1 Tesalonicenses 2
2
Tesalónica markachö Pablo willakunqan
1Wawqikuna y panikuna, willakuyanqäta criyikuyaptiki manam wallällatsu qamkunaman shamur yachatsiyarqü. 2Musyayankim qamkuna kaqman manarä chäyämuptï Filipos#Hech. 16.19-24. markachö ashlliyämar ñakatsiyämanqanta. Tsaynöllam qamkuna kaqchöpis ñakatsiyämashqa. Tsaynö ñakatsiyämaptinpis Tayta Diosnintsikmi yanapayämashqa alli willakuyninta mana mantsariypa willakuyänäpä.#Hech. 17.2-4.
3Noqakuna manam pitapis llutanta yachatsiyänä raykutsu ni pitapis sakyayänä raykutsu ni pitapis llutanta criyitsiyänä raykutsu willakuyä. 4Tsaypa rantinqa alli willakuyninta willakuyänäpä Tayta Dios mandayämashqa kaptinmi willakuykäyä. Manam runakuna munayanqantatsu willakuykäyä, sinöqa Tayta Dios munanqantam.#Gál. 1.10. Payqa shonquntsik imata yarpanqantapis musyanmi.
5Musyayanqaykinöpis criyiyämänayki raykur manam imaypis qamkunata alabayarqütsu. Tayta Dios musyanmi pipa qellaynintapis mana sakyayanqäta. 6Manam alabashqa kayta munartsu qamkuna kaqchö willakuyarqü.
7Jesucristupa apostolnin kaykarqa gastükunapä qamkunatam mañakuyäman karqan. Mañakunäpa rantinqa wamranta maman kuyanqannömi qamkunatapis kuyayarqü. 8Tsaynö kuyarmi Tayta Diospa willakuyninta criyikuyänayki raykur wanuyänäpäpis listu kayarqü.
9Wawqikuna y panikuna, ¿manaku yarpäyanki qamkuna kaqchö Tayta Diospa willakuyninta willakuyänäpä kikïkuna aruyanqäta? Gastükunapä yarpachakuyänaykita mana munarmi paqaspa junaqpapis pasaypa ajayäyanqäyaq aruyarqü.#Hech. 18.3; 2Tes. 3.8. 10Qamkunapis y Tayta Diospis musyanmi qamkuna kaqchö kar pay munanqannö allillata rurar santu kawayanqäta. 11Tsaynöllam musyayanki tsurinkunata papänin kuyanqannö qamkunata kuyayanqäta. 12Tsaymi qamkunata rugayarqä, parlapäyarqä y tantiyatsiyarqä Tayta Dios munanqannö kawayänaykipä. Paymi qayayäshurquyki mandakuyninchö imayyaqpis paywan kawayänaykipä.
13Tayta Diospa alli willakuyninta willayaptï manam runakunapa yarpaynin kanqantatsu yarpäyarquyki, sinöqa Tayta Diospa willakuynin kanqantam. Tsaynö tantiyarmi llapan shonquykikunawan criyikuyarquyki. Willakuyninta wiyarmi pay munanqannö kawayänaykipä tantiyayarquyki. Tsaymi imaypis Tayta Diosta agradëcikuyä.
14Wawqikuna y panikuna, marka mayikikuna ñakatsiyäshunqaykinöllam Judeachö kaykaq wawqikunata y panikunatapis Israel runakuna ñakaykätsiyan. 15Tsay runakunam Señor Jesucristutapis wanutsiyarqan. Tsaynöllam Tayta Diospa profëtankunatapis unay castankuna wanutsiyarqan. Tsaynö runakunam noqakunatapis Judeapita qarqayämashqa.#Hech. 9.23, 29; 13.45, 50; 14.2, 5, 19; 17.5, 13; 18.12. Paykunaqa manam Tayta Dios munanqannötsu kawayan. Manam munayantsu Tayta Diospa alli willakuyninta runakuna criyiyänanta. 16Tsaymi mana Israel runakunata willayaptï tsapata churapäyan mana salvakuyänanpä. Tsaynö karmi mas jutsayuq kaykäyan. Tsaynö kayanqanpitam juiciu final junaqchö paykunata Tayta Dios pasaypa castiganqa.
Tesalónicaman Timoteuta Pablo mandanqan
17Wawqikuna y panikuna, qamkuna kaqpita aywakuyanqä junaqpita manam rikanakurquntsiknatsu. Tsaymi qamkunapä llakikur imaykanöpapis watukakuq kutimuyta munaykäyä. 18Noqa Pablo atska kutim kutimuyta munarqü. Peru Satanásmi mana shayämunäpä tsapata churapäyämashqa. 19Tsapata churapäyämaptinpis qamkunam premiuta chaskinqä corönä kaykäyanki. Tsaymi Señornintsik Jesucristo kutimuptin paypa puntanchö qamkunapita pasaypa kushikuyäshä. 20Qamkunapita rasunpam Tayta Diosta alabar kushikuyäshä.
Currently Selected:
1 Tesalonicenses 2: qxo
Highlight
Share
Copy
Want to have your highlights saved across all your devices? Sign up or sign in
© 2002, 2008, Wycliffe Bible Translators, Inc. All rights reserved.