Hechos 2
2
Espíritu Santu shamunqan
1 Pentecostés fiesta junaqmi Jesucristuman criyiqkuna juk wayichö qorikashqa kaykäyarqan. 2Tsaychö kaykäyaptinmi illaqpita shukukuy vientunörä pasaypa qayaranqan ciëlupita wiyakämurqan. 3Tsaynöllam rachikar rachikar ninanörä janankunaman charqan. 4Llapanmi Espíritu Santupa poderninwan imaypis mana parlayanqan idiömakunata parlar qallaykuyarqan.
5Tsay witsanmi Dios munanqannö kawaq Israel runakuna maytsay nacionpitapis Jerusalénchö kaykäyarqan. 6Shukukuy vientunö qayaranqanta wiyarmi ima päsanqantapis rikaq aywayarqan. Juknin jukninpis markanchö parlayanqan idiömakunata parlayanqanta wiyarmi espantakuyarqan. 7Tsaymi niyarqan: <<Kay llapan parlaykaqkunaqa ¿manaku Galilea runakuna kayan? 8Idiömantsikta parlayänanpä ¿imanöpatä yachakuyashqa? 9Kaychöqa maytsaypitam kaykantsik: Partiapita, Mediapita, Elampita, Mesopotamiapita, Judeapita, Capadociapita, Pontupita, Asiapita, 10Frigiapita, Panfiliapita, Egiptupita, Libiachö kaq Cirenipa cercankunapita y Romapitapis. 11Wakintsikqa yurinqantsikpitam Israel runakuna kantsik. Y wakintsiknam Israel runana kanantsikpä Tayta Diosman criyikurquntsik. Cretapitapis, Arabiapitapis kaychömi kaykantsik. Maytsaypita karpis kikintsikpa idiömantsikchömi wiyaykantsik Tayta Dios kushikuypä ruranqankunata>>.
12Tsaymi espantakur kikinpura parlayarqan: <<¿Imatä päsaykan?>>
13Wakinnam burlakur niyarqan: <<Kaykunaqa machashqam kaykäyan>>.
Pedro willakunqan
14Tsaynö parlayaptinmi apóstol mayinkunawan ichirkur Pedro nirqan: <<Jerusalénchö y maytsaychöpis täraq Israel runakuna, shumaq wiyayämay. 15Manam yarpäyanqaykinötsu machashqa kaykäyä. Wäray las nuëvillaräqa manam pipis machantsu. 16Kanan rikayanqayki päsananpämi profëta Joel willakur nirqan:
17<< <Tayta Diosmi nin:
Ultimu tiempuchömi Espïritüta llapan runakunaman mandamushä.
Tsaymi ollqu tsurikikuna y warmi tsurikikunapis willakuynïta willakuyanqa.
Jövinkunapis revelaciontam rikayanqa.
Rukukunatapis sueñuyninkunachömi musyatsishä.
18Tsay junaqkunam ollqu y warmi sirvimaqnïkunamanpis Espïritüta mandamuptï willakuynïta willakuyanqa.
19Imaypis mana rikayanqaykikunatam ciëluchö y kay patsachöpis rikakätsimushä.
Yawartapis, ninatapis y qoshnitapis rikayankim.
20Rupaypis tsakanqam.
Killapis yawarmanmi tikranqa.
Tsaykuna kanqa juzganä junaq manarä chämuptinmi.
Tsay junaqqa mantsariypämi kanqa.
21Tsaynö kaptinpis noqata mañakamaq kaqtaqa pïmaytapis salvashämi>.#Joel 2.28-32.
22<<Israel runakuna, shumaq wiyayämay. Musyayanqaykinöpis Nazaretpita Jesústa Tayta Dios yanaparqan mana rikanqantsik milagrukunata noqantsik kaqchö rurananpämi. 23Tsaynö kaykaptinpis qamkunam Jesústa prësu tsariskir Diosta mana cäsuq runakunaman entregayarquyki crucificaypa wanutsiyänanpä.#Luc. 23.33; Juan 19.18. Tsaynö kananpä kanqantaqa unaypitam Tayta Dios nirqan.#Luc. 24.26. 24Wanutsiyaptinpis pamparanqallanchö ushakänanta mana munarmi Tayta Dios kawatsimushqa.#Mat. 28.5-6; Mar. 16.6; Luc. 24.5.
25<<Davidpis Jesucristupämi nirqan:
<< <Tayta Diostam imay hörapis yarparaykä.
Derëcha kaq lädüchö karmi imaypis yanapaykäman.
