun kaqchö juzgä. 17Leynikikunachömi nin: <Ishkay testïgukuna tsayllata niyaptinqa rasun kaqtam musyantsik>.#Deut. 19.15. 18Tsay ninqannöllam mandamaqnï Papänï juk testïgu y jukaq testïgunam kikï>>.
19Tsaynö niptinmi tapuyarqan: <<¿Maychötä papäniki kaykan?>>
Jesúsnam nirqan: <<Qamkuna manam Papänï pï kanqanta ni noqa pï kanqäta musyayankitsu. Pï kanqäta musyarqa Papänï pï kanqantapis musyayankimanmi>>.
20Jesús tsaynö nirqan templupa patiunchö ofrendata qorikuyänan kaqchö yachatsirmi. Tsaychö yachatsiptinpis höran manarä chämuptinmi mayqanpis prësu tsariyarqantsu.
Ciëlupita kanqanta Jesús ninqan
21Tsaypitanam Jesús nirqan: <<Noqaqa aywakushänam. Aywakuptï ashiyämarpis manam tariyämankitsu. Noqa aywanqä kaqmanqa manam aywayta puëdiyankitsu. Tsaypa rantinqa jutsallaykikunachömi wanuyanki>>.
22Israel runakunanam niyarqan: <<¿Imanirtä pay kanqan kaqman mana chänantsikpä kanqanta nimantsik? ¿Kikintsurä wanutsikuyta yarpan?>>
23Jesúsnam nirqan: <<Qamkunaqa kay patsachö yuriqllam kayanki. Peru noqam sïqa ciëlupita shamurqü. 24<Noqam Kä>#8.24 Noqam Kä nirqa Jesucristo tantiyatsirqan kikin Dios kanqantam. Tsaypita masta musyanaykipä liyinki Éxo. 3.14; Juan 10.30-33. nikaptïpis mana criyimarqa jutsaykikunachömi wanuyanki. Tsaymi nirqü jutsaykikunallachö wanuyänaykipä kanqanta>>.
25Tsaynö niptinmi tapuyarqan: <<Qamqa ¿pitä kanki?>>
Jesúsnam nirqan: <<Unaypitanam pï kanqätapis willarqü. 26Jutsaykikunata shimpinäpä atskarämi kaykan. Noqaqa mandamaqnï nimanqallantam qamkunata willä. Pay nimanqankunaqa llapanpis rasun kaqllam>>.
27Jesús tsaynö niptinpis Tayta Diospä parlaykanqanta manam tantiyayarqantsu. 28Jesúsnam nirqan: <<Runapa Tsurinta shäritsirrämi#8.28 Runapa Tsurinta shäritsiyänanpä nirqa kikinta cruzchö wanutsiyänanpä kanqantam nirqan. Tsaynöllam wanunqanpita kawamuptin payta adorayänanpä kanqanta nirqan. pï kanqätapis tantiyayanki. Tsayrämi munanqalläta imatapis mana ruranqäta tantiyayanki. Willakurpis Papänï nimanqannöllam willakü. 29Mandamaqnïqa noqawanmi imaypis kaykan. Pay munanqanta imaypis ruraptïmi kikillätaqa jaqimantsu>>.
30Jesús tsaynö niptinmi payman atskaq criyiyarqan.
Libri kanantsikpä Jesús ninqan
31Tsaypitanam payman criyiq Israel runakunata Jesús nirqan: <<Yachatsinqänölla kawarqa rasunpam discïpulükuna kayanki. 32Tsaymi rasunpa kaqta tantiyar librina kayanki>>.
33Tsaynö niptinmi niyarqan: <<¿Imanirtä librina kayänäpä niyämanki? Noqakunaqa Abrahampita miraqkunam kayä. Manam imaypis jukpa sirviqnintsu kayarqü>>.#Mat. 3.9; Luc. 3.8.
34Jesúsnam nirqan: <<Rasunpam nï: Pipis jutsallachö kawarqa jutsa ruraypa sirviqninmi kaykan. 35Sirviqqa manam patronpa tsurintsu, sinöqa sirviqllam. Peru patronpa tsurinmi sïqa papäninpa kaqta imatapis rurananpä poderyuq kaykan. 36Tsaymi sirviq kayanqaykipita Tayta Diospa Tsurin jipiyäshuptiki rasunpa librina kayanki.#Gál. 5.1, 13.
37<<Musyämi Abrahampita miraq kayanqaykita. Abrahampita miraq kaykarpis ninqäkunata mana criyirmi wanutsimayta munaykäyanki. 38Noqaqa Papänïpa puntanchö rikanqäkunatam willä. Qamkunapis papäniki yachatsiyäshunqaykitam ruraykäyanki>>.
