Santiago 5
5
Rïcukunata ollqutupanqan
1¡Rïcukuna, wiyayämay! ¡Juiciu finalchö pasaypam ñakayanki! ¡Tsaymi qayarayparä waqayanki! 2Imayka qoriyanqaykipis ismurmi ushakanqa. Röpaykikunatapis puyum ushanqa. 3Qoriykikuna y qellaynikikunapis manam välinqatsu. Ultimu tiempuchöna kaykashqapis riquëzakunata kikillaykikunapämi qoriyanki. Tsaymi juiciu finalchö tsay qoriyanqayki riquëzaykikuna ambiciösu kayanqaykipita acusayäshunki. Salvayäshunaykipa rantinmi ninanö rupar ushayäshunki.#Mat. 6.19.
4Mana pägaypa arutsiyanqaykipitam peonnikikuna Tayta Diosta mañakuykäyan. Paykuna mañakuyanqantam llapanta mandaq Tayta Dios wiyashqa.#Deut. 24.14-15. 5Qellayniki kaptinmi munayanqaykita rurar kay patsachö kawaykäyanki. Tsaynö kawarmi pishtanapä werayätsishqa ashmanö kaykäyanki. 6Qamkunaqa defiendikuyta mana puëdiq jutsaynaq runakunatam wanutsiyarquyki.
Jesucristuta mana ajayaypa shuyänantsikpä ninqan
7Wawqikuna y panikuna, Señor Jesucristo kutimunqanyaq mana ajayaypa shuyäyay. Chakra aruqkunapis murukuyänanpä tamyatarämi shuyäyan. Mikuyninkunata qoriyänanpäpis usyatarämi shuyäyan. 8Tsaynölla qamkunapis llapan shonquykikunawan criyikur mana ajayaypa Señor Jesucristuta shuyäyay. Payqa kutimunanpänam kaykan.
9Wawqikuna y panikuna, manakaqman ama churanakuyaytsu. Manakaqman churanakuyaptikiqa Jesucristo kutimurmi juzgayäshunki. Runakunata juzgananpä cercachönam kaykan.
10Wawqikuna y panikuna, yarpäyay Tayta Diospa jutinchö willakuq profëtakuna imanö kawayanqanta. Paykunaqa ima ñakaychö karpis mana ajayaypam Tayta Dios munanqannö kawayarqan. Tsaynölla qamkunapis kawayay. 11Musyantsikmi imanö ñakarpis mana ajayaypa Tayta Dios munanqannö kawaqkunata pay yanapanqanta.#Job 42.10-17. Tsaynöllash Jobqa pasaypa ñakarpis Tayta Diosman mana ajayaypa criyikunä.#Job 1.20-22; 2.7-10. Tsaynö criyikuptinshi Tayta Dios alli shonqu y kuyapäkuq kar bendicionninta churanä.#Sal. 103.8; 111.4.
12Kuyay wawqikuna y panikuna, imata awnirpis ama jurayankitsu ciëluchö kaykaqkunapa jutinchö ni kay patsachö kaykaqkunapa jutinchöpis. Ama ni imapa jutinchöpis jurayankitsu. Tsaypa rantinqa cumpliyänaykipä kaptin awniyanki y mana cumpliyänaykipä kaptinqa ama awniyankitsu. Tsaynö kawayaptikiqa Tayta Dios manam castigayäshunkitsu.#Mat. 5.34-37.
Tayta Diosta mañakunapä ninqan
13Llakishqa karqa Tayta Diosta mañakuyay. Kushishqa karpis Tayta Diosta agradëcikur alabayay. 14Mayqaykipis qeshyarqa mayor wawqikunata qayatsiyanki Tayta Diosta mañakuyänanpä. Paykunam Jesucristupa jutinchö aceitita umaykiman wiñar allïnaykipä Tayta Diosta mañakuyanqa.#Mar. 6.13; Luc. 10.34. 15Llapan shonqunkunawan criyikur mañakuyaptinqa Tayta Dios allïtsiyäshunkim. Jutsata rurashqa kayaptikipis perdonayäshunkim. 16Tsaynö kaykaptinqa jutsata rurayanqaykita criyikuq mayikita willar confesakuyay. Tsaynölla jukniki juknikipäpis Tayta Diosta mañakuyay. Tsaynöpam qeshyayanqaykipita allïyanki. Tayta Dios munanqannö kawaq runa mañakunqantaqa Tayta Dios wiyanmi.
17Profëta Elías mañakunqantapis Tayta Dios wiyanäshi. Noqantsiknö runalla kaykarpis mana tamyananpä llapan shonqunwan mañakuptinshi kimsa wata y joqta killa tamyanätsu.#1Rey. 17.1; 18.1; Luc. 4.25. 18Yapay tamyananpä mañakuptinshi tamyamunä.#1Rey. 18.42-45. Tsayshi runakuna murukuyanqanpis wayunä.
19Wawqikuna y panikuna, mayqaykipis jutsaman ishkiptiki pipis tantiyatsiyäshurnikiqa 20wanuypitam salvashunki.#5.20 Wanuypitam salvashunki ninanqa infiernuman mana qaykushqa kayänaykipä kanqantam nin. Tsaynöpam mayjina jutsata rurashqa karpis perdonashqa kayanki.#Prov. 10.12; 1Ped. 4.8.
Currently Selected:
Santiago 5: qxo
Highlight
Share
Copy
Want to have your highlights saved across all your devices? Sign up or sign in
© 2002, 2008, Wycliffe Bible Translators, Inc. All rights reserved.