1 Corintios 16
16
Ofrendata qoriyänanpä ninqan
1Jerusalénchö wawqikunapä y panikunapä ofrendata qorirqa#Rom. 15.25-26; 2Cor. 8—9. Galacia provinciachö wawqikunata y panikunata yätsinqänölla qamkunapis qoriyay. 2Semäna arur gänayanqaykipita cada domingu cada ünuykikuna aykallatapis churayanki. Ama noqa chämuptïräqa qoriyankitsu. 3Qoriyanqayki ofrendata Jerusalénman apayänanpä wawqikunata akrayay. Chaykamurnam paykunapä cartata rurashä Jerusalénman apayaptin wawqikuna y panikuna chaskiyänanpä. 4Noqapis aywayta puëdirqa paykunawanmi aywashä.
Maypapis aywananpä kaqta Pablo willanqan
5Qamkuna kaqman kutimurmi Macedonia provinciaparä tumamushä.#Hech. 19.21. 6Chaykamurqa capazchi tamya killa päsanqanyaq qamkunawan quëdashä. Tsaypitanam wakin markakunaman aywanäpäpis yanapayämanki. 7Manam päsädallaqa qamkunata watukayta munätsu. Tayta Dios munaptinqa qamkuna kaqchö quëdashärämi.
8Peru Éfesuchömi sïqa Pentecostés fiesta chämunqanyaq täräshä. 9Atskaq conträ shäriyaptinpis Tayta Dios yanapaykämanmi kay markakunachö alli willakuyninta willakunäpä. Tsaynö willakuptïmi Jesucristuman criyikuykäyan.#Hech. 19.8-10.
10Wawqintsik Timoteo qamkuna kaqman chämuptin kushishqalla chaskiyay. Paypis noqanömi Jesucristupa willakuyninta willakuykan.#1Cor. 4.17. 11Paytaqa manakaqman ama churayaytsu. Alli kutimunanpä yanapaykuyällay. Noqakunapis kaychö kaq wawqikunawan y panikunawanmi payta shuyaykäyä.
12Qamkuna kaqman wakin wawqikuna shayämuptinmi Apolustapis rugakurqä qamkunaman shamunanpä. Tsaynö rugakuykaptïpis manam shamuyta puëdintsu. Tsaypitarämi quizás shamunqa.
Carta ushanan
13Imapitapis maya mayalla kayay. Imanö ñakarpis Tayta Diosman yärakuyay. Imatapis mana mantsaypa Tayta Dios munanqannö kawayay. 14Pïmaywanpis kuyanakur shumaq kawayay.
15Wawqikuna y panikuna, musyayankim Acaya provinciachö wawqintsik Estéfanas castankunawan#1Cor. 1.16. Jesucristuman puntata criyikuyanqanta. Paykunam wawqikunata y panikunata imachöpis yanapaykäyan. 16Tsaymi qamkunata rugä paykunata cäsuyänaykipä. Tsaynölla llapantapis paykunanö yanapayäshuqnikikunata y yachatsiyäshuqnikikunata cäsuyay.
17Estéfanas, Fortunato y Acaico qamkuna kaqpita watukamaq chäyämuptinmi llapaykita rikaqnörä kushikurqü. 18Qamkunata valuratsishunqaykinöllam noqakunatapis valuratsiyämashqa. Paykunata y paykunanö kaqkunata shumaq respitayanki.
19Asia provinciachö wawqikuna y panikunapis qamkunapämi salüdukayämun. Tsaynöllam Aquila y Priscila#Hech. 18.2. y wayinchö qorikaq wawqikuna y panikunapis qamkunapä salüdukayämun. 20Llapan wawqikuna y panikunam salüdukayämun. Jukniki juknikipis cäraykikunachö mutsanakur saludanakuyay.
21Noqa Pablo kikïmi kay salüdütaqa qellqaykämü.
22Pipis Jesucristuta mana kuyaq kaqtaqa Tayta Dios castiganqam. ¡Señor Jesucristo, kutikallämuy!
23Imaypis alli kawayänaykipä Señor Jesucristo yanapaykuyälläshuy. 24Jesucristuman criyikuq mayï kayaptikim llapaykikunata kuyä. [Amén.]
Currently Selected:
1 Corintios 16: qxo
Highlight
Share
Copy
Want to have your highlights saved across all your devices? Sign up or sign in
© 2002, 2008, Wycliffe Bible Translators, Inc. All rights reserved.