Amós 2
2
Moab nación runakunata Tayta Dios juzgananpä ninqan
1 Tayta Diosmi nin:
<<Moab nacionchö täraq runakunapa jutsankunaqa alläpanam kaykan.#Isa. 15.1—16.14; 25.10-12; Jer. 48; Eze. 25.8-11; Sof. 2.8-11.
Paykunaqa Edom nacionpa mandaqnin reypa tullunkunatam uchpayanqanyaq kayayarqan.
Tsaynö rurayanqanpitam mana kuyapaypa castigashä.
2Tsaymi imaykatapis nina rupar ushanqannö Moab nacionta y Queriotchö palaciukunatapis chipyaq ushakätsishä.
Pelyachö qayararrä cornëtanta tukaykäyaptinmi moabita runakunata soldädukuna wanutsir ushakätsiyanqa.
3Tsay nacionpa mandaqnin reytapis ushakätsishämi.
Yanapaqninkunatapis wanutsishämi>>.
Tayta Diosmi tsaynö nin.
Judá nación runakunata Tayta Dios juzgananpä ninqan
4 Tayta Diosmi nin:
<<Judá nacionchö täraq runakunapa jutsankunaqa alläpanam kaykan.
Paykunaqa mandamientükunata y leynïkunata mana cäsurmi unay castankuna adorayanqan ïdulukunata adorayan.
Tsaynö rurayanqanpitam mana kuyapaypa castigashä.
5Tsaymi imaykatapis nina rupar ushanqannö Judá nacionta y Jerusalénchö palaciukunatapis chipyaq ushakätsishä>>.#Ose. 8.14.
Israel nación runakunata Tayta Dios juzgananpä ninqan
6 Tayta Diosmi nin:
<<Israel runakuna, qamkunapapis jutsaykikunaqa alläpanam kaykan.
Qamkunaqa jutsaynaq runakunatam rantikuyanki.
Llanqipa preciunnölla jaqaykikuna kaykaptinpis pobrikunatam esclävu kayänanpä rantikuyanki.
Tsaynö rurayanqaykipitam mana kuyapaypa castigayäshayki.
7Pobrikunata y humildikunatam munayanqaykikunata ruratsiyanki.
Juez kaykarpis quejakuyanqantaqa manam arreglayankitsu.
Wakikinam papänikiwanpis tsay warmillawan kakuyanki.
Tsaynö karmi santu jutïta respitayankitsu.
8Röpata prendakuykur jaqipäyäshunqayki jananchömi altarkuna ñöpanchöpis punuyanki.#2.8 Prendata jaqipanqan röpata patsa tsakaptin kutitsinanpä kanqanta musyanaykipä liyinki Éxo. 22.26-27; Deut. 24.12-13.
Tsaynöllam manakaqpita multata pägatsiyanqayki qellaywanmi vïnuta rantiskir juk dioskunata adorayanqayki wayikunachö upyayanki.
9<<Qamkunata kuyarmi amorreo runakunata ushakätsirqü.#2.9 Egiptupita Canaánman Israel runakuna charmi Tayta Dios yanapaptin amorreo runakunata ushayarqan. Tsaypitanam paykuna täyanqan markakunachö Israel runakuna täyarqan.#Deut. 3.8-11.
Cedru qerukunanö jatusaq kaykaqta y encina muntikunanö chukru kaykaqtam tsay runakunata ushakätsirqü.
Jachapa wayuyninta y matsunta illakätsiqnömi illakätsirqü.
10Amorreo runakuna täyanqanman chäyänaykipä kikïmi Egiptupita qamkunata jipimurqä.
Kikïmi chusku chunka (40) wata desiertukunapa qamkunata pushamurqä amorreo runakuna täyanqan markakunata qamkunata entreganäpä.#Éxo. 20.2; Deut. 8.2-16.
11Tsurikikunapitam wakinta profëta kayänanpä akrarqü.
Wakintanam nazareo runa kayänanpä akrarqü.#Núm. 6.1-8.
Israel runakuna, ¿manaku tsaynö kananpä permitinqäta tantiyayanki?>>
Tayta Diosmi tsaynö nin.
12<<Tsaynö akraykaptïpis qamkunaqa nazareo runakunata mana munaykaptinmi vïnuta uputsiyarquyki.
Tsaynöllam profëtakunatapis michäyarquyki willakuynïta mana willakuyänanpä.
13Tsaynö kayanqaykipitam pasaypa cargashqa carrëta patsachö imallatapis jarur ushakätsinqannö qamkunatapis ushakätsiyäshayki.
14Mayjina cörrirpis makïpita manam qeshpiyankitsu.
Ni kallpasapa karpis defiendikuyta manam puëdiyankitsu.
Ni mayjina geniuyuq karpis manam salvakuyankitsu.
15Flëchayta munarpis manam puëdiyankitsu.
Mayjina cörrirpis manam ayqiyta puëdiyankitsu.
Caballuta muntakurkur qeshpirpis manam salvakuyankitsu.
16Tsay junaqqa mayjina geniuyuq karpis armaykikunata jitaskirmi qeshpir aywakuyanki>>.
Tayta Diosmi tsaynö nin.
Currently Selected:
Amós 2: qxo
Highlight
Copy
Compare
Share
Want to have your highlights saved across all your devices? Sign up or sign in
© 2002, 2008, Wycliffe Bible Translators, Inc. All rights reserved.
