Juan 11
11
Lázaro wanunqan
1Betania markachömi Lázaro jutiyuq runa antsa qeshyaykarqan. Tsaychömi panin María y Martapis täyarqan.#Luc. 10.38-39. 2(Maríam Jesúspa chakinman perfümita wiñarkur aqtsanwan tsakitsishqa karqan.)#Juan 12.3. 3Lázaro antsa qeshyaptinmi paninkuna juk runata Jesúsman mandayarqan: <<Taytay, kuyanqayki Lázarum antsa qeshyaykan>> ninanpä.
4Tsaynö willayaptinmi Jesús nirqan: <<Lázaro manam wanunqanchö ushakänanpätsu qeshyaykan, sinöqa Tayta Dios y Tsurin poderyuq kayanqanta runakuna musyayänanpämi>>.
5Jesúsqa pasaypam kuyarqan Martata, Maríata y Lázaruta. 6Peru Lázaro qeshyaykanqanta willaptinpis manam rastsu aywarqan, sinöqa kaykanqan kaqllachömi ishkay junaq qoyarqan. 7Tsaypitanam discïpulunkunata nirqan: <<Judea provinciapa yapay aywashun>>.
8Discïpulunkunanam niyarqan: <<Rabí, qanyankunarämi tsaychö runakuna saqmaypa wanutsiyta munayäshurquyki.#Juan 10.31, 39. ¿Tsaynö kaykaptinku kutiyta munaykanki?>>
9Tsaymi Jesús nirqan: <<¿Manaku juk junaqchö chunka ishkay höra kaykan? Junaqpa purirqa aktsita rikarmi runakuna ishkiyantsu.#Juan 8.12; 9.5. 10Peru paqaspa purirmi sïqa imawanpis takakur ishkiyan. Tsaynö ishkiyan paychö aktsi mana kaptinmi>>.#11.10 Tsaykunata parlarmi Jesús nirqan: Hörä manarä chämuptinqa manam wanutsiyämanqarätsu. Tsaynöllam qamkunawan kaykaptïqa imapis päsayäshunkitsu.
11Tsaypitanam nirqan: <<Amïguntsik Lázaruqa punukashqallam kaykan. Rikchatsinantsikpä aku aywashun>>.
12Discïpulunkunanam niyarqan: <<Taytay, punukashqa karqa allinqam>>.
13<<Lázaro punukashqallam>> nirqa wanushqa kanqantam Jesús nirqan. Peru discïpulunkuna mana tantiyarmi punukashqa kanqanta yarpäyarqan. 14Tsaymi Jesús nirqan: <<Lázaruqa rasunpam wanushqa. 15Peru tsaychö mana kanqätam kushikü. Kananmi sïqa noqaman rasunpa criyiyanki. Pay kaqman aywashun>>.
16Tsaymi Millish niyanqan Tomás discïpulu mayinkunata nirqan: <<Noqantsikpis Jesúswan juntu wanunantsikpä aywashun>>.
Wanushqakunata kawatsinanpä Jesús poderyuq kanqan
17Betaniaman Jesús chaykuptinnam chusku junaqna Lázaro pamparanqanta willayarqan. 18Jerusalénpita Betaniaman media lëwanölla kaptinmi 19atskaq runakuna Martata y Maríata shoqayänanpä aywayarqan. 20<<Jesúsmi shamuykan>> niqta wiyarmi Marta taripaq aywarqan. Peru Maríanam wayichö quëdarqan. 21Jesúswan tinkuskirmi Marta nirqan: <<Taytay, kaychö kaptikiqa turï manam wanunmantsu karqan. 22Peru musyämi llapan mañakunqaykitapis Tayta Dios rurananpä kanqanta>>.
23Jesúsnam nirqan: <<Turikiqa kawamunqam>>.
24Martanam nirqan: <<Taytay, musyämi juiciu finalchö wanushqakuna kawayämuptin turïpis kawamunanpä kanqanta>>.#Dan. 12.2.
25Jesúsnam nirqan: <<Noqam wanushqakunata kawatsimuq kä.#Rom. 6.4-5; Col. 2.12; 3.1. Noqaman criyiq kaqtaqa wanuptinpis kawatsimushämi. 26Kawaqkunapis noqaman criyimurmi mana ushakaq kawayta tariyanqa. ¿Tsayta criyinkiku?>>
27Martanam nirqan: <<Awmi, noqa criyïmi Tayta Diospa Tsurin kanqaykita. Qamqa kay patsaman shamunanpä kaq Cristum kanki>>.
Lázarupä Jesús waqanqan
28Tsaynö niskirmi ñañan María kaqman Marta kutirqan. Chaykurnam qayaskir rinrillanchö nirqan: <<Jesúsmi chämushqa. Paymi qayaykäshunki>>.
29Tsaymi María ras aywarqan. 30Jesúsqa manarämi markaman charqanrätsu, sinöqa Martawan tinkunqallanchörämi kaykarqan. 31Wayipita María ras yarquqta rikarmi tsaychö kaykaqkuna qepanta aywar niyarqan: <<Turin pamparanqanmanchi waqaq aywaykan>>.
