Juan 2
2
Yakuta vïnuman Jesús tikratsinqan
1Tsaypita kimsa junaqtanam Galileachö kaykaq Caná markachö casaray fiesta karqan. Tsay fiestachömi Jesúspa mamanpis kaykarqan. 2Tsaymanmi Jesústapis discïpulunkunatawan qayatsiyarqan. 3Fiesta manarä ushakaptinmi vïnunkuna ushakaskirqan. Jesústanam maman nirqan: <<Vïnunkunam ushakashqa>>.
4Tsaynö niptinnam Jesús nirqan: <<Mamay, ¿imanirtä tsaynö nimanki? Manarämi hörä chämunrätsu>>.
5Jesúspa mamannam sirvientikunata nirqan: <<Jesús niyäshunqaykita llapanta rurayay>>.
6Tsaychömi rumipita rurashqa joqta urpukuna karqan. Tsay urpukunamanmi costumbrin kanqannö purificakuyänanpä yakuta wiñayaq. Tsay urpukunamanmi pachak (100) litrunö yaku yaykuq. 7Sirvientikunatanam Jesús nirqan: <<Tsay urpukunaman junta yakuta wiñayay>>.
Tsaymi juntanqanyaq yakuta wiñayarqan. 8Juntaskatsiyaptinnam Jesús nirqan: <<Ichikllata chaqarkur mayor sirvienti yawananpä apayay>>.
Tsaynö niptinnam Jesús ninqannölla chaqarkur apayarqan. 9Mayor sirvienti yawarkurnam alli vïnu kanqanta tantiyarqan. Peru manam maypita apayanqantapis musyarqantsu. Sirvientikunallam maypita kanqantapis musyayarqan. Yawarkurnam casaraq jövinta qayaskir 10nirqan: <<Wakin runakunaqa fiesta qallanqan höram allinnin kaq vïnuta qarakuyan. Atskata upuskiyaptinnam sheqi kaqllatana qarayan. Peru qammi sïqa fiesta ushananchörä mas allinnin kaq vïnuta qarakaykätsinki>>.
11Tsaynömi Galileachö kaykaq Caná markachö punta kaq milagruta Jesús rurarqan. Poderyuq kanqanta rikarmi discïpulunkuna payman criyiyarqan.
12Tsaypitanam mamanwan, wawqinkunawan y discïpulunkunawanpis Capernaúm markaman Jesús aywarqan.#Mat. 4.13. Tsaychömi juk ishkay junaq qoyäyarqan.
Templuchö rantikuqkunata Jesús qarqunqan
Mateo 21.12-13; Marcos 11.15-17; Lucas 19.45-46
13Israel runakunapa Pascua#Éxo. 12.1-27; Deut. 16.1-8. fiestan qallaykunanpäna kaykaptinmi Jerusalénman Jesús aywarqan. 14Chaykurnam templupa patiunchö törukunata, üshakunata y palumakunatapis runakuna rantikur kaykaqta tarirqan. Tsaynöllam qellay trocatsiqkunata tarirqan.#2.14 Jesús kawanqan witsanmi Roma runakunapa qellayninkunata Israel runakuna imatapis rantipakuyänanpä manijayaq. Peru Tayta Diospä ofrendata apayänanpämi sïqa templuman apananpä kaq qellaytarä rantiyaq. 15Tsaynö tariskirmi chicötita ruraskir üshakunata y törukunata templupa patiunpita Jesús qarqurqan. Qellay trocatsiqkunapa mësankunatapis tikrarmi qellayninkunatapis mashtar usharqan. 16Paluma rantikuqkunatanam nirqan: <<¡Kaykunata jipiyay! ¡Imanirtä papänïpa wayinta mercäduman tikratsiyarquyki!>>
17Jesús tsaynö ruraptinmi discïpulunkuna yarpäyarqan Tayta Diospa palabranchö ninqanta: <<Templuykitam wanur kawarpis respitatsishä>>.#Sal. 69.9.
18Israel autoridäkunanam Jesústa niyarqan: <<¿Ima podernikiwantä rantikuqkunata qarqurquyki? Mä poderyuq kanqaykita musyayänäpä milagruta ruray>>.
19Jesúsnam nirqan: <<Kay templuta juchutsiyay. Juchutsiyaptiki kimsa junaqllatam shäritsishä>>.#Mat. 26.61; 27.40; Mar. 14.58; 15.29.
20Tsaynö niptinmi autoridäkuna niyarqan: <<Kay templuta chusku chunka joqta (46) watatam shäritsiyashqa. ¿Imanöpatä qam kimsa junaqllata shäritsinkiman?>>
21Tsaynö parlarqa manam templupätsu Jesús parlarqan, sinöqa templuman iwalatsikurmi kikinpä parlarqan. 22Jesús wanunqanpita kawaskamuptinnam discïpulunkuna tsaynö ninqanta yarpäyarqan. Tsaynöpam Jesús ninqanta y Tayta Diospa palabran ninqanta criyiyarqan.
Runakuna imata yarpäyanqantapis Jesús musyanqan
23Jerusalénchö kaykar Pascua fiestachö milagrukunata Jesús ruranqanta rikarmi Jesúsman atskaq criyiyarqan. 24Peru tsaynö kaptinpis janan shonqulla criyiyanqanta musyarmi paykunaman Jesús yärakurqantsu. 25Mana willaykäyaptinmi runakuna imata yarpäyanqantapis musyarqan.
Currently Selected:
Juan 2: qxo
Highlight
Share
Copy
Want to have your highlights saved across all your devices? Sign up or sign in
© 2002, 2008, Wycliffe Bible Translators, Inc. All rights reserved.