Diablupa wamran kayanqan
39Tsaymi niyarqan: <<Noqakunapa papänïkunaqa Abrahammi>>.
Jesúsnam nirqan: <<Papäniki rasunpa Abraham kaptinqa pay kawanqannömi kawayankiman. 40Qamkunaqa Tayta Dios nimanqankunata willaptïmi wanutsimayta munayanki. Abrahamqa manam imaypis Tayta Diospa willakuqninta wanutsiyta yarparqantsu. 41Qamkunaqa papäniki ruranqannömi ruraykäyanki>>.
Paykunanam niyarqan: <<Noqakunaqa manam wachapakuytsu kayä. Tayta Diosmi noqakunapa Papänïqa>>.
42Jesúsnam nirqan: <<Tayta Dios rasunpa Papäniki kaptinqa noqatam kuyayämankiman. Noqaqa Tayta Diospitam kay patsaman shamurqü. Manam kikïpa munaylläpitatsu shamurqü, sinöqa Papänïmi mandamashqa. 43¿Imanirtä ninqäkunata tantiyayämankitsu? Ninqäkunaman criyiyta mana munarmi tsaynö kaykäyanki.
44<<Qamkunapa papänikiqa diablum. Tsaymi pay munanqanta imatapis rurayanki. Payqa unaypitam wanutsikuq kaykan. Llulla karmi imaypis rasun kaqta parlantsu. Tsaymi pipis llullakurqa paynö llullakuq kaykan. 45Rasun kaqta parlaptïpis noqataqa manam criyiyämankitsu.
46<<Mayqaykipis jutsayuq kaptïqa mä shimpiyämay. Rasun kaqta willaykaptïqa ¿imanirtä criyiyämankitsu? 47Tayta Diospa wamran karqa pay ninqantam cäsuyankiman. Diospa wamran mana karmi cäsuyankitsu>>.
Abraham manarä yuriptin Jesús kanqan
48Tsaynö niptinmi Israel runakuna niyarqan: <<¡Qamqa Samaria runakunanömi llutanta parlanki! ¡Qamchöqa supaymi kaykan!>>
49Jesúsnam nirqan: <<Noqachöqa manam ima supaypis kantsu. Noqaqa Papänïtam respitä. Qamkunaqa manam respitayämankitsu. 50Noqaqa manam alabakütsu, sinöqa llapan runakunata juzgaq Tayta Diosmi alliman churamanqa. 51Rasunpam nï: Ninqäkunaman criyiqkunaqa manam imaypis wanuyanqatsu>>.
52Israel runakunanam niyarqan: <<Kananmi sïqa qamchö supay kanqanta rasunpa musyayä. Abraham y profëtakunapis llapanmi wanuyarqan. Peru qamqa ninki: <Ninqäkunaman criyiqkunaqa manam imaypis wanuyanqatsu>. 53Qamqa ¿Abrahampita mastsurä kanki? Abraham y profëtakunapis wanushqa kaykaptinqa ¿pï kanqaykitatä yarpanki?>>
54Jesúsnam nirqan: <<Niyanqaykinö alabakuptïqa parlanqäkunapis manam imapä välinmantsu. Papänïmi noqataqa alliman churamanqa. Paytam qamkunapis <Diosnïmi> niyanki. 55Qamkunaqa manam payta reqiyankitsu. Peru noqam sïqa reqï. <Manam reqïtsu> nirqa qamkunanömi llullaküman. Pay ninqankunataqa llapantam cäsü. 56Unay castaykikuna Abrahammi shamunäpä kanqanta musyar kushikurqan. Shamuqta rikamarmi pasaypa kushikurqan>>.
57Israel runakunanam niyarqan: <<Manarä pitsqa chunka (50) watayuq kaykarqa ¿imanöpatä Abrahamta reqinkiman karqan?>>
58Jesúsnam nirqan: <<Rasunpam nï: Abraham manarä yuriptin Noqam Kä>>.#8.58 Noqam Kä nirqa Jesucristo tantiyatsirqan kikin Dios kanqantam. Tsaypita masta musyanaykipä liyinki Éxo. 3.14; Juan 10.30-33.
59Tsaynö niptinmi rumita aptarkur saqmayta munayaptin Jesús pakakurqan. Tsaypitanam [runakunapa chawpinpa päsar] templupita yarquskir aywakurqan.
Currently Selected:
Juan 8: qxo
Highlight
Share
Copy
Want to have your highlights saved across all your devices? Sign up or sign in
© 2002, 2008, Wycliffe Bible Translators, Inc. All rights reserved.