32Jesús kaqman chaykurmi puntanman qonquriykur María nirqan: <<Taytay, qam kaychö kaptikiqa manam turï wanunmantsu karqan>>.
33Maríata y compañaqninkunatapis waqaqta rikarmi Jesúspis pasaypa llakikurqan. 34Tsaymi tapurqan: <<¿Maymantä pampayarquyki?>>
Paykunanam niyarqan: <<Taytay, rikatsiyänäpä aywashun>>.
35Tsaymi Jesúspis waqarqan. 36Waqaptinmi wakin runakuna niyarqan: <<Rikay, Lázaruta pasaypachi kuyarqan>>.
37Wakinnam niyarqan: <<Qapra runatapis alliykätsirqa ¿manatsurä Lázarutapis allïtsinman karqan?>>
Lázaruta Jesús kawatsinqan
38Pasaypa llakishqam Lázaro pamparanqan machayman Jesús charqan. Machaypa punkunnam jatun rumiwan tsapararqan. 39Jesúsnam nirqan: <<Tsaparaykaq rumita wititsiyay>>.
Tsaynö niptinmi Lázarupa panin Marta nirqan: <<Taytay, chusku junaqnam pamparaykan. Pasaypanachi asyan>>.
40Jesúsnam nirqan: <<¿Manaku nirqü noqaman criyir Tayta Dios poderyuq kanqanta rikanaykipä?>>
41Tsaynö niptinmi tsaparaykaq rumita wititsiyarqan. Jesúsnam ciëlupa rikärir nirqan: <<Papä, mañakunqäta wiyamanqaykipitam qamta agradëcikü. 42Musyämi imaypis wiyamanqaykita. Peru kaychö kaykaq runakuna mandamanqaykita criyiyänanpämi mañakamü>>.
43Tsaypitanam Jesús jinchipa nirqan: <<¡Lázaro, yarqamuy!>>
44Tsaynö niptinmi uman, makin y chakin wankushqa kawaykar yarqamurqan. Tsaymi Jesús nirqan: <<Purinanpä paskayay>>.
Jesústa wanutsiyänanpä mandaq sacerdötikuna willanakuyanqan
Mateo 26.1-5; Marcos 14.1-2; Lucas 22.1-2
45Lázaruta kawatsimunqanta rikaykurmi Maríata compañaq runakuna Jesúsman atskaq criyiyarqan. 46Peru wakinnam fariseukunaman aywaykur Lázaruta Jesús kawatsimunqanta willayarqan. 47Tsaymi mandaq sacerdötikunawan fariseukuna llapan Sanedrín juezkunata qayaskatsir niyarqan: <<Tsay runaqa atskatanam milagrukunata ruran. Kananqa ¿imatatä rurashun? 48Imatapis mana rurashqaqa llapan runakunam payman criyiyanqa. Tsayta musyaskirmi Roma soldädukuna shamur templuntsikta juchutsir noqantsiktapis chipyaq ushakätsimäshun>>.
49Tsaynam mas mandaq sacerdöti Caifás nirqan: <<¡Qamkuna manam imatapis musyayankitsu! 50Llapantsik wanunantsikpa rantin mas allim kanman juk runalla wanuptin. ¿Imanirtä tsayta tantiyayankitsu?>>
51Caifásqa manam kikinpa yarpayllanpitatsu tsaynö nirqan, sinöqa tsay wata mas mandaq sacerdöti kaptinmi Tayta Dios tantiyatsirqan llapan runakunapa rantin Jesús wanunanpä kanqanta. 52Manam Israel runakunallapätsu wanunan karqan, sinöqa Diospa wamrankuna maytsaychö mashtakashqa kaykaqta qorimunanpämi. 53Tsay junaqpitam autoridäkuna willanakuyarqan Jesústa wanutsiyänanpä.
54Tsaymi Israel autoridäkunapita pakakuyllapa Jesús purirqan. Jerusalénpita discïpulunkunawan Efraín markaman aywarmi tsaychö quëdayarqan. Tsay markaqa desiertu cercanchömi kaykan.
55Israel runakunapa Pascua fiestan qallaykunanpäna kaykaptinmi markankunapita atskaq runakuna purificakuyänanpä Jerusalénman aywayarqan. 56Jesústa ashirmi templupa patiunchö juknin juknin ninakuyarqan: <<Qamkuna ¿imatatä yarpäyanki? ¿Fiestaman Jesús shamunqatsurä?>>
57Mandaq sacerdötikuna y fariseukunam runakunata yachatsiyashqana kayarqan: <<Jesústa maychöpis rikarqa prësu tsaritsiyänäpä ras willayämanki>>.
Currently Selected:
Juan 11: qxo
Highlight
Share
Copy
Want to have your highlights saved across all your devices? Sign up or sign in
© 2002, 2008, Wycliffe Bible Translators, Inc. All rights reserved.