26Tsaymi shonqüpis pasaypa kushikun.
Shimïpis paytam alaban.
Payman yärakurmi imaypis tranquïlu kawä.
27Wanushqakuna pamparäyanqanchöqa manam dëjamankitsu.
Santu sirviqniki kaptïmi sepultürachö cuerpü ismunantapis munankitsu.
28Munanqaykinö kawanäpämi alli nänipa pushamanki.
Puntaykichöqa imaypis kushishqallam kawä>.#Sal. 16.8-11.
29<<Wawqikuna, musyantsikmi David wanunqanta. Maychö pamparanqantapis musyantsikmi. 30Profëta karmi David musyarqan castanpita [Cristo] yurinanpä kanqanta. Tsaynöllam musyarqan paynö rey kananpä Tayta Dios jurar awninqanta.#2Sam. 7.12-13; Sal. 132.11. 31Tsaymi kikinpä qellqananpa rantin tsay yuriq runapä David qellqarqan. Payqa salvamaqnintsik Cristum. Cristo kawamunqanta rikaqnömi David qellqarqan pamparanqanchö Tayta Dios mana jaqinanpä kanqanta y cuerpun mana ismunanpä kanqanta.
32<<Kananqa David qellqanqannöllam Jesústa Tayta Dios kawatsimushqa. Kawamunqanta llapäkunam rikayarqü. 33Paytam Tayta Dios derëcha kaq lädunman jamaykatsir promitinqan Espíritu Santuta entregashqa. Jesucristunam Espíritu Santuta noqakunaman mandamushqa. Tsaytam kanan wiyaykäyanki y rikaykäyanki.
34<<Davidqa manam kawamushqatsu ni ciëluman aywashqatsu. Tsaymi kikinpä qellqananpa rantin jukpä qellqar nirqan: <Mandamaqnïtam Tayta Dios nirqan: <<Derëcha kaq lädüman jamakamuy 35llapan chikishuqnikikunata podernikiman churamunqäyaq>> >.#Sal. 110.1.
36<<Israel runakuna, ninqäta shumaq tantiyayay. Qamkuna Jesústa cruzchö wanutsishqa kayaptikipis Tayta Diosmi payta churashqa Señornintsik y salvamaqnintsik Cristo kananpä>>.
37Tsayta wiyaykurmi runakuna pasaypa llakikur Pedruta y wakin apostolkunatapis tapuyarqan: <<Wawqikuna, ¿imatatä rurayäman?>>
38Pedrunam nirqan: <<Tayta Dios perdonayäshunaykipä jutsaykikunata dëjar Jesucristupa jutinchö bautizakuyay. Tsaynöpam Tayta Dios qarayäshunqayki Espíritu Santuta chaskiyanki. 39Tayta Diosnintsik promitinqan Espíritu Santuqa qamkunapä, tsurikikunapä y maytsaychö täyaptinpis llapan qayanqan runakunapämi>>.
40Tsaynö nirmi Pedro mastapis tantiyatsir nirqan: <<¡Jutsasapa runakunanö castigashqa kayänaykipä kanqanpita salvakuyay!>>
41Pedro ninqanta criyikuqkunam kimsa waranqanö (3,000) kayarqan. Paykuna llapanmi bautizakuyarqan. 42Paykunam imaypis qorikäyaq apostolkuna yachatsiyanqankunata yachakuyänanpä, animatsinakuyänanpä, Santa Cënata mikuyänanpä y Tayta Diosta mañakuyänanpä.
Criyikuqkuna yanapanakur kawayanqan
43Apostolkuna milagrukunata rurayanqanta rikarmi llapan criyikuqkuna espantakuyarqan. 44Imaypis qorikarmi imaykankunatapis rakipänakur yanapanakuyaq.#Hech. 4.32-35. 45Tsaynöllam chakrankunata y imaykankunatapis rantikuskir nisitayanqanman tsay qellayta aypunakuyaq. 46Qoyay qoyaymi templupa patiunman qorikäyaq. Tsaynöllam wayinkunachö qorikaykur tantata pakipanakur kushishqa mikuyaq. Mayqanpis manam qallayätsinakuyaqtsu. 47Paykunaqa imaypis Tayta Diostam alabayaq. Llapan runakunam paykunata respitayaq. Wakintapis Señornintsik salvaptinmi qoyay qoyay atskayäyaq.
Currently Selected:
Hechos 2: qxo
Highlight
Share
Copy
Want to have your highlights saved across all your devices? Sign up or sign in
© 2002, 2008, Wycliffe Bible Translators, Inc. All rights reserved.